Read tiv Sekaria 7 Bible Online

Sekaria 7 - tiv bible

Sekaria 7

¹Tsô sha inyom i sha unyiin i tor Dariu la, kwaghôron u TER va hen Sekaria sha uwer u sha utaankarunyiin, ayange a u anyiin la, ka Kiselev je la.

²Yô, ior mba Betel tindi Shareser man Regem-meleki man ior vev, sha u ve̱ za ker mrumun u sha mhôôn u TER,

³ve̱ za pine upristi mba sha iyou i TER u akum a Sha man uprofeti, er: M̱ vaan, man m̱ hôron kwaghyan sha uwer u sha utaan, er m vande eren anyom a a kar kpishi la nahan shinii?

⁴Tsô kwaghôron u TER u akum a Sha va her a mo kaa er:

⁵Ôr kwagh a ior mba hen tar ne cii man a upristi kpaa, kaa wer: Er ne lu hôron kwaghyan man zungwen sha uwer u sha utaan man u sha utaankaruhar la, anyom a akunduatargber ne cii, lu sha ci Wam je ne hôr kwaghyan ye he?

⁶Zum u ka nea yaan kwagh man nea maan kwagh la, kera ka sha ci wen ayol a en tsô ka ne yaan man ne maan gaa?

⁷Kera ka akaaôron a TER lu ôr sha uprofeti mba tsuaa mbala, zum u ior tema ken Yerusalem man ve lu a mkpeyol, man agar a na a a kase un tser la, man ior lu ken tar u Imbusutariyan man shin tar u Pev la gaa?

⁸Tsô kwaghôron u TER va hen Sekaria er:

⁹TER u akum a Sha ngu kaan nahan er: Ôr ijir sha mimi, tese erdoo man mhôônom ma zungwen, hanma or a anngô u nan,

¹⁰de kera kighir nen kwasecôghol a ican ga, man wancôghol man shiror shin icanor kpaa ga; hanmô wen nana de kera henen iferkwagh ken ishima i nan sha anngô u nan ga.

¹¹Kpa ve venda u ungwan, ve yoghol akende, ve cir ato a ve sha u vea ungwa ga yô.

¹²Een, ve er asema a ve taver er ka iwen i diamondi yô, sha u vea ungwa atindiakaa man akaaôron ga yô, a TER u akum a Sha A tindi sha Jijingi Na sha ikev i uprofeti mba tsuaa mbala; nahan iyugh i vesen i due hen TER u akum a Sha.

¹³Yô, er Un A yila man ve rumun u ungwan ga, nahan kape ve kpaa vea yila, kpa Me ungwa ga la, kape TER u akum a Sha A kaa ne;

¹⁴kpa Me purugh a ve sha hiar, Me sambe ve ken akuraior cii a ve fe a ga yô. Ka nahan man tar la hingir ice ken ijime ve, je ma or u zenden karen hiden ker, kera lu ga ye; ve gema tar u doon ne hingir ice.