Read tiv Mateu 21 Bible Online

Mateu 21 - tiv bible

Mateu 21

¹Zum u ve va ngbôghom a Yerusalem er ve ar hen Betefage hen uwo u Olev yô, Yesu tindi mbahenen uhar,

²kaa a ve er: Za nen hen wangar u a lu ne ken hemen la; né za nyôron a nyôr je tsô, né kohol ngôjaki i zer un, a wan ityô. Sagh nen ve, vam nen a mi.

³Man aluer anti or nana ôr ma kwagh a ven yô, kaa nen ner: Kwagh gba Ter a ve: tsô nana tindi a mi fese.

⁴Akaa ne er sha u kwagh u profeti lu kaa la a̱ kure sha mi vough er:

⁵Kaa nen wankwase u Shion ner: Nenge, Tor wou ngu van her a we, ngu a ishima i legh legh, a henda ngôjaki man wan, ka wan u jaki.

⁶Mbahenen mbala za, za er er Yesu kaa ve nahan.

⁷Ve va a ngôjaki a wan, ve penda akondo a ve sha mi; A henda sha mi.

⁸Ikpelaior i kpishi samber akondo a ve sha gbenda, mbagenev gber ahu a ikon, samber sha gbenda.

⁹Ikpelaior i zan Un sha hemen man i dondon Un ken ijime, ve gba genger amo, kaan er: Hosana Wan u Davidi, i̱ wuese Un u A ve ken iti i Ter la; Hosana sha Usha mba hemban gban ica la.

¹⁰Za nyer ken Yerusalem yô, gar cii nzughul, ve gba kaan er: Ka hanmô ne?

¹¹Ikpelaior kaa er: Ngun ka profeti Yesu, u A dugh ken Nasareti u ken Galilia la.

¹²Yesu nyôr ken tempel u Aôndo, zenda mbateenkwagh man mbayamenkwagh ken tempel cii kera, A mgbegha utebul mba mbamusaninyaregh man mkônom ma mbateenmkungum kera kpaa.

¹³A kaa a ve er: I nger er: Á yila iyou Yam er iyou i msen; kpa ne yô, ne gema a mi, hingir bar u mbanumunior.

¹⁴Mbaapirashe man mbasombon va her a Na ken tempel nahan A bee ve angev.

¹⁵Kpa zum u upristi mba tamen man mbangeren ve nenge ityom Na i kpiligh iyol i A er, man mbayev kpaa mba ve lu genger amo ken tempel kaan er: Hosana Wan u Davidi, yô, asema vihi ve.

¹⁶Ve kaa a Na er: U ungwa kwagh u mban ve lu ôron ne kpa? Yesu kaa a ve er: Een! Mayange ne mba a ôr kwagh u i nger la er: Ka ken zwa u anikundanev man mbamanatumba U sôr iwuese ye, gaa?

¹⁷Tsô A undu ve, A due ken gar, A yem ken Betani A za tsa ker.

¹⁸Tsô ngur hiden ken gar pepe yô, ijen kôr Un.

¹⁹Nengen a itine i tur sha kpegbenda yô, A za hen i kpa A zua a ma ityamegh sha mi ga saa ika tseegh; A kaa a i er: Mayange ú kera ume atam sha won ga. Tsô kon la maa uma gyoghokoko.

²⁰Mbahenen mba nengen nahan yô, kpiligh ve iyol, ve kaa er: Er nan man tur ne a om gyoghokoko yum nahana?

²¹Yesu gema kaa a ve er: Mimi je M kaan ne, aluer ne lu a jighjigh u nan man né ta akpelan ga yô, ka kwagh u a er tur ne nahan tseegh né er ga, kpa á lu uwo ne je kpaa, né kaa u ner: Mough, gba shin zegemnger kpaa á lu nahan je.

²²Akaa a ne sôn ken msen cii, né ngohol, aluer nea na jighjigh yô.

²³Tsô nyer ken tempel yô, upristi mba tamen man mbatamen mba nongoior la va her a Na zum u A lu tesen ave la, ve kaa er: Ka sha tahav mbu nyi man U eren akaa ne? Man ka anti nan ne U tahav mbunu?

