Read tiv Sekaria 4 Bible Online

Sekaria 4 - tiv bible

Sekaria 4

¹Tsô ortyom u a ôr kwagh a mo la shi va, va nderem er ka i nder or u yaven nahan.

²A kaa a mo er: Ka nyi u nenge a mi? M kaa mer: M kenger, yô, nenge, daarimenger u i er sha zenaria jimin cii, a gbande u haan mkurem ker vegher na u sha, man amenger a na sha mi, ataankarahar; ugongor utaankaruhar lu sha ci u hanma imenger i i lu sha agbaa la;

³man ikon i olev lu her ihiar, u môm ken uwegh ku yanegh ku gbande la man ku gen di ken wegh nagh ku imesegh.

⁴M gema m kaa a ortyom u a ôr kwagh a mo la mer: Terem, ka nyi nee?

⁵Tsô ortyom u a ôr kwagh a mo la gema kaa a mo er: U fa inja na gaa? M kaa mer: Ei, terem.

⁶Nahan a gema a kaa a mo er: Ngun ka kwaghôron u TER a Serubabel er: Ka sha agee ga, ka sha utaha kpaa ga, kpa ka sha Jijingi Wam, kape TER u akum a Sha A kaa ne.

⁷U ngu nyi, we zegewo ne? Sha ishigh ki Serubabel ú hingir shambe shambe; una due a iwen i sha kur a amo a genger sha i er: Mrumun u sha mhôôn, mrumun u sha mhôôn.

⁸Kwaghôron u TER shi va her a mo er:

⁹Ave a Serubabel tim imagh ki iyou ne, shi ka ave na kpaa aa kure i ye, tsô né fa er i lu TER u akum a Sha a tindim her a ven yô.

¹⁰Gadia ka an nan laha iyange i akaa a kiriki laa? Gadia a ataankarahar ne, ka ashe a TER a a jingi a nengen tar cii la, aa ember, zum u aa nenge kor u sôron kwagh a min sha u a̱ lu jighilaa, sha uwegh ku Serubabel yô.

¹¹Nahan m gema m pine un mer: Inja i ikon i olev ihiar i i lu daarimenger vegher u ken uwegh ku yanegh kua ken imese kpaa la er nyi?

¹²Tsô shi m pine un mer: Inja i agbaa a olev ahar a a lu hen ugongor mba zenaria uhar, mba mkurem ma zenaria ma dugh ker la, er nyi?

¹³A gema a kaa a mo er: U fa inja na gaa? M kaa mer: Ei, m fa ga, Terem.

¹⁴Nahan a kaa er: Mban ka mba uhar mba i shigh ve mkurem, mba ve til sha ishigh ki Ter u taregh cii yô.