Read tiv Numeri 24 Bible Online

Numeri 24 - tiv bible

Numeri 24

¹Zum u Balaam nenge lu TER pe veren Iserael doo doo yô, a kera due a ker uivande er sha ashighe agen la nahan ga, kpa a ver ishigh nagh vegher u shin desereti.

²Tsô Balaam kende ashe sha, a nenge Iserael haa afo sha ikwe ikwe, tsô Jijingi u TER gba sha a na.

³A tôô injakwagh na, a kaa er: Mpase u Balaam wan u Beor, mpase u or u bughun ashe,

⁴mpase u or u ungwan akaaôron a Aôndo, u a nengen mpase u Uhembanagee, u a gbe inya, ashe a na a lu ivegher la.

⁵Utenti ou doo je, Yakob; ka ajiir a teman a ou la, Iserael!

⁶Er apev a a lu geghekeke nahan; er ishule hen kpeifi; er ikon i alou i TER A môôr; er ikon i sedar i hen kpemnger yô.

⁷Mngerem maa kuwan shin ubaketi nav, ivor na ia lu hen pe mngerem ma ngee yô; tor na una hemba Agagu, á kende a tartor na sha.

⁸Aôndo u A dugh a na ken Igipiti, ngu un er ikoryaregh nahan; Una ya akuraior a a lu ihom a na yô, Una hembe akuhe a ve avur avur, Una ta ve avaan a na tsula.

⁹A gure a yav inya er begha nahan, man er ngôbegha nahan; ka an je nana num unu? Hanma or u nan ver u doo doo yô, á ver nan doo doo. Hanma or u nan we u ifan yô, á wa nan di ifan je.

¹⁰Tsô ishima vihi Balaki a Balaam, a gbire ave; Balaki kpaa kaa a Balaam er: M yila u mer, va wam mbaihomov av ifan, man nenge u gem u veren ve a ver doo doo, ka acin atar je ne.

¹¹Yô, mough yem ken ya wou; m fa mer me civir we kpishi je, kpa nenge, TER bunde u icivir ve.

¹²Balaam kaa a Balaki er: Mo kpaa, iyange m kaa a mbatyomov ou mba u tindi hen a mo la mer:

¹³Shin Balaki una nam ya na a azurfa man zenaria ker poo kpaa, me fatyô u karen imo i TER, eren ma kwagh sha ishima yam ga, shin a lu u doon shin a lu u bo kpaa; kwagh u TER A kaa la, ka un me kaa ye gaa?

¹⁴Hegen yô, yemen yam hen ior av; va m̱ pase u kwagh u ikurior ne ia va er a ior ou sha ayange a masetyô yô.

¹⁵Tsô a tôô injakwagh na, a kaa er: Mpase u Balaam wan u Beor, mpase u or u bughun ashe,

¹⁶mpase u or u ungwan akaaôron a Aôndo, u a fe kwaghfan u Uhembanagee, u a nengen mpase u Uhembanagee, u a gbe inya, ashe a na a lu ivegher la.

¹⁷M nenge a na, kpa ka hegen ga; m ta ashe m nenge a na, kpa ka ikua ga; ishan ia due ken Yakob, tôgh ku torough kua lu hen Iserael, una hembe a-ase a Moabi, una zôhô ônov mba Setu.

¹⁸Edom una hingir sha ikev i orgen; Seir kpaa, una hingir sha ikev i orgen, ve mba ve lu mbaihomov nav la; kpa Iserael yô una hemban a hemba her,

¹⁹una tema ken Yakob una kuran tar, una tim mba ve shi ken gar kera.

²⁰A nenge a Amaleki, tsô a tôô injakwagh na, a kaa er: Akuraior cii, ka Amaleki a lu u hiihii ye; kpa mkur na yô, á lu mtim.

²¹A nenge a Mbakeni, tsô a tôô injakwagh na, a kaa er: Ijiir you i teman ngi taveraa, i wa u iya ken vande;

²²nahan kpaa, á tim Kain kera, mase shin nan, man Ashur una yem a we uikangena?

²³A shi a tôô injakwagh na, a kaa er: Wu! Ka an je nana lu uma zum u Aôndo Una va er kwagh laa?

²⁴Kpa utso vea due ken Kitim, vea er Ashur ican, shi vea er Eber ican; un di kpaa una tim.

²⁵Tsô Balaam mough, yem, hire hen ya na; Balaki di yem a nagh.