Read tiv Mateu 11 Bible Online

Mateu 11 - tiv bible

Mateu 11

¹Tsô er Yesu wa mbahenen Nav mba pue kar uhar mbala kwagh been yô, A mough heregh kera, sha u za tesen man u ôron kwaghaôndo ken agar a ve yô.

²Yô, er Yohane ungwa akaa a Kristu A eren la ken gaadi yô, a tindi mbahenen nav

³ve za pine Un er: Ka We Un u U lu van ne, shin se ver ishima sha ugenee?

⁴Yesu gema kaa a ve er: Yem, za ôr nen Yohane akaa a ne ongo man a ne nenge yô;

⁵mbaapirashe mba nengen kera, man mbasombon mba zenden, wanger mbaamandev iyol, mbakondonato mba ungwan; mba nderen mbakpenev, man mba ôron mbaatsanev Loho u Dedoo.

⁶Man or u nana nôngo gbev ken a Mo ga yô, á saan nan iyol.

⁷Tsô mbala mba yemen kera yô, Yesu hii u ôron ikpelaior kwagh u Yohane, A kaa er; Ne za ken taaikôngo ner, né za nenge nyi? Ka ijinga i ahumbe a tenger a mi la shinii?

⁸Man ne za ner, né nenge nyi? Ka or u haan akondo a ver vere? Yô, nenge, mba ve hee akondo a ver ver yô, mba ken uya mba utor.

⁹Kpa ne za sha u za nengen nyi? Ka profeti? Een, M ngu kaan ne, a hemba profeti kpaa.

¹⁰Gadia ka un je i nger kwagh na er: Nenge, M ngu tindin ortyom Wam sha ishigh You; u una sôr U gbenda sha hemen yô.

¹¹Mimi je, M kaan ne ne, mba kasev ve mar ve cii, or môm je mough u nan hembe Yohane u eren batisema icivir ga; nahan kpaa, or u ken tartor u Sha u nan hembe gban ijime la nan hemba un.

¹²Hii sha ayange a Yohane u eren batisema zan zan hegen ne, mba eren a tartor u Sha sha igosor; mbaeren kwagh sha igosor kpaa mba ngohol u sha agee.

¹³Gadia uprofeti cii man atindi ôr kwaghôron u profeti zan zan ar hen Yohane.

¹⁴Man a lu ne ka ne rumun yô, ngun ka Eliya u a lu van je ne.

¹⁵U nan lu a ato a ungwan yô, nana̱ ungwa.

¹⁶Man ka sha nyi je Me kar kov ne a mini? Ngu er mbayev mba ve tem sha ityembekasua, ve yer mbakwav vev,

¹⁷ve kaan er: Se tôngo ne imar, kpa ne vine amar ga; se gber kwelegh, kpa ne ta ave vanger ga.

¹⁸Gadia Yohane va, lu yan kwagh ga, lu man kwagh kpaa ga, kpa mba kaan er: Ngu a jijingi u bo.

¹⁹Wan u or va, ye kwagh shi me kwagh, kpa mba kaan er: Nenge, or u kumbur hua sha kwaghyan, man or u eren hua sha msôr, ka huror u mbangoholkpandegh kua u mbaasorabo. Kpa mfe zua a ishô sha aeren a na ve.

²⁰Tsô a hii u kôhôn agar ne ashe a A hembe eren ityom i ageegh ker la, sha ci u ve gem asema ga yô.

²¹A kaa er: We Korashin, kwagh á tser u, we Betesaida, kwagh á tser u; gadia a lu ken Tiru man Shidon man a er akaa a ageegh a i er ken a ven nahan ne yô, ma ve zamber ma ve hee ajav iyol kua mtwem ngise je.

²²Kpa M ngu kaan ne, sha iyange ijir yô, guda Tiru man Shidon a ven.

²³Man we Kapernahum, á kende u sha aôndo jee? ka shin Hade ú za ye; gadia a lu ken Sodom man a er ityom i ageegh er i er ken a we nahan ne yô, ma a lu her zan zan nyian ne.

²⁴Kpa M ngu kaan ne, sha iyange i ijir yô, guda tar u Sodom a we.

²⁵Hen shighe la Yesu gema kaa er: M ngu sughun We, Tere, Ter u Sha man tar, sha er U yer mbafankwagh man mbakavenkwagh akaa ne, kpa U gem U pase anikundanev a yô.

²⁶Een, Tere! Kape i doo U ken ishima je la.

²⁷Akaa cii Terem gema a, wam sha ikev, man shi ma or fa Wan ga, saa Ter tseegh, man shi ma or fa Ter kpaa ga, saa Wan, man shi hanmô u Wan A we ishima u pasen nan yô.

²⁸Va nen her a Mo, ne mba i ver ne iyol cii, ikav mbi yoho ne kpaa, Mo me na ne mmem.

²⁹Tôô nen igbur Yam sha ayol a en, va hen nen kwagh sha ikev Yam, gadia M ngu ishima legh legh, man M kehen ityough kpaa ga, tsô né zua a mmem ken asema a en;

³⁰gadia igbur Yam leghem man ikav Yav kpaa peese.