Read tiv Malaki 2 Bible Online

Malaki 2 - tiv bible

Malaki 2

¹Hegen yô, ne upristi, kwaghwan ne ka sha ci wen je.

²Aluer né ver ato ga, man né ver ishima sha mi sha u né na iti Yam icivir ga yô, kape TER u akum a Sha A kaa ne, nahan Me haa ne ifan, Me wa iveren yen kpaa ifan; een, M vande wan i ifan kera kpaa, sha ci u ne ver ishima ga yô.

³Nenge, Me tôndo tsombor wou, Me mishi ne icômbov sha ishi, ka icômbov mbi iniav mbi uiniongo enev je la; á yem a ven henpe mbi lu la.

⁴Nahan né fa er i lu Mo M tindi ne a kwaghwan ne ye, sha u ikuryan Yam a Levi i̱ lu her yô, kape TER u akum a Sha A kaa ne.

⁵Ikuryan Yam a Na lu: uma man bem; M na un ve sha u a̱ cia; un kpaa a ciam, a gbidye ikarikase iyol sha ci u iti Yam kpaa.

⁶Ityesen i mimi lu ken zwa na, i tser a ifer sha zwa na ga; a zende a Mo ken bem man perapera, a gema ior kpishi ve undu ifer.

⁷Gadia hemba doon u zwa u pristi ma u kor mfe man ior ma ve ker ityesen ken zwa na, gadia ka ortyom u TER u akum a Sha je.

⁸Kpa ne kaha ne undu gbenda; ne na ior kpishi gbev mbu nôngon sha ityesen; ne pav ikuryan i Levi, kape TER u akum a Sha A kaa la.

⁹Nahan, Mo kpaa M gema ne ne hingir kwagh u lahan man kwagh u gban ijime sha ishigh ki iorough cii, sha ci u ne we igbenda Yam iko ga, kpa ne gem ne sangen ior sha dooshima sha ityesen i atindi la yô.

¹⁰Kera ka ter môm se cii se lu a mi gaa? Ka Aôndo môm tsô A gbe se gaa? Yô, ka nyi se kera lu a mimi hen ayol a ase ga, man se hôngor a ikuryan i uter aseva?

¹¹Yuda er kwagh sha mimi ga, i er kwagh u ndôhôrshima ken Iserael kua ken Yerusalem; gadia Yuda hôngor a icighanjiir u TER u doon Un ishima la, man a er wankwase u aôndo ugen.

¹²TER A̱ tim or u nan er nahan la, ken utenti mba Yakob kera, oryilan kua orvengese kpaa, kua wen u a ne TER u akum a Sha nagh kpaa.

¹³Kwagh ne kpaa shi ne mba eren: ne mba cirin atse a TER a nanden nagh sha mi la, sha mlia man kwelegh man ishimashirin, sha ci u A kera wa nagh iko ga, A ngohol ku sha uwegh enegh sha ishima i gbar gbar kpaa ga yô.

¹⁴Ne mba pin ner: Ka sha ci u nyi? Ka sha ci u TER ngu Orshiada her atô wou a kwase wou u u er un iyev, u u er a na sha mimi ga la, shin er a lu ijende you man kwase wou u sha ikuryan je nahan kpaa.

¹⁵A er môm tseegh gaa? Shin er A shi a jijingi her nahan kpaa. Ka nyi man lu môm tseeghe? A lu keren vor u Aôndo. Nahan yô, ver nen ishima sha jijingi wen, de kera eren sha mimi ga a kwase wou u er un iyev la ga.

¹⁶Gadia M kôr ivaa i paven ihom, kape TER, Aôndo u Iserael, A kaa ne, kua wen u a cir ipila sha ikondo na la, kape TER u akum a Sha A kaa ne; nahan yô, ver nen ishima sha jijingi wen, sha u né kera undu mimi ga yô.

¹⁷Ne za TER iyol sha akaaôron a en. Nahan kpaa ne mba kaan ner: Hanma or u eren iferkwagh ka or u doon sha ishigh ki TER yô, doo Un a ve kpaa; shin: ka han Aôndo u mimi A luou?