Read tiv Numeri 28 Bible Online

Numeri 28 - tiv bible

Numeri 28

¹TER ôr kwagh a Mose, A kaa er:

²Kaa ônov mba Iserael wer: Ver nen asema, nam nen nagh Agh, kwaghyan Wam, sha ci u iniav Yav mbi usuv mbi humandoon la, sha ashighe a i ver yô.

³Kaa a ve wer: Nagh ku usugh ku né naan TER yô, i̱ luun agumaiyôngo a a kom inyom i môm i môm, a a lu a ihogholough iyol ga yô, ahar ahar sha hanma iyange cii, sha ci u nagh ku nanden gbem ku bunden ga la.

⁴Gumiyôngo u môm ú na pepe, ugen la ú na aikighe.

⁵Man mwem ma kengese ma ma kom môm-ken-upue u efa, sha ci u nagh ku sha samuyia, ma i nongo mkurem ma kumen a kume sha mi yô, ma ma kom môm-ken-unyiin u hin yô.

⁶Ka nagh ku nanden gbem ku bunden ga, ku i hii nan ku hen uwo u Senai er ku lu ihuma i dedoo la; ka nagh ku usugh ku nan TER.

⁷Nagh ku man ku á magh sha mi yô, ku kuma môm-ken-unyiin u hin sha ci u hanma gumiyôngo; ka ken icighanjiir je ú toon TER nagh ku man ku kwaghman u taver la, hen inya ye.

⁸Gumiyôngo ugen la yô, ú na nagh a mi aikighe; er u ne nagh ku sha samuyia ku pepe man nagh ku man ku i magh sha mi la nahan, kape ú naan kun kpaa la; ka nagh ku usugh ku human doon TER.

⁹Sha iyange i memen yô, i̱ lu agumaiyôngo ahar a a kom inyom i môm i môm, a a lu a ihogholough iyol ga yô, man mwem ma kengese ma ma kom uikaren uhar-ken-upue u efa sha ci u nagh ku sha samuyia, ma i nongo mkurem sha mi yô, kua nagh ku man ku maghen sha mi kpaa;

¹⁰ka nagh ku nanden ku sha hanma iyange i memen je ne, man shi nagh ku nanden ku gbem ku bunden ga la, kua nagh ku man ku maghen sha mi.

¹¹Sha mhii u hanma uwer wen yô, naan nen TER nagh ku nanden, agumabua ahar man nomiyôngo môm man agumaiyôngo ataankarahar a a kom inyom i môm i môm, a a lu a ihogholough iyol ga yô,

¹²man mwem ma kengese ma ma kom uikaren utar-ken-upue sha ci u nagh ku sha samuyia, ma i nongo mkurem sha mi yô, sha ci u hanma gumbua; man mwem ma kengese ma ma kom uikaren uhar-ken-upue sha ci u nagh ku sha samuyia, ma i nongo mkurem sha mi yô, sha ci u nomiyôngo u môm la;

¹³man mwem ma kengese, ma ma kom ikaren môm-ken-upue ma i nongo mkurem sha mi yô, sha ci u nagh ku sha samuyia, sha hanma gumiyôngo; ka nagh ku nanden ku humandoon, shi ka nagh ku usugh ku nan TER kpaa je la.

¹⁴Iniav mbi man mbi á magh sha mi yô, mbi̱ lu wain, a̱ kuma vegher u hin sha nombua, man môm-ken-utar u hin sha nomiyôngo, man môm-ken-unyiin u hin sha gumiyôngo; ka nagh ku nanden ku sha iwer iwer, sha iwer i inyom la cii je la.

¹⁵Man kpev môm sha ci u nagh ku isholibo ku nan TER; i̱ na ku a nagh ku nanden ku gbem la imôngo kua nagh ku man ku maghen sha mi la.

¹⁶Uwer u hiihii, sha ayange a u pue kar unyiin la, ka Paseka u TER.

¹⁷Uwer ne sha ayange a u pue kar ataan la, i̱ er iniongo i yan bredi u i we kwa sha mi ga yô, ayange ataankarahar.

¹⁸Sha iyange i hiihii la, i̱ er icighanmkohol; de eren nen ma tom u ican ga;

¹⁹na nen TER nagh ku usugh, ka nagh ku nanden je la, sha agumabua ahar man nomiyôngo môm man agumaiyôngo ataankarahar a a kom inyom i môm i môm yô, a a lu ne a ihogholough iyol ga yô;

²⁰man nagh ku sha samuyia ku maghen sha mi, mwem ma kengese ma i nongo mkurem sha mi yô, na nen uikaren utar-ken-upue sha nombua, man uikaren uhar-ken-upue sha nomiyôngo;

²¹na ikaren môm-ken-upue sha hanma gumiyôngo sha agumaiyôngo ataankarahar la cii;

²²man kpev môm sha ci u nagh ku isholibo, sha u nan iwom sha ci wen.

²³Na nen mbin cii a nagh ku nanden ku pepe ku ku lu nagh ku nanden ku gbem la imôngo.

²⁴Ka gbenda u naan nen nagh a mi ayange ayange ne, zan zan ayange ataankarahar la cii, i̱ lu kwaghyan u nagh ku usugh ku humandoon TER, i̱ na ku a nagh ku nanden ku gbem la imôngo kua nagh ku man ku maghen sha mi la kpaa.

²⁵Sha iyange i ataankarahar la, er nen icighanmkohol, de eren nen ma tom u ican ga.

²⁶Man shi sha iyange i iyiagh ki tsutswagh zum u ne na TER nagh ku sha samuyia ku hegh sha iniongo yen i ulahadi la yô, er nen icighanmkohol, de eren nen ma tom u ican ga,

²⁷kpa na nen TER nagh ku nanden ku human doon sha agumabua ahar man nomiyôngo môm man agumaiyôngo ataankarahar a a kom inyom i môm i môm yô;

²⁸man nagh ku sha samuyia ku maghen sha mi, mwem ma kengese ma i nongo mkurem sha mi yô, ma ma kom uikaren utar-ken-upue, sha hanma gumbua man uikaren uhar-ken-upue sha nomiyôngo môm la,

²⁹man ikaren môm-ken-upue sha hanma gumiyôngo, sha agumaiyôngo ataankarahar la cii;

³⁰man kpev môm sha u nan iwom sha ci wen.

³¹Naan nen mbi a nagh ku nanden ku gbem kua nagh ku sha samuyia ku maghen sha mi la imôngo, i̱ lu mbi mbi lu ne a ihogholough iyol ga yô, kua iniav mbi man mbi maghen sha mi la kpaa.