Read tiv Sekaria 2 Bible Online

Sekaria 2 - tiv bible

Sekaria 2

¹M kende ashe sha m kenger, yô, nenge, or lu a kor u karen kwagh a mi sha uwe.

²Nahan m pine mer: Zan you hana? Tsô or la kaa a mo er: Ka sha u karen Yerusalem sha u nengen igbanger na man ilihen na er i lu yô.

³Yô, nenge, er ortyom u a lu ôron kwagh a mo la kporom ken hemen yô, ortyom ugen due va kohol un,

⁴a kaa a u masen van la er: Za ayem, za ôr kwagh a wanyekwaor la, kaa wer: Yerusalem una lu er agar a lun a ugir ga nahan, sha ci mngee u ior man uzendenya mba ve lu kimi yô.

⁵Gadia TER ngu kaan nahan er: Mo Me hingir un gilgar u usu, á kase un á tser, man Me hingir un kwagh u icivirigh ken atô na.

⁶Mough, mough yevese due nen ken tar u Imbusutarimese la kera, kape TER A kaa ne; gadia M sambe ne wuee er ahumbe a anyiin a Sha nahan, kape TER A kaa ne.

⁷Mough yem hen Shion, yevese war, we u u tem vea wankwase u Babilon ne.

⁸Gadia TER u akum a Sha ngu kaan nahan er, ka sha u m̱ tese icivir Na, A tindim hen akuraior a a ye ishar sha a ven la ye; gadia u nan bende a ven yô, nan bende hongorshe Na je.

⁹Gadia, nenge, Me kunde uwegh Agh sha a ve, vea hingir ishar i mba iyange ve shiren ve tom la; tsô nea fa er i lu TER u akum a Sha, A tindim yô.

¹⁰Wa icam, ember, we wankwase u Shion; gadia nenge, M ngu van, Me tema ken atô wou, kape TER A kaa ne.

¹¹Akuraior kpishi aa va zua a TER sha iyange la, aa hingir ior Av, Mo kpaa Me tema ken atô wou; tsô ú fa er i lu TER u akum a Sha A tindim her a we yô.

¹²TER Una ya dyako sha Yuda, ka kwar Na ken icighantar je la, Una shi á tsuwa Yerusalem kpaa.

¹³Huan nen ving sha ishigh ki TER, ne uuma cii; gadia A mough hen icighanjiir Na.