²⁴Yesu gema kaa a ve er: Mo kpaa Me pine ne kwagh môm tsô, aluer nea kaam yô, Mo kpaa Me kaa ne tahav mbu M eren akaa ne sha mi yô.

²⁵Batisema u Yohane la yô, ka han a dughu? Ka Sha a dugh shin ka hen ioro? Ve gba henen ayol a ve er: Aluer sea kaa ser: Ka Sha yô, Una kaa a vese er: Ka nyi ne na un jighjigh ga?

²⁶Man aluer sea kaa ser: Ka hen ior, yô, se mba cian ikpelaior, gadia ve cii ve fa er Yohane lu profeti mimi je yô.

²⁷Tsô ve gema ve kaa a Na er: Se fa ga! Un kpaa A kaa a ve er: Mo kpaa Me kaa ne tahav mbu M eren akaa ne sha mi ga.

²⁸Ne mba nengen nana? Orgen lu a ônov uhar mba nomso; a va hen u hiihii la, a kaa er: Wan wam, yarem sule nyian.

²⁹A gema a kaa er: Tere, me yar; kpa a kera yar ga.

³⁰A va hen ugen la a kaa un nahan kpaa. Ngula gema kaa er: Kam pe yaren ga. Kpa ken masejime yô, ishima gema un, a yar.

³¹Nahan ken ve̱ mba uhar mbala, ka an nan er ishima i ter na? Ve kaa er: Ka u masejime la. Yesu kaa a ve er: Mimi je, M ngu kaan ne, mbangoholkpandegh man udyambaiorov mba vanden nyôron tartor u Aôndo a ven.

³²Gadia Yohane va hen a ven sha gbenda u perapera, kpa ne na un jighjigh ga; kpa ve mbangoholkpandegh man udyambaiorov yô, ve na un jighjigh; man er ne nenge nahan kpaa, ne kera hire ne vaa afanyô ne na un jighjigh ga.

³³Ungwa nen injakwagh igen ne: Orya ugen er sule u wain, wa u gar, time ihungwa i shoghol wain ker, shi maa gôgôyou u taven sha sha u kuran u kpaa, tsô a gema u a na sha ikev i mbashirensule sha tôndo, maa a mough a yem tar ugen.

³⁴Shighe u atam a wain la kom yô, a tindi mbayev nav hen mbashirensule mbala, er ve̱ za ngohol un atam a wain.

³⁵Kpa mbashirensule mbala kôr mbatomov mbala ve gbidye ugen, ve wua ugen, ve ta ugen awen.

³⁶A shi a tindi mbayev mbagenev hemba ngeen a mba tsuaa mbala; ve shi ve er a ve nahan kpaa.

³⁷Kpa ken masetyô la, a tindi ve a wan na, a kaa er: Wan wam yô, vea wa un iko.

³⁸Kpa mbashirensule mbala mba nengen a wan la yô, ve kaa ayol a ve er: Ngun ka u dyako je ne; se wua nen un, se ngohol nen dyako na.

³⁹Nahan ve kôr un, ve za gbihi shin ikpisule, ve wua.

⁴⁰Tsô or u sule la, una va yô, una er a mbashirensule mbala nana?

⁴¹Ve kaa a Na er: Una tim undangmbaiorov mbala sha ku u vihin, una gema u á na sha ikev i mbashirensule mbagenev mba vea na un atam sha shighe u a um yô.

⁴²Yesu kaa a ve er: Shin icighanruamabera ne, ne ôr un gaa? Er: Iwen i mbamaan ve venda i la, ka i je, i hingir i sha zongo ye, ka Ter je A er kwagh ne ye, gema ka kwagh u kpilighyol sha ashe ase.

⁴³Ka nahan man M kaan ne ye, á ngohol tartor u Aôndo hen a ven kera á na ikurior i ia ume atam yô. [

⁴⁴U nan gbe sha iwen ne yô, nana sombo njighe njighe; kpa hanmô u iwen ne ia gba sha a nan yô, ia her nan lighe lighe er vuulevu nahan.]

⁴⁵Tsô upristi mba tamen man Mbafarishi mba ongo injakwagh Na la yô, ve kav er i lu sha a ve A lu ôron nahan yô.

⁴⁶Kpa er ve lu nôngon u kôron Un yô, ve lu cian ikpelaior, gadia ve fa er A lu profeti yô.