Read tiv Numeri 6 Bible Online

Numeri 6 - tiv bible

Numeri 6

¹TER shi ôr kwagh a Mose, kaa er:

²Ôr kwagh a Mbaiserael, kaa a ve wer, aluer nomsoor shin kwase nana tsegha zwa sha ma kwagh, a lu iceghzwa i ornaseri sha u tseghan iyol i nan sha ci u Ter yô,

³nana̱ tswer wain man msôrom; nana̱ de kera me vineger u wain shin vineger u msôr kpaa ga; man shi nana̱ de kera me ma zar u atam a wain ga, man nana̱ de kera ye atam a wain ga, shin a ndor shin a ombor kpaa ga.

⁴Sha ayange a mtsegh u nan cii, nana̱ de kera ye ma kwagh u a dugh ken itine i wain ga, hii sha asange a na je kua apusu na kpaa.

⁵Ayange a iceghzwa, i nan tsegh iyol i nan la cii, nana̱ de ze atsem sha ityou ga zan zan ayange a nan tsegh iyol i nan sha ci u TER la a̱ bee; nana̱ lu icighanor, nana̱ de ice i nan i̱ ume.

⁶Ayange a nan tsegh iyol i nan sha ci u TER la cii, nana̱ de mgbôghom a ikom ga,

⁷shin a lu ter u nan, shin ngô u nan, shin anngô u nan u nomso, shin anngô u nan u kwase, nana̱ de hôngor iyol i nan sha ve, zum u ve kpe la ga; gadia mtsegh u nan tsegh iyol i nan sha ci u Aôndo la, ngu sha ityough ki nan je.

⁸Ayange a mtsegh u nan la cii, nan ngu icighanor u TER je.

⁹Aluer ma or á kpe ikua ikua a nan fese man nana vihi ityough ki nan ki nan tsegh ki la yô, nahan nana̱ hondo ityough ki nan sha iyange i mwanger u nan; ka sha iyange i ataankarahar la, nana̱ hondo ki ye.

¹⁰Sha iyange i anigheni la, nana̱ va a mbaatii uhar shin utulembamkunguv uhar hen pristi, hen hunda u tenti u kohol ker la;

¹¹pristi a̱ na nagh ku isholibo sha u môm, a̱ gema ugen la, a̱ na nagh ku nanden a mi, a̱ na iwom sha ci u nan, sha ci u nan er isholibo sha kwagh u kuugh la yô; a̱ tsegha ityough ki nan sha iyange la je.

¹²Nahan nana̱ tsegha TER ayange a mtsegh u nan, nana̱ va a gumiyôngo u a kom inyom i môm yô, sha ci u nagh ku iboogh; kpa ayange a a kar la yô, a hingir gbilin je ve, sha ci u mtsegh u nan tsegh iyol i nan la hôngor.

¹³Tindi u sha ornaseri, aluer ayange a mtsegh u nan a bee yô, ka un ne: i̱ va a nan hen hunda u tenti u kohol ker la,

¹⁴nana̱ na TER nagh ku nan; gumiyôngo môm u a kom inyom i môm u a lu a ihogholough iyol ga yô, sha ci u nagh ku nanden, man tuleiyôngo môm u a kom inyom i môm u a lu a ihogholough iyol ga yô, sha ci u nagh ku isholibo, man nomiyôngo môm u a lu a ihogholough iyol ga yô, sha ci u nagh ku bem;

¹⁵man ikese i bredi u i we kwa sha mi ga yô, man umasa mba sha mwem ma kengese ma i nongo mkurem sha mi yô, man umasa mba par par mba i we kwa sha mi ga, i shigh a shighe ve mkurem yô, man nagh ku sha samuyia man iniav vev mbi man mbi maghen sha mi la.

¹⁶Pristi a̱ va a mi sha ishigh ki TER, a̱ na nagh ku nan ku isholibo man nagh ku nanden;

¹⁷a̱ va a nomiyôngo la, a̱ na TER nagh ku sôngon ku bem a mi kua ikese i bredi u i we kwa sha mi ga kpaa, shi pristi a̱ na nagh ku sha samuyia ku maghen sha mi kua nagh ku man kpaa.

¹⁸Nahan ornaseri la, nana̱ hondo ityough ki nan tsegh la, hen hunda u tenti u kohol ker la, nana̱ kura ice i sha ityough ki nan, ki nan tsegh la, nana̱ haa sha usu u u lu shin nagh ku sôngon ku nagh ku bem la.

¹⁹Pristi a̱ tôô kpaakpawe u nomiyôngo u i jiidi la, shi a̱ dugh masa shin ikese la môm u i we kwa sha mi ga yô, man shi masa u par par môm u i we kwa sha mi ga yô, a̱ penda ornaseri la sha ave, zum u nan hondo ityough ki nan ki nan tsegh la kera yô.

²⁰Nahan pristi a̱ cia a mi, a̱ hingir nagh ku cian sha ishigh ki TER; a̱ lu icighankwagh u pristi, kua gugu u i cie a mi man namegh ku kenden sha; ken masetyô yô, ornaseri la, nana̱ gba man wain.

²¹Ka tindi u ornaseri u nan tsegh zwa je ne, ka nagh ku nana̱ na TER sha ci u mtsegh u nan la, kua akaa agen a nan fetyô u nan yô; er nan tsegh zwa la, nana̱ er di sha tindi u mtsegh u i tsegh nan er nan lu ornaseri la.

²²TER shi ôr kwagh a Mose kaa er:

²³Ôr kwagh a Aron kua ônov nav kaa wer: Veren nen Mbaiserael nahan ner:

²⁴TER A̱ ver u shi A̱ kura u;

²⁵TER A̱ er ishigh Nagh ki̱ wanger sha a we, A̱ zungwe u mhôônom;

²⁶TER A̱ ver ishigh Nagh sha we, A̱ na u bem.

²⁷Kape ve̱ veren iti Yam sha Mbaiserael la; Mo Me veren ve doo doo.