Read tiv Mateu 19 Bible Online

Mateu 19 - tiv bible

Mateu 19

¹Tsô zum u Yesu kure akaaôron ne yô, A mough ken Galilia, A va ken veghertar u Yudia yande Yordan.

²Ikpelaior kpishi dondo sha a Na, A bee ve angev ker.

³Tsô Mbafarishi mbagenev va her a Na, gba va karen Un kaan er: I rumun u or nana̱ pav a kwase u nan sha hanma ityôikaa shinii?

⁴A gema A kaa er: Ne mba a ôr kwagh u i nger la gaa, er Un u A er ve sha hiihii la je, A er ve nomsoor kua kwase;

⁵man A kaa er: Ka sha ci u nahan man nomsoor nana undu ter u nan man ngô u nan, nana var ken kwase u nan, ve uhar vea hingir iyôgh i môm ye gaa?

⁶Nahan yô, mayange ve kera mba uhar ga, kpa ka iyôgh i môm je. Kwagh u Aôndo je zua yô, or a̱ de kera paven un ga.

⁷Ve kaa a Na er: Tsô er nan man Mose lu na tindi er i̱ na takerada u ivaa i paven, shi i̱ pav a na kpaa ase?

⁸A kaa a ve er: Ka sha ci u mcighir u asema a en man Mose gba rumun tsô er, ne̱ pav a kasev enev ye, kpa sha hiihii je yô, lu nahan ga.

⁹Kpa Mo M ngu kaan ne Mer: Hanma or u nana pav a kwase u nan, kpa a lu sha ci u idya ga man nana gema á er kwase ugen yô, ka idya je nan er ye.

¹⁰Mbahenen Nav kaa a Na er: Aluer kape kwagh u nom a kwase a lu la yô, guda u lun kwav.

¹¹Kpa A kaa a ve er: Ka ior cii man vea fatyô u rumun kwagh ne ga, saa mba i ne ve yô.

¹²Gadia mbagenev ka u vea er kwase ga, i mar ve a mar nahan je; shi mbagenev ka u vea er kwase ga, ka ior ve gem ve ve hingir nahan ye; man shi mbagenev di yô, ka u vea er kwase ga, ve er nahan ayol a ve je sha ci u tartor u Sha. U nan fetyô u rumun kwagh ne yô, nana̱ rumun.

¹³Tsô i va a mbayev mba kiriki her a Na er A̱ penda ve ave sha ityou, A̱ er msen; kpa mbahenen gema zôhô a ve.

¹⁴Kpa Yesu kaa er: De nen mbayev mba kiriki, de kera yangen nen ve u van her a Mo ga, gadia ka anza a mban ne je tartor u Sha u lu u ve ye.

¹⁵Tsô A penda ve ave sha ityou man A mough keregh ye.

¹⁶Yô, orgen va her a Na va kaa er: Ortesen u dedoo, ka nyi tom i dedoo me er sha u me zua a uma u tsôrono?

¹⁷A kaa a na er: Ka nyi u pinim sha kwagh u a lu u dedoo? U A lu u dedoo yô, ngu môm tsô. Kpa á sar u ka nyôron ken uma yô, kura atindiakaa.

¹⁸A pine un er: Hanmô? Yesu kaa er: De woo or ga; de eren idya ga; de iin ga; de we or aie iyol ga;

¹⁹civir teru man ngôu; man shi: Or u nan we ndor a we yô, nana̱ doo u ishima er we iyol you nahan.

²⁰Wanyekwaor la kaa a Na er: Angan cii, m kura a, shi ka nyi i shimi?

²¹Yesu kaa a na er: A lu u ka lun vough yô, za za tôô akaa a u lu a mi, tee, na mbaatsanev, tsô ú lu a kwagh u injaa Sha; yô, hide va dondo sha a Mo.

²²Kpa er wanyekwaor la ungwa kwaghôron la nahan yô, a yem a ishima i vihin, gadia lu a inyaregh kpishi.

²³Tsô Yesu kaa a mbahenen Nav er: Mimi je M kaan ne ne, ka ican u ornyar a̱ nyôr sha tartor u Sha.

²⁴Man shi M kaan ne Mer: Guda u rakumi á kar ken ihura i anura, a u ornyar nana̱ nyôr sha tartor u Sha.

²⁵Er mbahenen ungwa kwagh ne nahan yô, kpiligh ve iyol kpishi, ve kaa er: Tsô ka an je man á yima nana?

²⁶Kpa Yesu gem kenger ve yô, kaa a ve er: Or yô, fe kwagh ne ityô ga, kpa Aôndo yô, fe akaa cii ityô.

²⁷Tsô Peteru gema kaa a Na er: Yô, nenge ase, se undu akaa cii, se dondo U, nahan ka nyi je sé va zua a mini?

²⁸Yesu kaa a ve er: Mimi je M ngu kaan ne, ne mba ne dondo sha a Mo ne, sha mgbe u he, zum u Wan u or Una tema sha ikônough Nagh ki torough ki engem la yô, ne kpaa, né tema sha mkônom ma torom pue kar mhar, ne ôr ikwe i Iserael i pue kar ihar la ijir.

²⁹Man shi hanmô u nan undu uya shin anmgbianev mba nomso, shin mba kasev, shin ter, shin ngô, shin ônov, shin ishule sha ci u iti Yam yô, nana shi á zua a mi kwa akunduatar shi nana zua a uma u tsôron kpaa.

³⁰Kpa ior kpishi mba ve lu mbahiihii vea hingir mbamasetyô, mbamasetyô di vea gema á hingir mbahiihii.