Read tiv Numeri 2 Bible Online

Numeri 2 - tiv bible

Numeri 2

¹TER ôr kwagh a Mose man Aron kaa er:

²Mbaiserael ve̱ haa afo, hanma or hen tuta u nan, hen akav a sha uya mba uter vev; ve̱ haa afo, ve̱ kase tenti u kohol ker la, ve̱ de sôsom a na yum ga.

³Mba vea haa afo vegher u sha ityoughkitaregh, sha pe iyange i dugh la yô, ka: Tuta u hen afo a Yuda, sha akum a ve; orhemenegh u ônov mba Yuda yô, lu Nakeson wan u Aminadabi.

⁴Ikum na la, mba i ôr iyenge ve yô, lu ior dubu akunduatargber kar unyiin man deri ataratar.

⁵Mba vea haa afo á dondo a na yô, i̱ lu kwe u Isakar; orhemenegh u ônov mba Isakar yô, lu Netanel wan u Suar;

⁶ikum na la, mba i ôr iyenge ve yô, lu ior dubu akunduahargber kar unyiin man deri unyiin.

⁷Man shi kwe u Sebulon; orhemenegh u ônov mba Sebulon yô, lu Eliabi wan u Helon;

⁸ikum na la, mba i ôr iyenge ve yô, lu ior dubu akunduahargber kar utaankaruhar man deri unyiin.

⁹Mba hen afo a Yuda cii, mba i ôr iyenge ve yô, lu ior dubu deri man akunduanyiin kar ataratar man deri unyiin, sha akum a ve. Ka ve vea hiin moughon ye.

¹⁰Tuta u afo a Ruben, sha akum a ve, u̱ lu ken vegher u imbusutariyan la; orhemenegh u ônov mba Ruben yô, lu Elisur wan u Sedeur;

¹¹ikum na la, mba i ôr iyenge ve yô, lu ior dubu akunduahar kar ataratar man deri utaan.

¹²Mba vea haa afo á dondo a na yô, i̱ lu kwe u Shimeon; orhemenegh u ônov mba Shimeon yô, lu Selumiel wan u Surisadai;

¹³ikum na la, mba i ôr iyenge ve yô, ve lu ior dubu akunduahargber kar utaankarunyiin man deri utar.

¹⁴Man shi kwe u Gadi; orhemenegh u ônov mba Gadi yô, lu Eliasav wan u Reuel;

¹⁵ikum na la, mba i ôr iyenge ve yô, lu ior dubu akunduahar kar utaan man deri ataratar man akunduahargber.

¹⁶Mba hen afo a Ruben cii, mba i ôr iyenge ve yô, lu ior dubu deri môm man dubu akunduahargber kar môm man deri unyiin man akunduahargber, sha akum a ve. Ka ve vea dondo ye.

¹⁷Tsô tenti u kohol ker la una mough, afo a Mbalevi a̱ lu hen atô u afo agen; er ve hee la, kape ve̱ moughon kpaa la, hanma or sha ijiir i nan, hen tuta ve.

¹⁸Tuta u afo a Eferaim, sha akum a ve, u̱ lu ken vegher u shin ityôtar la; orhemenegh u ônov mba Eferaim yô, lu Elishama wan u Amihudi;

¹⁹ikum na la mba i ôr iyenge ve yô, lu ior dubu akunduahar man deri utaan.

²⁰Mba vea haa afo á dondon sha a na yô, i̱ lu kwe u Manase; orhemenegh u ônov mba Manase yô, lu Gamaliel wan u Pedasur;

²¹ikum na la, mba i ôr iyenge ve yô, lu ior dubu ikundugber kar uhar man deri uhar.

²²Man kwe u Benyamin; orhemenegh u ônov mba Benyamin yô, lu Abidan, wan u Gideoni;

²³ikum na la, mba i ôr iyenge ve yô, lu ior dubu ikundugber kar utaan man deri unyiin.

²⁴Mba hen afo a Eferaim cii, mba i ôr iyenge ve yô, lu ior dubu deri kar anigheni man deri môm, sha akum a ve. Ve, ka nongo u sha utar sha mmough ve.

²⁵Tuta u afo a Dan, sha akum a ve, u̱ lu ken vegher u imbusutarimese; orhemenegh u ônov mba Dan yô, lu Ahieser, wan u Amisadai;

²⁶ikum na la, mba i ôr iyenge ve yô, lu ior dubu akunduatar kar uhar man deri utaankaruhar.

²⁷Mba vea haa afo á dondo a na yô, i̱ lu kwe u Asher; orhemenegh u ônov mba Asher yô, lu Pagiel wan u Okeran;

²⁸ikum na la, mba i ôr iyenge ve yô, lu ior dubu akunduahar kar môm man deri utaan.

²⁹Man shi kwe u Nafetali; orhemenegh u ônov mba Nafetali yô, lu Ahira wan u Enan;

³⁰ikum na la, mba i ôr iyenge ve yô, lu ior dubu akunduahargber kar utar man deri unyiin.

³¹Mba hen afo a Dan cii, mba i ôr iyenge ve lu ior dubu deri kar akunduahargber kar utaankaruhar man deri ataratar. Ka ve ve lu mba masen moughon sha tuta ve ye.

³²Ka Mbaiserael mba i ôr iyenge ve sha uya mba uter vev je ne; mba ken afo, sha akum a ve cii mba i ôr iyenge ve yô, lu ior dubu deri ataratar, dubu kar utar man deri utaan man akunduahargber.

³³Kpa i ôr iyenge i Mbalevi i wa i ken Mbaiserael ga, er TER kaa Mose nahan.

³⁴Mbaiserael er er TER kaa Mose nahan cii, kape ve haan afo hen tuta ve la, shi kape ve moughon kpaa la, hanma or hen ipaven u nan, sha uya mba uter vev.