Read tiv Numeri 29 Bible Online

Numeri 29 - tiv bible

Numeri 29

¹Uwer u sha utaankaruhar, sha iyange i hiihii i u la, er nen icighanmkohol, de eren nen ma tom u ican ga, i̱ lu ne iyange i tôngon ikor.

²Na nen TER nagh ku nanden ku humandoon sha gumbua môm man nomiyôngo môm man agumaiyôngo ataankarahar a a kom inyom i môm i môm, a a lu a ihogholough iyol ga yô;

³man nagh ku sha samuyia ku maghen sha mi, mwem ma kengese, ma i nongo mkurem sha mi yô, ma ma kom uikaren utar-ken-upue sha nombua, man uikaren uhar-ken-upue sha nomiyôngo,

⁴man ikaren môm-ken-upue sha hanma gumiyôngo, sha agumaiyôngo ataankarahar la cii,

⁵man kpev môm sha ci u nagh ku isholibo, sha u nan iwom sha ci wen,

⁶a nagh ku nanden ku sha mdugh u uweregh kua nagh ku sha samuyia ku maghen sha mi la imôngo, man nagh ku nanden ku gbem kua nagh ku sha samuyia ku maghen sha mi la, man iniav mbi man mbi maghen sha mi, sha tindi u mbi, i̱ lu kwagh u human doon; ka nagh ku usugh ku nan TER.

⁷Uwer u sha utaankaruhar ne, sha ayange a u pue la, er nen icighanmkohol, ule nen, hanma injatom kpaa de eren nen ga;

⁸kpa na nen TER nagh ku nanden ku humandoon, gumbua môm man nomiyôngo môm man agumaiyôngo ataankarahar a a kom inyom i môm i môm, a a lu ne a ihogholough iyol ga yô;

⁹man nagh ku sha samuyia ku maghen sha mi, mwem ma kengese ma i nongo mkurem sha mi yô, ma ma kom uikaren utar-ken-upue sha nomiyôngo môm la,

¹⁰ikaren môm-ken-upue sha hanma gumiyôngo sha agumaiyôngo ataankarahar la cii,

¹¹kpev môm sha ci u nagh ku isholibo, kua nagh ku isholibo ku nan iwom mi, man nagh ku nanden ku gbem, man nagh ku sha samuyia ku maghen sha mi, kua iniav mbi man mbi maghen sha mi kpaa.

¹²Uwer u sha utaankaruhar sha ayange a u pue kar ataan la, er nen icighanmkohol de eren nen ma tom u ican ga, er nen iniongo i TER, ayange ataankarahar;

¹³na nen TER nagh ku nanden, ka nagh ku usugh ku humandoon, sha agumabua pue kar atar man anomaiyôngo ahar, man agumaiyôngo pue kar anyiin a a kom inyom i môm i môm, a a lu a ihogholough iyol ga yô,

¹⁴a nagh ku sha samuyia ku maghen sha mi, mwem ma kengese ma i nongo mkurem sha mi yô, ma ma kom uikaren utar-ken-upue sha hanma gumbua, sha agumabua pue kar atar la cii; uikaren uhar-ken-upue sha hanma nomiyôngo sha anomaiyôngo ahar la cii;

¹⁵man ikaren môm-ken-upue sha hanma gumiyôngo, sha agumaiyôngo a pue kar anyiin la cii,

¹⁶kpev môm sha ci u nagh ku isholibo, kua nagh ku nanden ku gbem la, man nagh ku sha samuyia ku maghen sha mi, kua nagh ku man ku maghen sha mi kpaa.

¹⁷Sha iyange i sha uhar la na nen agumabua pue kar ahar man anomaiyôngo ahar kua agumaiyôngo pue kar anyiin a a kom inyom i môm i môm, a a lu a ihogholough iyol ga yô,

¹⁸a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo la, sha iyenge i a sha tindi;

¹⁹kpev môm sha ci u nagh ku isholibo, kua nagh ku nanden ku gbem la, man nagh ku sha samuyia ku maghen sha mi, kua iniav mbi man mbi maghen sha mi.

