Read tiv Hosea 5 Bible Online

Hosea 5 - tiv bible

Hosea 5

¹Ungwa nen kwagh ne, ne upristi, man ver ishima we ya u Iserael, kegh ato, we ya u tor! Gadia á ôr ne ijir sha ci u ne hingir kwaghhônon hen Misepa, man kper u wan sha Tabor.

²Mbaahendanev time ihungwa i zan; kpa Mo Me yange ve cii.

³Mo M fa Eferaim, man Iserael kpaa ngum myer ga; gadia hegen yô, we Eferaim, u er idya, Iserael kpaa hôngor.

⁴Aeren a ve rumun u ve̱ hide hen Aôndo ve ga; gadia jijingi u idya ngu ken a ve, man ve kera fa TER kpaa ga.

⁵Ihagh i Iserael ngi nan un ibo ken igbar je; nahan Iserael man Eferaim vea nôngo gbev ken ifer ve la; Yuda kpaa una nôngo gbev a ve imôngo.

⁶Vea za a akum a iyôngo a ve man a ibua ve sha u keren TER, kpa vea zua a Na ga; A kar hen a ve kera.

⁷Ve er a TER dang; gadia ve mar ônov mba sha idya; hegen yô, uwer u he ua tim ve kera a ityar ve cii.

⁸Tôngo nen korough hen Gibea man ikpamkor kpaa ken Rama; gbire nen ivaa ken Bete-aven; mba van we ken ijime, Benyamin.

⁹Eferaim una hingir ice sha iyange i mtsaha la; ken ikwe i Iserael M pase kwagh u una va er kpee yô.

¹⁰Mbatarev mba Yuda mba er mba ve kper a ikav i ipaventar yô; Me haa iyugh Yam sha a ve er mngerem nahan.

¹¹I kighir Eferaim a ican, i cagh un sha ijirôron; gadia doo un u dondon akaagbilinigh.

¹²Nahan M hingir Eferaim er ka ivina nahan, man ya u Yuda er mhee u akuhe a hôôn nahan.

¹³Zum u Eferaim nenge angev nav man Yuda nenge ivav na yô, nahan Eferaim yem Ashiria, a tindi hen tor Yarebi, kpa a fatyô u wanger ne, shin u been ne ivav kpaa ga.

¹⁴Gadia Me hingir Eferaim er begha nahan man ya u Yuda kpaa er gumbegha nahan; Mo, een, Mo je, Me tuse, Me kar kera; Me yem a mi, ma oryiman nana lu ga.

¹⁵Me shi Me hide hen ijiir Yam, zan zan vea rumun ibo ve, vea ker ishigh Yagh; ken ican ve la vea kerem sha gbashima.