Read tiv Mateu 12 Bible Online

Mateu 12 - tiv bible

Mateu 12

¹Hen shighe la Yesu lu zenden karen ker atô u sule u alakema sha iyange i memen; ijen kôr mbahenen Nav; tsô ve gba kever asagher, yan.

²Man er Mbafarishi nenge kwagh la yô, ve kaa a Na er: Nenge, mbahenen Ou mba eren kwagh u i rumun er i̱ er sha iyange i memen ga yô.

³Kpa A kaa a ve er: Ne ôr kwagh u Davidi lu er shighe u ijen kôr un kua mba ve lu a na imôngo la gaa,

⁴er a nyôr ken iyou i Aôndo, a ya ubredi mba sha ishi mba i rumun er un kua mba ve lu a na ityô la ve̱ ya ga, saa upristi tseegh la gaa?

⁵Sha iyange i memen upristi mba ken tempel ka ve vihi iyange i memen, kpa ve lu a ishô, ne mba a ôr kwagh ne ken atindi nahan gaa?

⁶Kpa M ngu kaan ne, u A hembe tempel icivir ngu heen.

⁷Man aluer nea fe inja i kwagh ne er: Ka mhôônom ma zungwen ma doom ye, ka nagh ku nan ga, yô, ma ne ne mbalun a ibo ga la ibo dang nahan ga;

⁸gadia Wan u or ka Ter u iyange i memen je.

⁹Tsô A mough heregh A nyôr ken shinagoge ve.

¹⁰Yô, orgen lu her nan uma uwegh; ve pine Un sha u zuan a ityôikaa i vea haa Un ibo yô, ve kaa er: I rumun u i̱ been angev sha iyange i memene?

¹¹Kpa A kaa a ve er: Ka hanmô wen nana lu a waniyôngo, man aluer una gba shin ihungwa sha iyange i memen yô, nana kôr un, nana dugh sha ga?

¹²Or hemba waniyôngo inja kpishi gaa? Nahan i rumun u eren kwagh u doon sha iyange i memen je.

¹³Tsô A gema A kaa a or la er: Naregh uwegh ough kura. A naregh; tsô ku hingir dedoo er kugenegh kura nahan.

¹⁴Nahan Mbafarishi due, gba tumen idyu sha a Na, er vea er man vea wua Un yô.

¹⁵Man er Yesu kav nahan yô, A mough heregh kera; ior kpishi dondo sha a Na; A bee ve angev cii;

¹⁶man A ta ve icin er, ve̱ de pasen Un ken igbar ga;

¹⁷sha er kwagh u profeti Yesaia lu kaa la a̱ kure sha mi vough yô, er:

¹⁸Nenge Wanakiriki Wam u M tsough Un, u ishima ishima, u ishima i doom a Na yum yô, Me ver Jijingi Wam sha a Na, Una yôô ijir her akuraior.

¹⁹Una er num ga, ayôôso kpaa Una yôôso ga; ma or nana ungwa imo Na sha gbenda kpaa ga.

²⁰Ijinga i hemben Una sombo i ga; mou u imenger u yughur mnyim kpaa, Una pir ga, zan zan Una za a ijir hemen, á ar sha mhembe.

²¹Ka sha iti Na je man akuraior aa veren ishima á keghen ye.

²²Tsô i va Un a orgen u nan lu a jijingi u bo, nan pir ashe, nan kondo iker kpaa. A bee nan angev mbula; tsô orkondoniker la ôr kwagh, shi gba nengen kera kpaa.

²³Kpiligh ikpelaior cii iyol, ve kaa er: Ngun ka Wan u Davidi ne gaa?

²⁴Kpa Mbafarishi mba ongo nahan yô, ve kaa er: Un gbe dughun ujijingi mba bov kera ga, saa di sha Belesebu, tor u ujijingi mba bov la.

²⁵Man er A fa mbamhen vev yô, A kaa a ve er: Hanma tartor u u pav sha ihom yô, á tim u kera. Man shi hanma gar shin hanma ya u a pav sha ihom yô, una lu ga.

²⁶Man aluer Satan una dughun Satan kera yô, a pav iyol na ve; yô, á er nan man tartor na ua shi á luu?

²⁷Man aluer Mo M dughun ujijingi mba bov kera sha Belesebu yô, ônov enev di ka sha an ve dughun ve kera? Ka nahan man vea lu mbaôron ne ijir ye.

