Read tiv Amoshi 4 Bible Online

Amoshi 4 - tiv bible

Amoshi 4

¹Ungwa nen kwaghôron ne, ne ungômbaibuav mba Bashan mba ne lu sha uwo u Samaria ne, ne mba ne kighir atsanaior, ne heren mbaibanave, ne mba ne kaan a noov enev ner: Va nen a mi, se̱ ma la.

²Ter AÔNDO bum mtsegh Na, er: Nenge, ayange a en nga van a vea va kura ne kera sha utsuwe, man mba vea shi yô, á kura ve kera sha utsuwe mba ishuuv.

³Nea due sha ahura a gar, hanma or nana ver ishigh ken hemen jighilii, á gbihi ne ken Harmon, kape TER A kaa ne.

⁴Va nen hen Betel, va per nen atindi; va nen hen Gilgal va seer peren nen atindi; va nen a iniav yenev mbi sôngon hanma sev, man môm-ken-upue enev hanma iyange i sha utar.

⁵Na nen nagh ku ishughun sha kwagh u i we kwa sha mi yô, yôô nen iniav mbi nan sha ishima i dedoo, samber a mi, gadia ka kwagh u a doo ne je la, ne Mbaiserael! Kape Ter AÔNDO A kaa ne.

⁶M gema M na ne mwanger u anyiigh ken agar a tamen a en cii, man mban u kwaghyan ken ajiir a en a teman cii; nahan kpaa, ne hide her a Mo ga, kape TER A kaa ne.

⁷M shi M nyume ne ura, zum u iwer shi itiar i sunda ua kuma yô; M na ura nôô sha gar môm man sha ugen yô, M yange, u kera nôô ga; ijiir i môm i nôô ura, ijiir igen i ura nôô ker ga yô, i use.

⁸Ka nahan man agar a tamen ahar shin atar lu zan ze ze ze hen gar môm sha u za man mngerem, kpa kuma a ga; nahan kpaa, ne hide her a Mo ga, kape TER A kaa ne.

⁹M tsaha ne sha mhie u iyiav man yien; M vihi ishule yen man ikon i wain yen; ikon i tur yen man ikon i olev, ikomon ya; nahan kpaa, ne hide her a Mo ga, kape TER A kaa ne.

¹⁰M haa ne bouange, sha inja i Igipiti la; M wua ikaior yen sha sanker, M kar a anyinya a en kera; M na ihuma i ken afo a en i nyôr ken ahenga a en je; nahan kpaa, ne hide her a Mo ga, kape TER A kaa ne.

¹¹M yôhôl ne er Aôndo yôhôl Sodom man Gomora nahan, ne lu er ityôndo i i sase duen a mi ken usu yô; nahan kpaa, ne hide her a mo ga, kape TER A kaa la.

¹²Nahan yô, kape Me er a we ne, we Iserael; man er Me va er a we nahan yô, wa ago iyol sha u va kohol Aôndo wou, we Iserael.

¹³Gadia nenge Wen u A er iwo man A gbe ahumbe, man A pasen or mhen u ken ishima i nan, Wen u A gem sev mbu hingir ime, u A zenden sha ajiir a taven a sha tar la, TER, Aôndo u akum a Sha, ka iti Na je la.