Read tiv Numeri 13 Bible Online

Numeri 13 - tiv bible

Numeri 13

¹TER shi ôr kwagh a Mose kaa er:

²Tindi ior ve̱ za nenge mker ken tar u Kanaan u M lu nan Mbaiserael la; tsuwa or ken hanma kwe u uter vev, ve cii ve̱ lu mbahemenev.

³Tsô Mose tindi ve, ve mough hen desereti u Paran sha imo i TER; ve cii ve lu mbahemenev ken Mbaiserael.

⁴Ka ati a ve ne: Or u ken kwe u Ruben yô, lu Samua wan u Sakur.

⁵U ken kwe u Shimeon yô, lu Shafati wan u Hori.

⁶U ken kwe u Yuda yô, lu Kalebu wan u Yefune.

⁷U ken kwe u Isakar yô, lu Igal wan u Yosev.

⁸U ken kwe u Eferaim yô, lu Hosea wan u Nun.

⁹U ken kwe u Benyamin yô, lu Palti wan u Rafu.

¹⁰U ken kwe u Sebulon yô, lu Gadiel wan u Sodi.

¹¹U ken kwe u Yosev yô ken kwe u Manase lu Gadi wan u Sushi.

¹²U ken kwe u Dan yô, lu Amiel wan u Gemali.

¹³U ken kwe u Asher yô, lu Setur wan u Mikael.

¹⁴U ken kwe u Nafetali yô, lu Nagebi wan u Wofeshi.

¹⁵U ken kwe u Gadi yô, lu Gehuel wan u Maki.

¹⁶Angan ka ati a ior mba Mose tindi sha u ve̱ za nenge tar la mker je ne. Man Mose ii Hosea wan u Nun iti er Yosua.

¹⁷Tsô Mose tindi ve er ve̱ za nenge tar u Kanaan mker. A kaa a ve er: Kôndo nen sha gbenda u Imbusutariyan ne, unde nen sha iwo,

¹⁸nenge nen tar la er u lu yô, kua ior mba ve tem kimi, shin ka mba taverou, shin ka aseeraiorou, shin mba kpegheou, shin mba kpishiou;

¹⁹man injatar i ve tem ker la, shin ka u dedoou, shin ka u dedoo gaou; man anzaagar a ve tem ken a la, shin a lu ken afoou, shin a lu ken ugilgarou;

²⁰man inya la, shin ka i doon iyiaghou, shin ka i doon iyiagh gaou, shin ikon ngi kereghou, shin ngi gaou. Taver nen ishima va nen a atam a ken tar la; shighe la lu shighe u atam a wain a tsutswa lu vian yô.

²¹Tsô ve kôndo, ve gba nengen tar la mker, ve hii hen desereti u Zen zan zan ve va ar hen Rehobi hen gbenda u karen zan Hamati la.

²²Ve kôndo sha Imbusutariyan la, ve va nyôr sha Heberon; Ahiman man Sesai man Talmai, ônov mba Anaki lu ker. Er i maa Heberon yô, anyom kar ataankarahar man i mase maan Soan ken Igipiti ye.

²³Tsô ve va hen pev u Esekol, ve gber gbaa u wain a sumegh sha mi, ve har ku sha aga, ior ihiar tôô; shi ve va a atam a pomegraneti kua a tur kpaa.

²⁴I ii ijiir la iti er Pev u Esekol sha ci u sumegh ku Mbaiserael gber her la.

²⁵Tsô ayange nga kar akunduahar yô, ve hide mker u za nengen tar la.

²⁶Ve za va hen Mose man Aron man hen ior i Mbaiserael cii, hen desereti u Paran hen Kadeshi; ve va ôr ve kwagh kua ior cii, ve tese ve atam a ikon a ken tar la kpaa.

²⁷Ve ôr un er: Se za ken tar u u tindi se la, mimi je, atumbabua dumbur ken u man iyough; ka atam a ikon a ker je ne.

²⁸Kpa mba ve tem ken tar la, ka ior mba ageev, agar kpaa i maa a gir, a kehe kpishi, shi se nenge a ônov mba Anaki ker kpaa.

²⁹Mbaamaleki tema ken tar u Imbusutariyan la; Mbahiti man Mbayebushi kua Mbaamor gema tema sha iwo; Mbakanaan gema haa vegher u shin zegemnger man hen kpe u Yordan.

³⁰Kpa Kalebu yange ior sha ishigh ki Mose a kaa er: Kpa sé za nen, sé za ngohol nen u; gadia se fatyô u hemban u dedoo.

³¹Kpa ior mba ve za a na imôngo la, ve kaa er: Se fatyô u nôngon ityav a ior mbala ga, gadia ve hemba se agee.

³²Shi ve ôr Mbaiserael akaavihin a sha kwagh u tar u ve za nenge u mker la, ve kaa er: Tar u se za u za nengen u mker la ka tar u u timin mba ve tem ken u yô; ior mba se nenge a ve ker cii ka ugôgômbaiorov je.

³³Se nenge mbagbanakôr ker, ônov mba Anaki, tsombor u mbagbanakôr; se gema se nenge ayol ase yô, se lu er mbaahungwa nahan, kape ve kpaa ve lu nengen se je la.