Read tiv Hosea 9 Bible Online

Hosea 9 - tiv bible

Hosea 9

¹Iserael de kera ember yagh yagh er akuraior nahan ga, gadia u er idya, u undu Aôndo wou, injar i sha idya doo u sha hanma vande u gbiren iyiav.

²Vande u gbiren iyiav man ihungwa i shoghol wain vea koso ve ga, wain u he kpaa una yina ve.

³Vea kera tema ken tar u TER ga; kpa Eferaim una hide hen Igipiti man vea ya kwaghyan u wang ga ken Ashiria.

⁴Vea kera toon iniav mbi wain sha ishigh ki TER ga, man iniav vev mbi sôngon kpaa mbia doo Un ga; mbia hingir ve er ka kwaghyan u mbazungwen ku nahan, mba vea ya mbi cii vea hôngor, gadia kwaghyan ve una lu sha ci u ijen ve tsô; una kera nyôr ken iyou i TER ga.

⁵Né er nyi sha iyange i mkohol u sha ashighe ashighe man sha iyange i iniongo i TERE?

⁶Gadia nenge, ve war mtim, nahan kpaa Igipiti una kohol ve imôngo, man Memfishi una ii ve; akaa a ve a doon a azurfa la, ukôrakondo vea ya dyako sha mi, usaa vea mende ken utenti vev.

⁷Ayange a mtsaha kuma ve, ayange a oron iyev va ve; Iserael una fa kwagh ne; profeti ka ibumeor, or u lun a jijingi ka orihundu, sha ci u mngee u ifer you man sha ci u ihom kpaa i vese yô.

⁸Orkuran u Eferaim ngu vea Aôndo wam, ka profeti; kwaghhônon u ordughuninyon ngu sha igbenda na cii, ihom kpaa ken ya u Aôndo na.

⁹Ve hôngor ayol a ve tsung je, er sha ayange a Gibea nahan; Una umbur ifer ve, Una tsaha asorabo a ve.

¹⁰M tser a Iserael er atam a kon u wain ken desereti nahan; M nenge a uter enev er atam a tsutswa a vian sha kon u tur sha m-um na u hiihii la yô; kpa ve va hen Baal-peor ve tsegha ayol a ve sha ci u kwagh u kunya la, nahan ve hingir kwagh ndôhôrshima vough er kwagh u a doo ve ishima la nahan.

¹¹Sha kwagh u Eferaim yô, icivir ve ia purugh kera er inyon nahan; ma mmar una kera lu ga, ma iyav mbu wan kpaa ga, man ma iyol i jilen kpaa ga.

¹²Shin vea yese ônov vev, nahan kpaa Me ngohol ve ônov kera, zan zan ma or nana kera shi ga; kwagh una tser ve, zum u Me pav a ve la.

¹³Eferaim er m nenge a na yô, lu er Tiru nahan, i môôr un sha ijiir i dedoo; kpa Eferaim una due a ônov nav, una va a mi hen orsôngon.

¹⁴Na ve, TERE— ka nyi U na ve? Yô, na ve iyav mbu vihin man atumba a uman sha vanger.

¹⁵Iferkwagh ve cii ngi ken Gilgal; ka keela M ker ve ihom ye; sha ci u iferkwagh i aeren a ve la Me zenda ve ken iyou Yam kera; vea kera doom ishima ga; mbatarev vev cii ka mbaahendanev je.

¹⁶I gbidye Eferaim, mise ve uma kera, vea kera ume atam ga; shin er vea mar kpaa, Me wua ônov vev mba doon ve ishima la kera.

¹⁷Aôndo wam, Una ta ve kera, sha ci u ve ver ato hen a Na ga yô, nahan vea hingir mbaazende azende ken akuraior.