Read tiv Amoshi 7 Bible Online

Amoshi 7 - tiv bible

Amoshi 7

¹Ter AÔNDO tesem nahan: yô, nenge A haa ikomon sha mhii u mhem u toho u masetyô, ka toho u u hem zum u tor vande tôndon u kera la.

²Tsô zum u ve bee u yan toho hen tar la yô, nahan m kaa mer: Tere, AÔNDO, shi de se kwaghbo; Yakob una er nan man una tilee? Gadia a ndahar.

³TER gema ishima sha kwagh la. Á kera lu nahan ga, kape TER A kaa la.

⁴Ter AÔNDO tesem nahan: yô, nenge Ter AÔNDO yila usu sha u tsahan sha u; u hia iv i zan tsung la, maa u hia tar kpaa.

⁵Nahan m kaa mer: Tere, AÔNDO, shi de; Yakob una er nan man una tilee? Gadia a ndahar.

⁶TER gema ishima sha kwagh la. Ngun kpaa una kera lu nahan ga, kape Ter AÔNDO A kaa la.

⁷A tesem nahan: yô, nenge Ter tile hen kpekpe u i maa un sha kor u sôron kwagh a min sha u a̱ lu jighilaa man lu a kor u sôron kwagh a mi sha uwegh Nagh kpaa.

⁸TER shi kaa a mo er: Amoshi, ka nyi u nenge a mini? M kaa mer: Ka kor u sôron kwagh a mi. Nahan Ter kaa er: Nenge, veren Yam kor u sôron kwagh a mi ken atô u ior Av, Iserael; kera den Yam ve je ga;

⁹ajiir a taven sha a Isaka la, aa hingir atse, man uicighanmbaajiiriv mba Iserael la kpaa, vea yôhôl; Me mough Me ta num sha ya u Yerobiam sha sanker.

¹⁰Tsô, Amashia pristi u ken Betel, tindi hen Yerobiam tor u Iserael, kaa er: Amoshi ngu zuan zwa sha a we ken atô ya u Iserael; kera doo tar u ungwan akaaôron a na la ga.

¹¹Gadia Amoshi ngu kaan nahan er: Á wua Yerobiam sha sanker je, man Iserael kpaa á kura un ken tar na kera, á yem a na uikangen je.

¹²Nahan Amashia kaa a Amoshi er: We ornengen ne, yem za yer ken tar u Yuda, ka keregh ú za ya kwaghyan shi ú ôr kwaghôron u profeti kpaa ye,

¹³kpa de kera shi er kwaghôron u profeti ken Betel ga, gadia ka icighanjiir u tor, man ka ya u tor kpaa.

¹⁴Tsô Amoshi gema kaa a Amashia er: Mo yô, m lu profeti ga, shin wan u profeti kpaa ga; kpa m lu orkuranilev man orsôron ikon i tur;

¹⁵TER tôôm pe m lu zan a ikumuile ityô la, man TER kaa a mo er: Za za ôr kwaghôron u profeti sha ior Av Iserael.

¹⁶Nahan yô, ungwa ase kwaghôron u TER, U ngu kaan wer: De kera er kwaghôron u profeti sha Iserael ga, de kera ôron kwagh sha ya u Isaka kpaa ga;

¹⁷nahan yô, TER ngu kaan nahan er: Kwase wou una hingir idyakwase ken gar, ônov ou mba nomso man mba kasev á wua ve sha sanker, sule wou kpaa á kar kwar a mi sha kor u karen kwagh a min; we iyol you kpaa ú kpe ken tar u hôngorough, Iserael kpaa á kura un ken tar na kera, á yem a na uikangen.