Read tiv Numeri 12 Bible Online

Numeri 12 - tiv bible

Numeri 12

¹Tsô Miriam kua Aron ôr kwagh u vihin sha Mose, sha ci u kwase u Kushi u a er yô; gadia a er kwase u Kushi.

²Ve kaa er: Ka Mose tsô, TER A er kwagh a na yee? Se yô, er kwagh a vese gaa? Nahan TER ungwa.

³Kpa Mose yô, lu or u ishima legh legh je zua ga, hemba hanma or sha won cii.

⁴TER maa ôr kwagh a Mose man Aron kua Miriam fese je, A kaa a ve er: Ne mba utar mban, due va nen hen tenti u kohol ker la. Tsô ve due, ve utar.

⁵Nahan TER sen ken ityôgh ki ibeenegh va tile hen hunda u tenti, yila Aron kua Miriam; ve uhar cii, ve due.

⁶A kaa er: Ungwa nen imo Yam yôô; aluer profeti a lu ken a ven yô, Mo TER Me pase iyol Yam her a na sha mpase u nengen a nenge a mi, Me ôr kwagh a na ken mnyam ma cien.

⁷Wanakiriki Wam Mose ngu nahan ga; un ka or u jighjigh ken ya Wam cii;

⁸M er kwagh a na sha zwa wanger wanger je, ka lun kwaghôron u cimin ga, nengen mlu u TER er A lu yô; man ka nyi ne cie u ôron kwaghvihin sha wanakiriki Wam, Mose ga?

⁹Nahan ishima nyoon TER a ve tsung; A mough, A yem.

¹⁰Ibeenegh ki moughon sha tenti kera yô, Miriam gba imande, hingir pung er senou yô; Aron gema kenger Miriam yô, a kav un a imande iyol.

¹¹Nahan Aron kaa a Mose er: Ahii! Tere, de ne se ibo ga, er se bum se er isholibo nahan kpaa.

¹²De deen un a̱ hingir er wan u i mar un kpenegh, a dugh a hee vegher môm ze he!

¹³Tsô Mose vaa a TER, a kaa er: Aôndo ma U shi wanger un.

¹⁴Tsô TER kaa a Mose er: Aluer ter na una te un ijer sha ishi tseegh kpaa, ma a hee ayange ataankarahar gaa? I̱ wuhe un ken akôngoafogh ayange ataankarahar; ken masetyô yô, i̱ shi i̱ nyôr a na.

¹⁵Nahan i wuhe Miriam ken akôngoafogh ayange ataankarahar; ior ve kera hembe ve yem er i lu a nyôr a Miriam ga la ga.

¹⁶Ken masetyô la, ior hembe yem hen Haseroti, ve za haa afo ken desereti u Paran.