Read tiv Sekaria 1 Bible Online

Sekaria 1 - tiv bible

Sekaria 1

¹Sha uwer u sha anigheni, sha inyom i sha uhar i Dariu la, kwaghôron u TER va hen profeti Sekaria wan u Berekia, wan u Ido, er:

²Ishima vihi TER tsung a uter enev.

³Nahan yô, kaa a ve wer: TER u akum a Sha ngu kaan nahan er: Hide nen her a Mo, kape TER u akum a Sha A kaa ne, nahan Mo kpaa Me hide her a ven, kape TER u akum a Sha A kaa ne.

⁴De kera luun nen er uter enev nahan ga, mba uprofeti mba tsuaa mbala, ve lu genger imo kaan a ve er: TER u akum a Sha ngu kaan nahan er: Gema nen asema, undu nen igbenda yen i bo man aeren a en a bo; kpa ve ungwa ga, ve ver ato her a Mo kpaa ga, kape TER A kaa ne.

⁵Uter enev mba hana? Man uprofeti yee; mba uma her zan zana?

⁶Kpa akaaôron Am man akaawan a Am, a M wa mbatomov Av, uprofeti la yô, a kôr uter enev gaa? Nahan ve gema asema ve kaa er: Er TER u akum a Sha A we ishima u eren a vese sha inja i igbenda yase man sha inja i aeren a ase la yô, kape A er a vese je la.

⁷Sha uwer u sha pue kar môm ayange a u ikundu kar anyiin, ka uwer u Shebati je la, sha inyom i sha uhar i Dariu la, kwaghôron u TER va hen profeti Sekaria, wan u Berekia, wan u Ido, er:

⁸M lu kenger tugh yô, nenge, or henda nyinya u nyian, tile ker atô u ikon i mertel i shin pev; man ken ijime na yô, anyinya lu, lu a nyian man a lun kang man a pupuu.

⁹Nahan m kaa mer: Terem! Ka nyi kwagh nee? Nahan ortyom u lu ôron kwagh a mo la, kaa a mo er: Me tese u inja i akaa ne.

¹⁰Tsô or u a tile ker atô u ikon i mertel la kaa er: Mban ka mba TER A tindi ve yô, sha u zenden ningir sha tar.

¹¹Ve gema ve kaa a Ortyom u TER u A tile ker atô u ikon i mertel la er: Se zende tar cii, man nenge tar cii huan ving man u mem kpaa.

¹²Nahan Ortyom u TER la kaa er: TER u akum a Sha, shi nan je man Ú zungwe Yerusalem kua agar a Yuda mhôônom, a iyugh You i lu sha a je i kom anyom akunduatargber ne ase?

¹³Tsô TER gema ôr kwagh a ortyom u a lu ôron kwagh a mo la sha akaaôron a dedoo man a surun ishima kpaa.

¹⁴Nahan ortyom u a lu ôron kwagh a mo la, kaa a mo er: Genger imo, kaa wer: TER u akum a Sha ngu kaan nahan er: M gba iwuhe sha ci u Yerusalem kua Shion, ka iwuhe i taveraa je.

¹⁵Ishima vihim tsung a akuraior a a tem bem bem la; gadia er Ishima vihim kpuaa yô, ve di ve gema ve er kwagh hemba vihin.

¹⁶Nahan yô, TER ngu kaan nahan er: M hide hen Yerusalem a mhôônom ma zungwen; á maa iyou Yam ker, kape TER u akum a Sha A kaa ne; á samber kor u karen sha Yerusalem cii.

¹⁷Shi genger imo, kaa wer: TER u akum a Sha ngu kaan nahan er: Agar a Am aa shi á mgbough a mkpeyol; TER Una shi á sur Shion ishima, man Una shi á tsuwa Yerusalem kpaa.

¹⁸Tsô m kende ashe sha, m kenger, yô, nenge akor lu anyiin.

¹⁹M gema m pine ortyom u a lu ôron kwagh a mo la mer: Ka nyi kwagh nee? Nahan a kaa a mo er: Angan ka akor a a sambe Yuda man Iserael kua Yerusalem la.

²⁰TER shi tesem mbavareniwa unyiin.

²¹Tsô m pine mer: Mban va sha u va eren nyi? Nahan A ôr kwagh A kaa er: Angan ka akor a a sambe Yuda je or u kenden ityough sha nan kera lu ga ne; kpa mban va sha u va tan a mciem, man u haan akor a akuraior inya, a a kende korough sha, sha u samben tar u Yuda la.