²⁸Kpa aluer ka sha Jijingi u Aôndo man M dughun ujijingi mba bov kera yô, tartor u Aôndo va hen a ven je ve.

²⁹Shin á er nan man or á fatyô u nyôron ken ya u ortaveryol, nana kura un inyaregh, saa nana vande kangen ortaveryol la, man nana mase kuran ikav mbi ken ya na la, gaa?

³⁰U nan lu nongo a Mo ga yô, nan ngu ihom a Mo, man u nan kohol a Mo ga yô, nan ngu saren a sar.

³¹Kape i lu man M kaan ne Mer: Hanma isholibo man hanma ityuhwanev kpaa á de ior; kpa ityuhwanev mbi i toho Jijingi yô,á de ior mayange ga.

³²Man shi hanma or u nana ôr kwagh sha Wan u or geseghee kpaa á de nan kwagh la; kpa hanma or u nana ôr kwagh geseghee sha Icighan Jijingi yô, á de nan kwagh la mayange ga, sha ayange ne kua a a lu van ken hemen la kpaa.

³³Gema nen kon u̱ lu u dedoo, atam a u kpaa a̱ lu a dedoo; gayô, gema nen kon u̱ lu u bo, atam a u kpaa a̱ lu a bo; gadia ka sha atam a kon man i fe u min ye.

³⁴Ne ônov mba igbindev, á er nan man ne mba ne lu mbaaferev, né ôr akaa a doono? Gadia ka sha m-iv u ken ishima man zwa u er kwagh ye.

³⁵Orinjaa ka nan due a akaa a dedoo ken kwagh u ikoogh u ken ishima la je; orbo ka nan due di a akaabo ken kwagh u bo u ken ishima la je.

³⁶Kpa M ngu kaan ne: Hanma kwaghôron u dang u ior ve er, á pine ve kwagh sha mi sha iyange i ijir, vea ôr je.

³⁷Gadia ka sha akaaôron a ou kpaa á kure kwagh wou á na u ibo kpaa ye.

³⁸Tsô mbagenev ken mbangeren man Mbafarishi gema kaa a Na er: Ortesen, sar se pe ma U er ivande ma se nenge.

³⁹Kpa A gema A kaa a ve er: Kov u idya ne ngu keren ivande, kpa á na u ivande ga, saa di ivande i profeti Yona tsô.

⁴⁰Gadia er Yona lu ken iyav mbu zegeishu ayange atar man aime atar nahan, kape Wan u or kpaa Una tsa shin semanyaagh ayange atar man aime atar je la.

⁴¹Ior mba ken Nineve vea nder a kov ne imôngo sha iyange i ijir, vea na u ibo; gadia lu ve gema asema sha kwaghaôndo u ôron u Yona; yô, nenge, u A hembe Yona icivir Ngun heen ne.

⁴²Torkwase u ken imbusutariyan una nder a kov ne sha iyange i ijir, man una na u ibo; gadia a due ken akighir a tar, a va sha u ungwan mfe u Solomon. Yô, nenge, u A hembe Solomon icivir Ngun heen ne.

⁴³Kpa jijingi u hôngorough ka una due ken or yô, a karen ken ajir a mngerem ma lu ga, a keren mmem, kpa a zua a min ga.

⁴⁴Nahan a kaan er: Me hire hen ya wam ape m dugh la. Una va aren yô, a kohol i liang, i ese, i sôr doo doo kpaa.

⁴⁵Tsô a yem a za kua a ujijingi mbagenev utaankaruhar mba ve hembe un ifer yô, ve nyôr ve tema keregh; man mlu u masetyô u or la a hemba gban kera a u hiihii la. Kape kwagh u kov u ifer ne kpaa una lu la.

⁴⁶Er lu ôron kwagh a ikpelaior ave la yô, ngô na kua anngôôv Nav ve tile lu ken won, lu ve ka ôron kwagh a Na.

⁴⁷Orgen kaa a Na er: Nenge, ngôu kua anngôôv Ou ve tile ken won, ka ve ka ôron kwagh a We.

⁴⁸Kpa A gema A kaa a or u a kaa Un loho la er: Ka an nan lu ngômô? Man ka unô ve lu anngôôv ava?

⁴⁹A gema A vishigh uwegh sha mbahenen Nav, A kaa er: Nenge ngôm kua anngôôv Av mban.

⁵⁰Gadia hanma or u nan eren ishima i Terem u A lu Sha yô, ka nan je nan lu anngôm u nomso man anngôm u kwase man ngôm kpaa ye.