Read tiv Numeri 31 Bible Online

Numeri 31 - tiv bible

Numeri 31

²Or Mbaiserael iyev sha Mbamidian; ken masetyô yô, ú za kohol ior ou.

³Tsô Mose ôr kwagh a ior, a kaa er: Pande nen ior ken a ven, na nen ve ikav mbi utyav ve̱ za nôngo ityav a Midian, ve̱ za kure iyevoron i TER sha Midian.

⁴Hanma kwe u ken ikwe i Iserael cii, tsuwa nen ior ker dubu, tindi nen ve ken utya.

⁵Nahan i tsuwa ior ken udubu dubu mba Iserael, hanma kwe na ior dubu môm; tsô ior dubu pue kar uhar wa iyol sha utya je.

⁶Nahan Mose tindi ve hen utya, ken hanma kwe ior lu dubu môm kua Pinehashi wan u pristi Eleasar a ikav mbi icighanjiir man ukakaki mba yôôn kwagh a min.

⁷Tsô ve nôngo ityav a Midian er TER kaa Mose nahan; ve wua nomsombaiorov cii.

⁸Ve wua utor mba Midian a mba ve wua la imôngo, ka Evi man Rekem man Sur man Hur kua Reba, utor mba Midian utaan; shi ve wua Balaam wan u Beor la kpaa, sha sanker.

⁹Tsô Mbaiserael kôr kasev mba Midian kua mbayev mba kiriki; ibua ve cii man akumauile ve cii kua inyarev vev cii, ve ya ishar sha mi.

¹⁰Man agar a ve cii, a ve tema yô, kua afo a ve cii, ve nande sha usu.

¹¹Ve tôô akaa a ve kura ken utya cii man ishar cii, ior kua uzendenya.

¹²Ve va a mbakwarev man ishar kua akaa a ve kura ken utya la hen Mose man hen pristi Eleasar man hen ior i Mbaiserael cii hen afo hen ukpuunkpuun mba Moabi, hen kpe u Yordan tiôn u hen Yeriko la.

¹³Tsô Mose man pristi Eleasar man mbahemenev mba ior la cii, ve za sha u za keghen ve gbenda ken akôngoafogh.

¹⁴Kpa ishima gema vihi Mose a mbahemenev mba ikumutya la, ka ukur mba ve lu a ior dubu dubu sha ikev man ukur mba ve lu a ior deri mba ve za hide ityav la.

¹⁵Mose pine ve er: Ne de kasev cii uma?

¹⁶Nenge, ka mban lu ve na Mbaiserael ve er TER kwaghbo sha kwaghwan u Balaam, sha kwagh u Peor la, ka nahan man bouange nyôr hen ior mba TER ye.

¹⁷Hegen yô, wua hanma wannomso ken mbayev mba kiriki mban man shi wua nen hanma kwase u nan vande yaven a or yô.

¹⁸Kpa mbayev kasev cii mba ve vande yaven a or ga yô, de nen ve uma, ve̱ lu sha ci wen.

¹⁹Lu nen ken akôngoafogh ayange ataankarahar; hanmô wen u nan woo or shin u nan bende a ikom yô, wanger nen ayol a en sha iyange i sha utar la man i sha utaankaruhar la kpaa, ne kua mba ne ker ve la.

²⁰Hanma ikondo man kwagh u i er sha ikov cii man akaa a i er sha aive a ivo cii kua akaa a i er sha ikon cii, wanger nen a.

²¹Tsô pristi Eleasar gema kaa a mbautyav mba ve za ityav la er: Ka kwaghwan u sha tindi u TER A we Mose ne:

²²Zenaria man azurfa man togula man iyôgh man kwaza kua inyelegh,

²³hanma kwagh u a vihin sha usu ga yô, wa nen un ken usu, tsô una wanger; nahan kpaa, shi á wanger un sha mngerem ma wanger kwagh a min la; hanma kwagh u a vihin sha usu yô, wa nen un shin mnger.

²⁴Sha iyange i sha utaankaruhar la, ôô nen akondo a en, tsô né lu wang; ken masejime la né nyôr ken afo.

