Read tiv Sekaria 6 Bible Online

Sekaria 6 - tiv bible

Sekaria 6

¹Shi m kende ashe sha, yô nenge, akekeautya anyiin due hen haregh u iwo ihiar; iwo shon lu iwo i togula.

²Ikyekye i hiihii la lu a anyinya a nyian; i sha uhar la lu a anyinya a il;

³i sha utar la lu a anyinya a pupuu; i sha unyiin lu a anyinya a lun abeen abeen a taver iyol.

⁴Tsô m gema m ôr kwagh a ortyom u a lu ôron kwagh a mo la mer: Terem ka nyi akaa nee?

⁵Nahan ortyom la gema kaa a mo er: Angan ka ahumbe a anyiin a Sha a a dugh er a vande tilen sha ishigh ki Ter u taregh cii yô.

⁶I i lu a anyinya a il la due lu zan sha tar u Imbusutarimese la; man a pupuu la due dondo sha a; a lun abeen abeen la due lu zan shin tar u Imbusutariyan la.

⁷A taver iyol la due a ver ishigh u zenden ningir sha tar; tsô a kaa er: Mough nen heen zende nen ningir nen sha tar. Nahan a gba zenden ningir sha tar.

⁸Tsô a yilam sha imo i genger genger er: Nenge, a a yemen sha tar u Imbusutarimese la, a na Jijingi wam mmem shin tar u Imbusutarimese la.

⁹Kwaghôron u TER va her a mo, kaa er:

¹⁰Ngohol kwagh hen mbauikangenev, ka hen Heldai man hen Tobiya man hen Yedaia; sha iyange shon la, we kpaa va, va nyôr hen ya u Yoshia wan u Sefania, henpe mba ve hidi ken Babilon ve nyer la

¹¹ngohol azurfa man zenaria hen ve, er idyer i tor a mi, cir sha ityough ki zegepristi Yosua wan u Yehosadaki,

¹²man ôr kwagh a na kaa wer: TER u akum a Sha ngu kaan nahan er: Nenge, or u i yer iti na er Icerenkon la una due hen ijiir na, ka un una maa tempel u TER ye;

¹³ka un je una maa tempel u TER ye; una ya icivir i tor, una tema tor sha ikônough nagh ki torough man una lu pristi sha ikônough nagh ki torough; mhen u bem una lu her atô u ve mba uhar.

¹⁴Idyer i tor la ia lu kwagh u umbur Helem man Tobiya man Yedaia man Hen wan u Sefania a mi, ken tempel u TER.

¹⁵Mba ve lu ica je vea va, vea va wase u maan tempel u TER, tsô nea fa er i lu TER u akum a Sha A tindim her a ven yô. Kwagh ne una kure sha mi vough, aluer nea wa imo i TER, Aôndo wen, iko a ishima i môm yô.