Read tiv Numeri 27 Bible Online

Numeri 27 - tiv bible

Numeri 27

¹Tsô ônov mba kasev mba Selofehadi, wan u Hefer, wan u Gileadi, wan u Makir, wan u Manase, ken uipaven mba Manase wan u Yosev, ve za va; ati a ônov nav mba kasev mbala er: Mahela man Noa man Hogela man Milka kua Tirsa.

²Ve tile sha ishigh ki Mose man pristi Eleasar man sha ishigh ki mbahemenev man ior cii, hen hunda u tenti u kohol ker la, ve kaa er:

³TER wase kpe ken desereti, man un yô, nyôr nongo a ior mba ve hingir ayongo a TER la ga, ka ior mba Koraki je la, kpa a kpe sha isholibo na iyol na, wannomso kpaa lu a mi ga.

⁴Inja na nan iti i ter wase i̱ gba saan ken nongo na kera, sha ci u a lu a wannomso ga nahana? Yô, na se dyako a anngôôv mba ter wase mba nomso imôngo.

⁵Tsô Mose va a kwagh ve la hen TER.

⁶TER ôr kwagh a Mose, kaa er:

⁷Ônov mba kasev mba Selofehadi kaa sha mi, na ve kwar a anngôôv mba ter ve imôngo kpee; gema dyako u ter ve la na ve.

⁸Ôr kwagh a Mbaiserael, kaa a ve wer: Aluer or á kpe man nana lu a wannomso ga yô, i̱ gema dyako u nan i̱ na wan u nan u kwase.

⁹Aluer nana lu a wan u kwase ga yô, i̱ gema dyako u nan i̱ na anngôôv mba nan mba nomso.

¹⁰Man aluer nana lu a anngôôv mba nomso ga yô, i̱ gema dyako u nan i̱ na anngôôv mba ter u nan.

¹¹Man aluer ter u nan una lu a anngôôv ga yô, i̱ gema dyako u nan i̱ na anmgbian u a dondo a nan ken nongo u nan la, a̱ ya; kwagh ne a̱ hingir Mbaiserael tindi, ve̱ eren nahan, er TER A kaa Mose nahan.

¹²Tsô TER kaa a Mose er: Unde sha uwo u Abarim ne, ta ashe nenge tar u M ne Mbaiserael la.

¹³Zum u ú nenge a u yô, we kpaa ú za kohol ior ou, er anngôu Aron a za kohol mba nav nahan;

¹⁴sha ci u ne hemba ato sha kwaghôron Wam ken desereti u Zin, zum u ior hingir ayôôso la, ne kera tsegham hen mnger sha ashe ve ga yô. Ka mngerem ma Meriba hen Kadeshi ken desereti u Zin je la.

¹⁵Tsô Mose ôr kwagh a TER, A kaa er:

¹⁶TER, Aôndo u ujijingi mba uuma cii, A̱ ver ior mban or

¹⁷u nana hemen ve u duen man nana hemen ve u nyôron, nana duen ve̱ man nana hiden a ve, sha er ior i̱ de hingir er ilev mbi mbi lu a orkuran ga ze.

¹⁸Tsô TER kaa a Mose er: Va a Yosua wan u Nun, or u Jijingi A lu ken a na la, penda uwegh sha a na,

¹⁹ver un sha ishigh ki pristi Eleasar kua sha ishigh ki ior cii, na un tom ne sha ishiv vev je.

²⁰Pande icivir you na un, ior i Mbaiserael cii ve̱ wa iko.

²¹Ka sha ishigh ki pristi Eleasar una tilen er a pinen ipasen i Urim sha ishigh ki TER sha ci na ye; ka sha imo na vea duen ye, shi ka sha imo na kpaa vea nyôron ye, un a Mbaiserael cii a na imôngo, ka ior cii je la

²²Tsô Mose er er TER kaa un nahan; a va a Yosua a va ver un sha ishigh ki pristi Eleasar man sha ishigh ki ior cii;

²³tsô a penda un ave, a ver un sha tom, er TER kaa Mose nahan.