Read tiv Malaki 3 Bible Online

Malaki 3 - tiv bible

Malaki 3

¹Nenge, M ngu tindin ortyom Wam, una sôrom gbenda ken hemen; man Ter u ne keren Un la Una va ken tempel Na fese je, ka Ortyom u ikuryan, u i doo ne a Na yô; nenge, ngu van, kape TER u akum a Sha A kaa ne.

²Kpa ka anti nana hendan ishigh a iyange i mve Na laa? Man ka anti kpaa nana tile sha zum u Una ande laa? Gadia ngu er ka usu u orsoughon iyôgh nahan, man er icahul i or u ôôn akondo yô;

³Una tema er orsoughon man orsôron azurfa sha u a̱ hingir wang yô, Una wanger ônov mba Levi, Una wanger ve wang er zenaria man azurfa nahan; nahan vea na TER nagh sha perapera.

⁴Zum la nagh ku Yuda man ku Yerusalem kua hingir kwagh u doon TER, er sha ayange a ngise, man er sha anyom a tsuaa la nahan.

⁵Me kporom her a ven sha u ôron ijir, Me lu Orshiada fese je sha mbaahiriv man sha udyambaiorov man sha mbabumun sha aie man sha mba ve kighir or u eren tom sha tôndo sha injar i nan, kua kwasecôghol man wancôghol kpaa, man mba ve daan shiror kera, man ve ciem ga, kape TER u akum a Sha A lu kaan ne.

⁶Gadia Mo TER M gem kposo ga, ka nahan man ne ônov mba Yakob kpaa, i tim ne ga ye.

⁷Hii sha ayange a uter enev la je ne kaha ne undu akaawan a Am, ne wa a iko kpaa ga. Hide nen her a Mo, Mo kpaa Me hide her a ven, kape TER u akum a Sha A kaa ne. Kpa ne mba kaan ner: Se hide nana?

⁸Or nana fatyô u iin Aôndo kwagha? Nahan kpaa ne mba iin Mo kwagh. Kpa ne mba kaan ner: Ka han se ii U kwagha? Ka sha môm-ken-upue la, man sha iniav mbi nan kpaa.

⁹I wa ne ifan, ne mba a ifan iyol, gadia ne mba iin Mo kwagh, ne ikurior ne cii.

¹⁰Va nen a môm-ken-upue mba jimin ken iyou i koson inyaregh, sha u iyou Yam i̱ lu a kwaghyan; yô, karem nen ase sha kwagh ne, kape TER u akum a Sha A kaa ne, tsô Mea bugh ne a-an a Sha, Mea haa ne iveren, je ia neer á haa inya.

¹¹Shi Me yange ikomon sha ci wen, ia kera vihi iyiav mbi ken tar wen ga; ikon i wain i ken sule ia kera de u umen ne atam ga, kape TER u akum a Sha A kaa ne.

¹²Akuraior cii aa yila ne er: Mba i saan ve iyol; gadia né hingir tar u doon tsung, kape TER u akum a Sha a kaa ne.

¹³Akaaôron a en hendan a Mo taveraa, kape TER A kaa la. Nahan kpaa ne kaa ner: Se hendan a We sha kwaghôron hana?

¹⁴Ne kaa ner: U civir Aôndo ka gbilinkwagh; man ka nyi mtser je i lu, er se we atindi a Na iko man se zenden sha ishigh ki TER u akum a Sha a ijungwene?

¹⁵Hegen yô, se mba yilan mbagengeseyol ser: Mba i saan ve iyol; mbaeren iferkwagh mba maan ve a maa tseegh ga, ka ve kar Aôndo nahan kpaa ve war.

¹⁶Tsô mbacian TER kpaa gema ôr kwagh ayol a ve; TER kpaa ver ato, ungwa, i nger ruamabera u umbur akaa sha ishigh Nagh, sha ci u mba ve cie TER, man mba ve civir iti Na yô.

¹⁷Vea hingir kwagh Wam jim je, kape TER u akum a Sha A kaa ne, sha iyange i Me er i la; Me er a ve dedoo er or ka nan er a wan u nan u a shir nan tom dedoo nahan.

¹⁸Tsô né gema né kav mkposo u orperapera a iferor, man u or u civir Aôndo a or u civir Un ga la.