²⁵TER ôr kwagh a Mose, A kaa er:

²⁶Ôr iyenge i ishar i i ye yô, ior kua uzendenya, we vea pristi Eleasar man mbavesen mba sha uya mba uter mba ior la;

²⁷kar ishar mbaaci uhar, na mbautyav mba ve ze ityav yô, shi na ior cii kpaa;

²⁸ngohol kpandegh ku TER hen mbautyav, mba ve ze ityav la; môm ken deri utaan u ior man u ibua man u ujaki man u iyôngo kpaa.

²⁹Ngohol nen ku ken kwar ve la, na pristi Eleasar, i̱ lu nagh ku kenden sha ku TER.

³⁰Ken kwar u Mbaiserael la yô, ngohol môm u i tsough ken hanma akunduahargber, u ior man u ibua man u ujaki man u iyôngo, uzendenya cii, gema na Mbalevi, mba ve eren tom ken tabernakel u TER la.

³¹Tsô Mose man pristi Eleasar er er TER kaa Mose nahan.

³²Ishar i mbautyav ve ya, i i shi her la yô, lu iyôngo dubu deri ataratar man dubu akunduatargber kar utaan;

³³ibua dubu akunduatargber kar dubu uhar;

³⁴ujaki dubu akunduatar kar dubu môm;

³⁵man ior cii lu dubu ikundugber kar uhar, ka kasev mba ve vande yaven a or ga la.

³⁶Vegher u a lu kwar u mba ve za ityav la yô, iyenge i iyôngo lu dubu deri utar man dubu ikundugber kar utaankaruhar man deri utaan;

³⁷kpandegh ku TER sha iyôngo lu deri ataratar man akunduatargber kar itian.

³⁸Ibua lu dubu ikundugber kar ataratar; kpandegh ku TER sha i lu akunduatargber kar ihiar.

³⁹Ujaki lu dubu ikundugber man deri utaan; kpandegh ku TER sha ve lu akunduatar kar môm.

⁴⁰Ior lu dubu pue kar ataratar; kpandegh ku TER sha ve lu ikundugber kar uhar.

⁴¹Tsô Mose na pristi Eleasar kpandegh ku ku lu nagh ku kenden sha ku TER, er TER kaa Mose nahan.

⁴²Kwar u Mbaiserael u Mose pav kposo a u mbautyav la,

⁴³kwar u ior la yô, lu iyôngo dubu deri utar man dubu ikundugber kar utaankaruhar man deri utaan,

⁴⁴man ibua dubu ikundugber kar ataratar,

⁴⁵man ujaki dubu ikundugber man deri utaan,

⁴⁶man ior dubu pue kar dubu ataratar;

⁴⁷ken kwar u Mbaiserael la yô, Mose ngohol môm u i tsough ken hanma akunduahargber, u ior man u uzendenya la, na Mbalevi, mba ve eren tom u tabernakel u TER, er TER kaa Mose nahan.

⁴⁸Tsô mbahemenev mba udubu dubu mba ikumutya la, ka ukur mba ve lu a ior dubu dubu sha ikev man ukur mba ve lu a ior deri deri, ve va hen Mose;

⁴⁹ve kaa a Mose er: Mbayev ou ôr iyenge i mbautyav mba ve lu sha ikev yase la, mô wase môm saa ga.

⁵⁰Nahan se va na TER iwua sha akaa a i er sha zenaria, a anti or nan zough a mi yô, ahye a shin angahar man a sha uwe man ikunya i ken ave kua iyôv mbi ken ato man akaa a hweegh a zeren sha iker, sha u nan iwom a min sha ci u uuma asev sha ishigh ki TER.

⁵¹Tsô Mose man pristi Eleasar ngohol zenaria la hen a ve, lu ikav mbi hweev cii.

⁵²Zenaria u nagh ku kenden sha u ve na TER la cii, u a dugh hen ukurmbautyav mba ve lu a ior dubu dubu sha ikev man mba ve lu a ior deri deri la yô, lu ushekel dubu pue kar ataratar man deri utaankaruhar man akunduahargber.

⁵³Gadia mbautyav ya ishar hanma or sha ci u nan.

⁵⁴Nahan Mose man pristi Eleasar ve ngohol zenaria la sha ikev i ukur mba ve lu a ior dubu dubu sha ikev, man mba ve lu a ior deri deri la; ve va a mi hen tenti u kohol ker sha u umbur Mbaiserael a min sha ishigh ki TER.