Read tiv Hosea 2 Bible Online

Hosea 2 - tiv bible

Hosea 2

¹Kaa nen a anngôôv enev mba nomso ner: Ami (Iorav); man a anngôôv enev mba kasev ner: Ruhama (i zungwe ve mhôônom).

²Hendan nen a ngô wen, hendan nen; gadia ka kwase Wam ga, Mo kpaa M ngu nom na ga; a̱ kar a idya na sha ishigh nagh kera, man a ijimba na kpaa her atô u atumba na kera;

³gayô, Me kura un akondo una hingir idyelegh una tile er sha iyange i i mar un la nahan; man Me er un una hingir er desereti nahan, Me gema un una hingir er tar u ombor yô, Me wua un sha imura.

⁴Ônov nav kpaa Me zungwe ve mhôônom ga, gadia ve mba ônov mba i mar ve sha idya yô.

⁵Gadia ngô ve er ijimba; wen u a we iyav vev la kpaa, a er kwagh u kunya; gadia a kaa er: Me za hen mba m doo ve ishima, mba ve nem kwaghyan wam man mngerem man ul man mou man mkurem man kwaghman kpaa.

⁶Nahan yô, nenge, Me yua gbenda wou sha usaa, Me maa kpekpe u yangen un sha u a̱ de kera zough a igbenda na ga yô.

⁷Tsô una tôv mba ve doo un ishima la, kpa una kohol ve ga; una ker ve, kpa una zua a ve ga; nahan una kaa er: Guda me hide hen nomom u hiihii la, gadia mlu wam hen shighe la lu guda a u hegen ne.

⁸Gadia a kera fa er i lu Mo M ne un samuyia man wain man mkurem, man M seer un azurfa man zenaria mba ve gem ve ne Baal la ga.

⁹Nahan Me hire Me ngohol samuyia Wam kera sha shighe u u, man wain Wam kpaa sha shighe na, man Me ngohol ul Wam kera kua mou Wam kpaa mba a cirin idyelegh na a mi la.

¹⁰Hegen Me pase idyelegh na ken igbar sha ishigh ki mba ve doo un ishima yô, or u yiman un sha ikev Yam kpaa, nana lu ga.

¹¹Me er msaanyol na kpaa una bee man uiniongo nav man iwer i he na man ayange a memen a na kua uiniongo nav mba i ver sha ashighe ashighe la cii.

¹²Me vihi ikon i wain na man ikon i tur na, i a kaa er: Ka injar yam i mba m doo ve ishima ve nem la; Me gema i ia hingir ikô, inyamtoho ia ya i.

¹³Me tsaha un sha ci u ayange a iniongo a Ubaal a un lu nanden ve nagh ku human doon la, man lu eren hwe sha inyarev mbi ken ato man sha asa a engem, dondon sha mbadoon un ishima la, Mo yô, M gema M hungul un, kape TER a kaa ne.

¹⁴Nahan yô, nenge, Me mee un, Me va a na ken desereti, Me ôr kwagh u pever un ishima.

¹⁵Keela Me na un ishule na i ikon i wain man Me gema pev u Akor una hingir un hunda u ishimaverenkeghen; una na mrumun keela er sha ayange a iyev nav man er sha iyange i a due ken tar u Igipiti la nahan.

¹⁶Tsô sha iyange la, kape TER A kaa ne, ú yilam wer: Nomom; ú kera yilam wer: Baal wam, ga.

¹⁷Gadia Me dugh ati a Ubaal ken zwa na kera, mayange á kera ter ati a ve ga.

¹⁸Sha iyange la Me ya ikur sha ci ve a inyamtoho man inyon i sha man akaa a kpelan iyav inya; man Me kever ada man sanker, Me bee ityav sha tar, man Me na vea tema bem bem.

¹⁹Me kange zwa a we u bunden mayange ga; een, Me kange zwa a we sha perapera, man sha ijirôron i mimi man sha erdoo man sha mhôônom ma zungwen.

²⁰Me kange zwa a we sha mimi, nahan ú fa TER.

²¹Tsô sha iyange la Me rumun, kape TER A kaa ne, Me rumun Usha, ve kpaa vea rumun tar,

²²tar ua gema á rumun samuyia man zar u wain man mkurem; ve di vea rumun Yesereel.

²³Me lôô un shin tar sha ci Wam; Me zungwe Lo-ruhama (i zungwe un mhôônom ga) Me kaa a Lo-ami (Ioravga) Mer: Ne mba ior Av. Un di una kaa er: U ngu Aôndo wam.