Read tiv Numeri 8 Bible Online

Numeri 8 - tiv bible

Numeri 8

¹TER ôr kwagh a Mose, kaa er:

²Ôr kwagh a Aron kaa un wer: Zum u ú tsar amenger yô, amenger a ataankarahar la, a̱ wanger ken hemen u daarimenger.

³Aron er nahan; a tsar amenger sha u a̱ wanger ken hemen u daarimenger, er TER kaa Mose nahan.

⁴M-er u daarimenger la yô, i var un a var sha zenaria; ityô na kua uimondon nav cii, i var a var; lu sha ikav i TER tese Mose, kape a er daarimenger je la.

⁵TER ôr kwagh a Mose, kaa er:

⁶Dugh Mbalevi ken Mbaiserael ver ve kposo, wanger ve.

⁷Kwagh u ú er ve sha u wanger ve yô, ka un ne: Mishi ve mngerem ma ôôn isholibo; shi ve̱ zende atsem iyol cii, ve̱ ôô akondo a ve, ve̱ wanger ayol a ve.

⁸Ve̱ va a gumbua a nagh ku sha samuyia ku i magh sha mi la, ka mwem ma kengese ma i nongo mkurem sha min yô; shi kôr nombua ugen kpaa sha ci u nagh ku isholibo.

⁹Va a Mbalevi hen hunda u tenti u kohol ker la; kohol ior i Mbaiserael cii;

¹⁰ver Mbalevi sha ishigh ki TER; Mbaiserael ve̱ penda Mbalevi ave iyol.

¹¹Aron a̱ gema Mbalevi a̱ cia nagh ku cian a mi, sha ishigh ki TER, sha ci u Mbaiserael; i̱ ver ve ve̱ lu mba eren tom u TER.

¹²Mbalevi ve̱ penda ave ve sha ityouv mbi ibua; gema u môm na TER nagh ku isholibo a mi, shi gema ugen la na nagh ku nanden a mi, ku̱ hingir iwom sha ci u Mbalevi.

¹³Ver Mbalevi ve̱ tile sha ishigh ki Aron kua ônov nav, gema ve, cia nagh ku cian a mi sha ci u TER.

¹⁴Kape ú dugh Mbalevi ken Mbaiserael, ú ver ve kposo la; Mbalevi ve̱ lu mba Av.

¹⁵Ken masetyô la, Mbalevi ve nyôr sha u eren tom u tenti u kohol ker la; wanger ve, gema cia nagh ku cian a mi.

¹⁶Gadia i tsuwa ve ken Mbaiserael i nam a na je, M ngohol ve sha ityough ki hanma wan u a hii duen ken uya yô, ka mbaiundav mba Mbaiserael cii je la.

¹⁷Gadia ônovmbaiundav mba ken Mbaiserael cii ka mba Av, mba iorov kua mba uzendenya cii; sha iyange i M wua mbaiundav mba ken tar u Igipiti cii la, M tsegha ve sha ci Wam iyol Yam.

¹⁸M ngohol Mbalevi sha ityough ki mbaiundav mba ken Mbaiserael cii.

¹⁹M tsuwa Mbalevi ken Mbaiserael M gema ve M na Aron a ônov nav, ve̱ eren tom u Mbaiserael ken tenti u kohol ker la, shi ve̱ naan iwom sha ci u Mbaiserael, sha er bouange a̱ de luun ken Mbaiserael, sha mkporom u Mbaiserael vea kporom hen icighanjiir la ga.

²⁰Kape Mose man Aron man ior i Mbaiserael cii ve er a Mbalevi la, er TER kaa Mose er a̱ er a Mbalevi la cii yô, kape Mbaiserael er a ve je la.

²¹Mbalevi wanger asorabo a ve kera, shi ve ôô akondo a ve kpaa; Aron gema ve, cia nagh ku cian a mi, sha ishigh ki TER; Aron na iwom sha ci ve, sha u wanger ve.

²²Ken masetyô la, Mbalevi nyôr ken tenti u kohol ker la, sha u eren tom ve sha ishigh ki Aron man ônov nav; er TER kaa Mose er a̱ er a Mbalevi la, kape i er a ve je la.

²³TER shi ôr kwagh a Mose kaa er:

²⁴Mbalevi yô, kape kwagh ve una lu ne, hii sha or u nan kom anyom ikundu kar ataan man u nan hembe nahan, ka nan nana va nyôr tom u tenti u kohol ker la ye;

²⁵kpa or u nan kom anyom akunduahargber yô, nana̱ de tom la, nana̱ de kera yaren u ga;

²⁶kpa nana̱ wasen di a wase anmgbianev mba nan ken tenti u kohol ker la, sha tom ve tsô; kpa tom la yô, ve̱ de hoghom sha mi ga. Kape ú er a Mbalevi sha kwagh u tom ve la.