Read tiv Hagai 2 Bible Online

Hagai 2 - tiv bible

Hagai 2

¹Sha uwer u sha utaankaruhar, ayange a u ikundu kar môm la, kwaghôron u TER va sha ikev i profeti Hagai, er:

²Shi ôr kwagh a Serubabel wan u Shealtiel, gomna u Yuda, man a zegepristi Yosua wan u Yehosadaki, man a asande a ior a a shi her yô, kaa wer:

³Ka an nan shi ken a ven u yan nan nenge iyou nen ken icivir i i laa? Man hegen yô, ne nenge a i, ngi nana? Kera ngi ken ashe a en er ka gbilinkwagh gaa?

⁴Kpa hegen yô, taver ishima, we Serubabel, kape TER A kaa ne; man taver ishima we zegepristi Yosua, wan u Yehosadaki, man shi taver nen ishima, ne ior mba hen tar ne cii, er nen tom kape TER A kaa ne, gadia M ngu a ven, kape TER u akum a Sha A kaa ne,

⁵sha kwagh u ikur i M ya a ven, zum u ne due ken Igipiti la, man nenge jijingi Wam ngu a ven; de cie nen ga.

⁶Gadia TER u akum a Sha ngu kaan nahan er: Mase shin kwagh môm, kera shi ca ga tsô, Me tenger Sha man tar man zegemnger man iombortar;

⁷shi Me tenger akuraior cii, nahan akaainjaa a akuraior cii aa va, nahan Me iv iyou ne a iengem, kape TER u akum a Sha A kaa ne.

⁸Azurfa ka u Wam, zenaria kpaa ka u Wam je, kape TER u akum a Sha A kaa ne.

⁹Icivir i iyou ne i masetyô ia hemba i tsuaa la, kape TER u akum a Sha A kaa ne; hen ijiir ne Me na bem, kape TER u akum a Sha A kaa ne.

¹⁰Sha uwer u sha utaankarunyiin ayange a u ikundu kar anyiin sha inyom i sha uhar i Dariu la, kwaghôron u TER va sha ikev i profeti Hagai, er:

¹¹TER u akum a Sha ngu kaan nahan er: Shi pine nen upristi sha kwagh u atindigh, ner:

¹²Aluer or nana wa icighaninyam ken mkaikondo u nan, man nana bende mkaikondo u nan sha bredi, shin sha kwagh u jiidi, shin sha wain, shin sha mkure, shin sha hanma kwaghyan yô, una hingir icighankwagha? Upristi gema kaa er: Ei.

¹³Tsô Hagai kaa er: Aluer orgen nana hôngor iyol sha ikomor man nana bende a akaa ne yô, kwagh la una hôngorô? Upristi gema kaa er: Una hôngor.

¹⁴Nahan Hagai gema kaa er: Kape ior mban ve lu je ne, man kape ikurior ne i lu sha ishigh Yagh ne, kape TER A kaa ne; man kape hanma tom u aveegh ve kpaa u lu ne, kua kwagh u ve ne nagh a min la kpaa; ka u wang ga.

¹⁵Hegen yô, shi ver nen ishima, hii nyian je, nenge nen kwagh u ken ijime la, er i lu a ver iwen sha iwen igen ken tempel u TER ga je yô.

¹⁶Hen shighe la cii, zum u or nana va hen tihi u ikaren ikundu, yô, nan zua a mi pue tseegh; zum u or nana va hen ihungwa i shoghol wain sha u nana kese ikaren akunduahargber yô, nan tser a mi ikundu tseegh.

¹⁷M tsaha ne sha mhie u iyia man sha yien man sha awombo, ka ityom yen i aveegh cii; nahan kpaa ne hide her a Mo ga, kape TER A kaan ne.

¹⁸Shi ver nen ishima, hii nyian je, nenge nen kwagh u ken ijime la, hii sha uwer u sha utaankarunyiin ayange a u ikundu kar anyiin, hii sha iyange i i tim imagh ki tempel u TER la je, ver nen ishima sha mi.

¹⁹Sam shi sha una je kpa? Een, kon u wain man u tur man u pomegraneti kua u olev kpaa, ume ga. Hii nyian je, Me ver ne dedoo.

²⁰Kwaghôron u TER shi va hen Hagai u sha kwa har sha uwer la ayange a u ikundu kar anyiin er:

²¹Kaa Serubabel gomna u Yuda, wer: Me tenger Sha man tar;

²²Me yôhôl ikônough ki torough ki ityartor, Me tim tahav mbu ityartor i akuraior kera; Me zôhô akekeautya a mbaunden sha mi la; anyinya man mbahendan a, vea haa inya, hanmô sha sanker u anngô u nan.

²³Sha iyange la, kape TER u akum a Sha a kaa ne, Me tôô u, we Serubabel, wanakiriki Wam, wan u Shealtiel, kape TER A kaa ne, Me gema u ú hingir iyôgh ki ken uwe ki veren ikav a min; gadia M tsuwa u, kape TER u akum a Sha A kaa ne.