Read tiv Numeri 36 Bible Online

Numeri 36 - tiv bible

Numeri 36

¹Tsô mbavesen mba sha uya mba uter mba hen ipaven u ônov mba Gileadi, wan u Makir, wan u Manase, u hen uipaven mba ônov mba Yosev za va, va ôr kwagh a Mose man mbahemenev mbavesen mba sha uya mba uter, mba ônov mba Iserael la;

²ve kaa er: TER kaa a terem er a̱ na Mbaiserael tar sha ishor i eren u̱ hingir dyako ve; shi TER kaa a terem kpaa er, i̱ gema dyako u Selofehadi anngô wase, i̱ na ônov nav mba kasev.

³Nahan aluer vea er ma or u ken ikwe igen i Mbaiserael yô, á ngohol dyako u a lu u ve u a lu u uter asev la kera, á gema á na kwe u ve za lu her la, nahan á pande dyako wase u ishor i tese se la kera.

⁴Zum u inyom i jubilii i Mbaiserael ia kuma yô, á seer dyako ve sha dyako u kwe u ve za lu her la, nahan á ngohol dyako ve ken dyako u kwe u uter asev kera.

⁵Tsô Mose kaa a Mbaiserael sha imo i TER, er: Kwe u ônov mba Yosev kaa mimi.

⁶Ka kwagh u TER A kaa sha kwagh u ônov mba kasev mba Selofehadi ne er, ve̱ er noov sha asema a ve, kpa i̱ lu ken ipaven u kwe u ter ve, ve̱ er ye.

⁷Ka nahan man á ngohol dyako u Mbaiserael u hen kwe ugen á za a mi hen ugen ga ye; gadia Mbaiserael yô, hanmô nana̱ uve sha dyako u kwe u uter u nan la.

⁸Hanma wankwase u nan lu a dyako hen kwe u Mbaiserael yô, nana̱ er nom ken ipaven u kwe u ter u nan, sha er ônov mba Iserael ve̱ lu a dyako u uter vev, hanmô nana̱ lu a u nan yô.

⁹Ka nahan man á ngohol dyako u kwe ugen á za a mi hen kwe ugen ga ye; gadia ikwe i Mbaiserael yô, hanmô u̱ uve sha dyako u u.

¹⁰Er TER kaa Mose nahan, kape ônov mba Selofehadi mba kasev ve er je la;

¹¹gadia Mahela man Tirsa man Hogela man Milka kua Noa, ônov mba Selofehadi mba kasev, ve er ônov mba anngôôv mba ter ve.

¹²Ve er noov ken uipaven mba ônov mba Manase wan u Yosev, dyako ve kpaa saa ken kwe u ipaven u ter ve.

¹³Ka atindi man akaaôron a jirigh a TER na Mose, Mose gema na Mbaiserael hen ukpuunkpuun mba Moabi hen kpe u Yordan, tiôn u hen Yeriko je ne.