Read tiv Amoshi 2 Bible Online

Amoshi 2 - tiv bible

Amoshi 2

¹TER ngu kaan nahan er: Sha ci u atindi a peren atar a Moabi, een, sha ci u anyiin je yô, Me kera hide a mtsaha na ijime ga; gadia a nande akuhe a tor u Edom, gema hingir alie,

²nahan Me haa usu sha Moabi, ua hia ayouator a Kerioti; nahan Moabi una kpe ku sha ayôôso man mgerutya man mkaa u korough;

³Me gber orjir ken atô na kera, Me wua mbatarev nav a na imôngo cii, kape TER A kaa la.

⁴TER ngu kaan nahan er: Sha ci u atindi a peren atar a Yuda, een, sha ci u anyiin je yô, Me kera hide a mtsaha na ijime ga, gadia ve venda atindiakaa a TER, ve wa akaawan a Na iko ga, mbaaie vev na ve mtsum, mba uter vev lu zenden sha mi la;

⁵nahan Me haa usu sha Yuda, ua hia ayouator a Yerusalem.

⁶TER ngu kaan nahan er: Sha ci u atindi a peren atar a Iserael, een, sha ci u anyiin je yô, Me kera hide a mtsaha na ijime ga; gadia ve tee orperapera, ve yam azurfa, man oribanave kpaa sha kweakôvough môm;

⁷ve mba i gbe ve ishima u nengen a ihundu i inyaagh sha ityough ki mbaibanave man mba goom a gbenda u mbaasemaleghlegh; wan man ter u nan ka ve zua hen wankwase môm, sha u hôngor a icighanti Wam;

⁸ka ve yav sha akondo a ityungugh hen kpe u hanma atse a nanden nagh sha mi; ken iyou i aôndo ve, mba me wain u ior mba i ye ve zwajirigh la.

⁹Nahan kpaa ka Mo M tim Amor sha ishigh vegh, u ityaven na lu er ityaven i usedar je, man a taver agee er ikon i ouki yô; M tim atam a na sha man amise na kpaa shin inya.

¹⁰Shi Mo kpaa M due a ve ken tar u Igipiti, M hemen ve ken desereti anyom akunduahar sha u u̱ ngohol tar u Amor yô.

¹¹M gema ônov ou mbagenev ve hingir uprofeti, man mbayev ou mba ikaior mbagenev ve hingir Mbanasari. Shin kape i lu ne ga ase, ne Mbaiserael? Kape TER A kaa la.

¹²Kpa ne na Mbanasari wain er ve̱ ma; man ne ta uprofeti icin ner: De er nen kwaghôron u profeti ga.

¹³Yô, nenge, Me kighir we hen ijiir you er ikyekye i i iv a aile a uyia ka i kighir sha kwagh nahan.

¹⁴Or u wan kpaver kpaa, ayem á nunde nan, orageegh nana kera fatyô u eren kwagh sha agee a nan ga, orutaha kpaa nana kera fatyô u waren uma u nan ga;

¹⁵orkerenivaan kpaa nana kera tile ga; u nan eren kpaver shin angahar kpaa nana war ga; orhendan nyinya kpaa nana yima uma u nan ga;

¹⁶man un u a taver ishima ken mbaageev la kpaa, una yevese idyelegh sha iyange la, kape TER A kaa la.