²⁰Sha iyange i sha utar la anomabua pue kar môm, anomaiyôngo ahar, agumaiyôngo pue kar anyiin a a kom inyom i môm i môm a a lu a ihogholough iyol ga yô,

²¹a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo la, sha iyenge i a, sha tindi;

²²man kpev môm sha ci u nagh ku isholibo kua nagh ku nanden ku gbem la man nagh ku sha samuyia ku maghen sha mi, kua nagh ku man ku maghen sha mi kpaa.

²³Sha iyange i sha unyiin la anomabua pue, anomaiyôngo ahar, agumaiyôngo pue kar anyiin a a kom inyom i môm i môm a a lu a ihogholough iyol ga yô,

²⁴a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo, sha iyenge i a sha tindi;

²⁵man kpev môm sha ci u nagh ku isholibo, kua nagh ku nanden ku gbem la, man nagh ku sha samuyia ku maghen sha mi kua nagh ku man ku maghen sha mi.

²⁶Sha iyange i sha utaan la, anomabua ataankaranyiin, anomaiyôngo ahar, agumaiyôngo pue kar anyiin a a kom inyom i môm i môm a a lu a ihogholough iyol ga yô,

²⁷a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo, sha iyenge i a sha tindi;

²⁸man kpev môm sha ci u nagh ku isholibo, kua nagh ku nanden ku gbem la man nagh ku sha samuyia ku maghen sha mi kua nagh ku man ku maghen sha mi kpaa.

²⁹Sha iyange i sha ataratar la, anomabua anigheni, anomaiyôngo ahar, agumaiyôngo pue kar anyiin a a kom inyom i môm i môm a a lu a ihogholough iyol ga yô,

³⁰a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo, sha iyenge i a sha tindi;

³¹man kpev môm sha ci u nagh ku isholibo, kua nagh ku nanden ku gbem la man nagh ku sha samuyia ku maghen sha mi kua nagh ku man ku maghen sha mi kpaa.

³²Sha iyange i sha utaankaruhar la, anomabua ataankarahar, anomaiyôngo ahar, agumaiyôngo pue kar anyiin a a kom inyom i môm i môm a a lu a ihogholough iyol ga yô,

³³a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo, sha iyenge i a sha tindi;

³⁴man kpev môm sha ci u nagh ku isholibo, kua nagh ku nanden ku gbem la, man nagh ku sha samuyia ku maghen sha mi kua nagh ku man ku maghen sha mi kpaa.

³⁵Sha iyange i sha anigheni la, er nen icighanmkohol de eren nen ma tom u ican ga,

³⁶kpa na nen TER nagh ku nanden, ka nagh ku usugh ku humandoon, sha nombua môm man nomiyôngo môm man agumaiyôngo ataankarahar a a kom inyom i môm i môm a a lu a ihogholough iyol ga yô,

³⁷a nagh vegh ku sha samuyia ku maghen sha mi man iniav mbi man mbi maghen sha mi, sha nombua man nomiyôngo man agumaiyôngo, sha iyenge i a sha tindi;

³⁸man kpev môm sha ci u nagh ku isholibo kua nagh ku nanden ku gbem la man nagh ku sha samuyia ku maghen sha mi kua nagh ku man ku maghen sha mi kpaa.

³⁹Naan nen TER mbin, sha uiniongo enev mba i ver sha ashighe ashighe la, kua uiceghzwa enev man iniav yenev mbi sha ishima i dedoo kpaa, i̱ lu iniav yenev mbi nanden man iniav yenev mbi sha samuyia man iniav yenev mbi man, man iniav yenev mbi bem.

⁴⁰Tsô Mose ôr ônov mba Iserael kwagh u TER kaa Mose la cii.