Read tiv Mateu 14 Bible Online

Mateu 14 - tiv bible

Mateu 14

¹Hen shighe la Herode u tetera ungwa gwa u Yesu.

²Tsô a kaa a mbayev nav er: Ngun ka Yohane u eren batisema; a nder shin mbakpenev, ka sha ci u nahan man akaa a ageegh ne a eren ken a Na ye.

³Gadia Herode lu kôr Yohane, kange, wa ken gaadi sha kwagh u Herodia, kwase u anngô na Filibu.

⁴Gadia Yohane kaa a na er: U ngu a na nahan ka sha mi ga.

⁵Nahan lu un ka wuan un kpa a cia ikpelaior, gadia ve fa er a lu profeti je yô.

⁶Kpa sha iyange i umbur mmar u Herode la, wan u Herodia u kwase va vine amar sha ishiv vev, nahan doo Herode.

⁷Tsô a maa a tôndo zwa sha mbum je er, una na un hanma kwagh u una sôn yô.

⁸Yô, er ngô na vande wan un kwagh kera yô, a kaa er: Nam ityough ki Yohane u eren batisema shin gbande heen je.

⁹Nahan ishima vihi tor kpishi; kpa sha ci u mbum na la, man sha ci u mba ve tem hen kwaghyan la yô, a kaa er, i̱ gba nan un tsô.

¹⁰Tsô a tindi, i za gber Yohane ityough ken gaadi.

¹¹I va a ityough nagh shin gbande, i va na wankwase la; wen gema za a mi hen ngô na.

¹²Tsô mbahenen nav va, va tôô gundu na, za ii, nahan ve yem ve za kaa Yesu.

¹³Er Yesu ungwa nahan yô, A nyôr shin tsô, A mough her kera A za hen ijir igen henpe or lu ga, Un tswen. Man er ikpelaior ungwa nahan yô, ve due ken agar, ve za a Na ityô sha angahar.

¹⁴Tsô Yesu dugh yô, A nenge a ikpelaior kpishi; nahan mhôônom kôr Un a ve, A bee mbauangev vev angev.

¹⁵Tsô iyange i been yô, mbahenen Nav va her a Na, va kaa er: Or ngu hen ijiir ne ga, man shighe kpaa kar hegen; yô, na ikpelaior gbenda ve yem ken angarev ve za yam kwaghyan.

¹⁶Kpa Yesu kaa a ve er: Ve̱ de ze ga; ne, na nen ve kwagh ve̱ ya.

¹⁷Kpa ve kaa a Na er: Se mba a ubredi utaan man ishu ihiar heen tsô.

¹⁸A kaa a ve er: Va nen a mi her a Mo.

¹⁹A yôô er, ikpelaior i̱ haa inya sha adeghatoho. Tsô a A tôô ubredi utaan man ishu ihiar la, kenden ashe sha yô, A sugh, maa A coon ubredi mbala A na mbahenen, mbahenen gema na ikpelaior.

²⁰Ve cii ve ya, kuma ve; ve kohol avur a a shi yô, iv akese pue kar ahar.

²¹Mba ve ya yô, nomso lu er dubu utaan nahan, i wa kasev kua mbayev ker ga.

²²Fese nahan a tolough a mbahenen Nav er ve̱ nyôr shin tsô, ve̱ hira hemen ve̱ per yande la; Wen iyol Na yô, Una na ior gbenda ve̱ yem ve.

²³Ne ikpelaior gbenda kera yô, A unde sha uwo, Un tswen, sha u za eren msen. Iyange i mir yô, lu her tswen.

²⁴Man tso la lu zan ken atô u zegemnger, mngerem lu kpianger a na sha ci u ahumbe lu van ve sha hemen yô.

²⁵Ka kom er ahwa atar a utu nahan yô, Yesu va her a ve, lu zenden sha kwavmnger.

²⁶Er mbahenen nenge a Na lu zenden sha kwav u zegemnger yô, cier ve iyol, ve kaa er: Ka ormbakuv! Tsô ve genger amo sha mcie.

²⁷Kpa Yesu ôr kwagh a ve, kaa er: Taver nen ishima, ka Mo, de kera cie nen ga.

²⁸Peteru gema kaa a Na er: Tere, a lu We yô, kaam m̱ va her a We sha kwavmnger.

²⁹A kaa er: Va! Tsô Peteru due shin tsô, gba zenden sha kwavmnger zan hen Yesu.

³⁰Kpa nengen ahumbe nga taver yô, a cia; gbe miren yô, a genger imo, a kaa er: Tere, yimam!

³¹Fese nahan Yesu naregh uwegh Nagh, kôr un, kaa a na er: We u u lu a anjighjigh u nan kpeghee ne, ka nyi u te akperana?

³²Mba nyer ken tso yô, ahumbe de.

³³Mba ve lu ken tso la, ve gure ve civir Un, ve kaa er: Mimi je U ngu Wan u Aôndo.

³⁴Mba peren yande la yô, ve ar sha tar u Genesareti.

³⁵Man er ior mba ken ijiir la kav Un yô, ve tindi hen tar u u kase her la cii ve va a mba ve lu dedoo ga la cii her a Na.

³⁶Ve zamber a Na er, A̱ rumun ve, ve̱ bende mkaikondo Na tsô. Mba ve bende cii yô, angev bee ve.