Read tiv Yoel 2 Bible Online

Yoel 2 - tiv bible

Yoel 2

¹Tôngo nen korough ken Shion, gbire nen shishavaa sha icighanwo Wam; mba ve tem shin tar cii ve̱ gbidye ikarikase iyol, gadia iyange i TER ngi van, i mgbôghom je ve;

²ka iyange i ime i wan mgbigh mgbigh, iyange i abeen man angôghime, er mlu u pepe dindee nahan; ikurior i vesen man i ageegh haa sha iwo imba i i lu a vande nengen a mi ga, man á kera nenge a mi ken hemen kpaa ga, zan zan sha ikov ikov cii.

³Usu ngu hian zan ve ken hemen, ken ijime ve kpaa nomborusu ngu yeghen; tar ngu er sule u Eden nahan sha ishiv vev, ken ijime ve ka taaikôngo gbilin, ma kwagh war sha ikev ve ga.

⁴Mluashe ve bee mluashe u anyinya, bee er ka anyinyaautya nahan, kape ve nyôngoso la.

⁵Er ihuran i akekeautya nahan, kape ve tsuwen sha ityouv mbi iwoov la, bee er ka kume u nomborusu u hian toho nahan man shi er ior mba ageev mba tangen ityav nahan.

⁶Sha mve ve akuraior cii gbidye akarkase iyol; ishiv cii hingir peng.

⁷Mba yevese er anomaior a taver iyol nahan, mba unden sha kpekpe er ka ior mba utyav yô; hanmô ve ngu zan sha gbenda u nan jighilaa, ve tôndo nongo ga.

⁸Hanmô ve kpaa, mgbegha ugen ga; hanmô ve nan ngu zan sha gbenda u nan; ve kar sha ijôawange, ve kaha gbenda ga.

⁹Ve ta sha gar, ve nyôngoso sha ukpekpe; ve unde ve nyôr ken ayou, ve nyôr sha a-an a ayou er ka mbaiv yô.

¹⁰Tar tenger sha ishigh vegh, Usha gbidye ikarikase iyol; iyange man uwer wa ime, asan kpaa hide a iwanger ve ijime.

¹¹TER genger imo sha ishigh ki mbautyav Nav la, gadia ikumutya Na kehe gande; un u a eren sha imo Na la, ka u ageegh; gadia iyange i TER ka i vesen je, i cier iyol kpaa, ka an nana fatyô u hendan ishigh a ii?

¹²Shin hegen je kpaa, kape TER A kaa ne: Gema nen her a Mo a asema a en cii, a kwaghyan u hôron man mliam ashe man a ijungwen,

¹³ande nen asema a en, i̱ de kera lu akondo ga; gema nen hen TER, Aôndo wen, gadia ngu a mrumun u sha mhôôn, a mgbough a mhôônom ma zungwen, we ishima man ngu a erdoo tsung, ka A vaa afanyô sha kwagh u bo u A we ishima u eren la.

¹⁴Ka an nan fe er alaghga Una gema awashima Na, man Una undu iveren ken ijime Na— ka nagh ku sha samuyia man ku man, ku nan TER, Aôndo wen je la.

¹⁵Tôngo nen korough ken Shion, tsegha iyange i hôron kwaghyan, lôhô nen icighanmkohol;

¹⁶kohol ior, tsegha ior mba ve kohol la, kohol mbatamen, kohol mbayev kua anikundanev kpaa; orkwasehe a̱ due ken iyou na, kwase kpaa a̱ due ken kparyou na.

¹⁷Upristi, mbaerentom u TER, ve̱ vaa hen halegh u puadwer a atse a nanden nagh sha mi la, ve̱ kaa er: Tsegha ior Ou ver ve kposo TERE, de kera gbihin dyako Wou ken iheen je er akuraior aa nahan ve tar ga; ka sha ci u nyi man vea kaa ken akuraior er: Aôndo ve ngu hana?

¹⁸Tsô TER ta ikaa a tar Na, mhôônom kôr Un a ior Nav.

¹⁹TER gema kaa a ior Nav er: Nenge, M ngu tindin ne a samuyia man wain u he man mkurem, á kuma ne gbing gbing; Me kera er ne, né hingir kwagh u nahan tar hen akuraior ga.

²⁰Me kar a mba ken imbusutarimese hen a ven kera, Me zenda ve, vea yem ken tar u ombor u lun gbilin, mba ken hemen vea yem shin zegemnger u sha ityoughkitaregh la, man mba ken ijime di vea yem shin zegemnger u shin ityôtar la, ihuma ve i bo ia mough; myughul ve u dang kpaa una mough, sha ci u ve er akaa a vesen.

²¹De cie ga, tar, ember man i̱ saan we iyol, gadia TER er akaa a vesen.

²²De kera cie nen ga, ne ishôso i ken tar ne cii, gadia ajiir a yan toho a ken taaikôngo hôm ve, ikon ngi umen atam a i, kon u tur man kon u wain mba umen atam.

²³Yô, ember nen, ne ônov mba Shion, i̱ saan ne iyol ken TER, Aôndo wen, gadia ngu nan ne ortesen u una tese perapera, ngu nôôn ne ura, urahe man ura u masetyô kpaa, er ngise la nahan.

²⁴Avande a gbiren iyiav aa iv a sam; ahungwa a shoghol wain aa iv a zar u wain man a mkurem lev lev, je á haa inya.

²⁵Shi Me hide ne a anyom a ikomon i purugh agumaikomon man ikomon i oron akaa kua ikomon i tseren akaa lu ya la, ka zegeikumutya Yam i M tindi her a ven ne.

²⁶Nea ya je á kuma ne gbing gbing, né wuese iti i TER, Aôndo wen, u A er ityom i kpilighyol her a ven la; man ior Av kpaa, vea kera va ahenge mayange ga.

²⁷Nahan né fa er M lu ken atô u Iserael yô, man ka Mo M lu TER, Aôndo wen ye, ugen ngu ga; ior Av kpaa vea kera va ahenge ga.

²⁸Tsô sha ayange a masetyô la, Me haa Jijingi Wam sha uumace cii; ônov enev mba nomso man mba kasev vea ôron kwaghôron u profeti, mnyam maa cie mbatamen enev, ikaior yen ia nenge mbampase mba sha mnenge;

²⁹mbatomov mba nomso man mba kasev kpaa Me haa Jijingi wam sha a ve sha ayange la.

³⁰Me er akaa a kpilighyol sha kua shin tar kpaa, awambe man usu man zegemnyi u kôndon sha.

³¹Iyange ia gema ia hingir ime, uwer kpaa ua hingir awambe man iyange i TER i vesen i cieryol ia va ye.

³²Nahan yô, á hingir u hanma or u nan yer sha iti i TER yô, nana war; gadia sha uwo u Shion man ken Yerusalem á zua a mbawaren, er TER lu kaa yô; ka ken mbawaren mbala á zua a mba TER Una yila ve ye.