Read tiv Mateu 20 Bible Online

Mateu 20 - tiv bible

Mateu 20

¹Gadia tartor u Sha ngu er orya u a dugh pepe je sha u keren mbatomov mba vea yar un sule yô.

²Tsô er a zua zwa a mbatomov mbala sha u nan hanmô ve sule môm sha iyange i môm yô, a kaa a ve er, ve̱ za yar sule.

³Ka kom er ahwa ataankaranyiin nahan yô, a shi a due, a nenge mbagenev, tile sha tembekasua gbilin.

⁴Mbala kpaa A kaa a ve er: Ne kpaa yarem nen sule, man kwagh u a kom yô, me na ne. Tsô ve yar.

⁵A shi a due iyange sha tembe, man ahwa atar nahan, a shi a er er ashen nahan.

⁶Shi ka kom er ahwa ataan aikighe nahan yô, a due a kohol mbagenev atile, a kaa a ve er: Ka nyi man ne shi heen ne gbe tilen gbilin nahana?

⁷Ve kaa a na er: Ka sha ci u or tee se tom sha tôndo ga yô. A kaa a ve er: Yô, ne kpaa yarem nen sule.

⁸Iyange i been yô, orsule la kaa a wanakiriki na u vesen er: Yila mbatomov mbala, kimbi ve, hii hen mbamasetyô la, za kure sha mbahiihii mbala.

⁹Tsô er mbala mba i ôr injar a ve sha shighe u ahwa ataan la za va yô, hanmô ve ngohol gbenger sule.

¹⁰Mbahiihii mbala mba ve yô, ve lu henen er, ve yô, vea ngohol á hemba nahan. Man ve kpaa i na hanmô ve gbenger sule tsô.

¹¹Mba ngohol yô, ve gba ahon a orya la,

¹²ve kaa er: Mbamasetyô mban ve er di tom ihwa i môm tsô, kpa u ver ve a vese vough, se mba se lu homon tom, se ye ican sha oo.

¹³Kpa a gema a kaa a ugen ken ve er: Ikar, m nzughul a we ga, ka sule môm se zough zwa sha mi gaa?

¹⁴Tôô kwagh u a lu u wou yô, yem! Ka ishima yam u nan u masetyô ne vough a we.

¹⁵M ngu a ian i eren ishima yam sha kwagh wam gaa? Shin ka vihin we er mo m lu or u iwua yôô?

¹⁶Kape mbamasetyô vea hingir mbahiihii; mbahiihii kpaa vea gema á hingir mbamasetyô la.

¹⁷Tsô Yesu ngur yemen zan sha Yerusalem yô, A kua a mba pue kar uhar mbala, a ta ibalegh a ve sha gbenda, A kaa a ve er:

¹⁸Nenge, se mba zan sha Yerusalem; man á za na Wan u or sha ikev i upristi mba tamen man mbangeren; vea ôr Un ijir i kuugh je,

¹⁹vea na Un sha ikev i atôatyev sha u ve̱ naha Un tar ve̱ gbidye Un akpa, ve̱ mande Un sha terankon kpaa, man sha iyange i sha utar la á nder Un.

²⁰Tsô ngô u ônov mba Sebedeu va her a Na a ônov nav, va gure Un inya sha u sônon Un kwagh.

²¹A pine un er: Ka nyi i̱ sar uwe? A kaa a Na er: Kaa, ônov av mba uhar mban ve tema a We, u môm ken uwegh ku yanegh, u môm ken ku imesegh sha tartor Wou.

²²Kpa Yesu gema kaa er: Ne fa kwagh u ne sen ga. Ne fatyô u man iyongo i Me ma i la kpa? Ve kaa er: Se fatyô.

²³A kaa a ve er: Iyongo Yam yô, né ma kpee; kpa u teman a Mo ken uwegh Agh ku yanegh man ku imesegh yô, ka kwagh Wam er Me na kera ga, kpa ka sha ci u mba Terem A ser ijiir la sha ci ve yô.

²⁴Zum u mba pue mbala ungwa nahan yô, asema gba vihin ve a anmgbianev mba uhar mbala.

²⁵Kpa Yesu yila ve her a Na, kaa er: Ne fa er utor mba ken atôatyev ka ve manger sha a ve, man mbatamen vev kpaa ve eren tahav sha a ve;

²⁶kpa her a ven yô, i̱ de lu nahan ga; kpa hanmô u i sar nan ka lun u vesen ken a ven yô, nana̱ hingir wanakiriki wen.

²⁷Man shi hanmô u i sar nan ka lun u hiihii ken a ven yô, nana̱ hingir wanakiriki wen,

²⁸er Wan u or kpaa A ve, i lu sha u i̱ er Un tom ga, kpa sha u Un Una er mbagenev tom man Una na uma Na á hingir ipaan sha ci u ior kpishi yô.

²⁹Tsô mba ngur duen ken Yeriko yô, ikpelaior i kpishi dondo sha a na.

³⁰Mbaapirashe uhar tema hen kpegbenda. Tsô er ve ungwa er Yesu lu karen yô, ve genger amo, ve kaa er: Zungwe se mhôônom, Tere, Wan u Davidi!

³¹Ikpelaior la gema yange ve er ve̱ huan ayôôso; kpa ve seer a seer genger amo kaan er: Zungwe se mhôônom, Tere, Wan u Davidi!

³²Tsô Yesu tile, yila ve kaa er: Ka nyi i sar ne u ma M er ne?

³³Ve kaa a Na er: Tere, ashe ma a bugh se.

³⁴Er mhôônom kôr Yesu a ve kpishi yô, A bende ve ave sha ashe; fese nahan ve gba nengen kera, ve dondo sha a Na.