Read tiv Sekaria 11 Bible Online

Sekaria 11 - tiv bible

Sekaria 11

¹Bugh ihinda you, we Lebanon, sha u usu u̱ hia usedar ou.

²Vaa, we kon u shiperu, gadia sedar gba, man i vihi ikon injaa kera; vaa nen, ne ikon i ouki i Bashan gadia ikô i lun dimii i gba.

³Ungwa, mliam ma mbakuranilev! gadia icivir ve saa kera; ungwa, kume u agumaubegha! gadia gborikô u Yordan saa ishe.

⁴TER, Aôndo wam, ngu kaan nahan er: Lu orkuran u iyôngo i á va sôngo i la;

⁵mbayamen i mba senge i, kpa ishima i ne ve ibo ga; mba ve teen i, ve kaan er: I̱ wuese TER, gadia m hingir ornyar; mbakuran i kpaa mhôônom kôr ve a i ga.

⁶Gadia mhôônom maa kera kôrom a mba ve tem ken tar ne ga, kape TER A kaa ne; kpa nenge, Me na ior vea gba hanma or sha ikev i or u wan ndor a nan, man sha ikev i tor u nan, vea vihi tar kera, man Mo kpaa, Me yima môm môm sha ikev ve ga.

⁷Nahan m hingir orkuran u iyôngo i á va sôngo i la—ka nahan man i ker mhôônom ye. Nahan Mtôô igbough ihiar, m yila u môm, mer Dooashe, ugen la m yila mer Mzough; tsô m gba koson iyôngo la.

⁸Tsô m wua mbakuranilev utar ken uwer môm; gadia m kera fatyô u wan ishima a ve ga, ve di kpaa m due ve ishima.

⁹Nahan m kaa mer: Me kera lu orkuran wen ga; kwagh u a lu u kpen yô, a̱ kpe, man kwagh u a lu u saan yô, a̱ saa, mba vea shi her yô, ve̱ ya inyam ve ayol a ve.

¹⁰Nahan M tôô gbough agh Dooashe la, m kever ku her atô, m pav ikur i m ya a ior cii la.

¹¹I pav i sha iyange la, nahan iyôngo i i ker mhôônom i wem iko ne, i fa er i lu kwaghôron u TER je yô.

¹²M kaa a ve, mer: Aluer a doo ne yô, nam nen injar yam; kpa aluer a doo ne ga yô, de nen. Nahan ve kar agbenger a azurfa ikundugber sha ci u injar yam.

¹³Tsô TER kaa a mo er: Gema a, haa sha ci u ormaantyegh, ka zegeishe i ve nenge m kom je la. Nahan m tôô agbenger a azurfa ikundugber la, m haa a sha ci u ormaantyegh ken iyou i TER.

¹⁴Tsô shi m kever gbough kugenegh kura, ka Mzough je la, m pav Yuda man Iserael mer ve̱ de kera luun anmgbianev ga.

¹⁵TER kaa a mo er: Shi tôô ikav mbi ibumeorkuranilev.

¹⁶Gadia, nenge, veren Yam orkuranilev sha tar, una wa mbisaanshe iko ga, una ker mbi mbi sambe la ga, una kange mbisombon ga, una koso mbitilensha la ga, kpa una ya inyam i mbiwanahôm, una tsuwa apande a mbi.

¹⁷Kwagh á tser orkuranilev u dang ne u a undu iyôngo! Sanker ma a gber uwegh nagh kua ishe na i yan; uwegh nagh ku̱ uma tsong, ishe na i yan kpaa i̱ kôngor gbina.