Read tiv Mateu 22 Bible Online

Mateu 22 - tiv bible

Mateu 22

¹Yesu gema shi gba ôron ve kwagh sha anzaakaa, A kaa er:

²Tartor u Sha ngu er tor ugen u a er wan na iniongo i kwasehe.

³Nahan a tindi mbayev nav er, ve̱ za yila mba i lehe ve iniongo i kwasehe la, kpa lu ve pe van ga.

⁴A shi a tindi mbayev mbagenev, a kaa er: Za kaa nen mba i lehe ve mbala ner: Nenge, m yôr iwer cii, i sôngo abua man uicighan av; akaa cii kohol ve. Yô, yar nen iniongo i kwasehe.

⁵Kpa ve laha kera, ve yem akaa ve, u môm yar sule na, ugen za kasua na.

⁶Mbagenev mbala kôr mbayev mbala, er a ve dang dang man mase wuan ve ye.

⁷Nahan tor la yuwe, a tindi akumautya na a za tim mbawuanior mbala, a nande gar ve.

⁸Tsô a kaa a mbayev nav er: I yôr iniongo i kwasehe ve, kpa mba i lehe ve yô, ve kuma sha icivir ne ga.

⁹Yô, za nen sha akahar a igbenda, mba nea kohol ve cii, lôhô nen ve, ve̱ va hen iniongo i kwasehe.

¹⁰Mbayev mbala za sha igbenda za kohol mba ve zua a ve cii, mbabov man mbadedoo, nahan iyou i iniongo la iv a mbayaren iniongo.

¹¹Man er tor va nyôr sha u va nengen mba ve yar iniongo yô, a nenge orgen heregh u nan hee riga u iniongo ga yô.

¹²Tsô a kaa a na er: Ikar, er nan man u nyer heen a riga u iniongo ga? Kondo un iyol gbong.

¹³Tsô tor kaa a mbatomov er: Kange nen un ave kua angahar, gbihi nen ken ime i ken won. Keregh mliam maa lu kua anyi a yan kpaa.

¹⁴Gadia mba i lehe ve yô, ngee tsô, kpa mba i tsough ve yô, mba kpeghee.

¹⁵Tsô Mbafarishi yem, za zua, gba henen er vea er man vea kôr Un a ikaazwa yô.

¹⁶Ve tindi mbahenen vev man Mbaherode her a Na, ve kaa er: Ortesen, se fa U ngu Or u mimi, man U tesen gbenda u Aôndo sha mimi kpaa; U cie ma or ashe ga, gadia U nengen sha mlu u or er nan lu la ga.

¹⁷Yô, kaa ase, U nenge nana, u tan Shisar kpandegh ka sha mi shinii, ka sha mi ga?

¹⁸Kpa Yesu kav ifer ve, A kaa er: Ka nyi ne karen Mo, ne mbaatsereghev?

¹⁹Tesem nen inyaregh ki kpandegh. Ve na Un sule.

²⁰A pine ve er: Ityough kin man kwaghngeren ne ka u ana?

²¹Ve kaa a Na er: Ka u Shisar je. Tsô A kaa a ve er: Na nen Shisar akaa a a lu a Shisar yô, Aôndo kpaa na nen Un akaa a a lu a Aôndo yô.

²²Er ve ungwa nahan yô, kpiligh ve iyol, ve undu Un, ve yem.

²³Sha iyange la Mbasadushi mbagenev mba ve kaan er, mnder u shin ku ngu ga la, ve va her a Na, ve va pine Un,

²⁴ve kaa er: Ortesen, Mose kaa er: Aluer or nan kpe, nan undu wan ga yô, anngô u nan a̱ tôô kwase u nan la a̱ ver anngô na la tse.

²⁵Ior mbagenev lu ken vese utaankaruhar, ve lu ngô môm. U hiihii la er kwase, kpe; er ver tse ga yô, a undu anngô na a kwase la.

²⁶U sha uhar la kpaa nahan; u sha utar kpaa shi nahan; zan zan ar hen u sha utaankaruhar la.

²⁷Ken masejime la, kwase la iyol na kpaa kpe.

²⁸Nahan sha mnder u shin ku la, una lu kwase u an ken mba utaankaruhar mbala? Gadia ve cii lu ve er un.

²⁹Kpa Yesu gema kaa a ve er: Ne tsume er ne fe icighanruamabera man agee a Aôndo kpaa ga yô.

³⁰Gadia sha mnder u shin ku la mba eren kwase ga, mba ne kwase ken nom kpaa ga; kpa ka ve lu er mbatyomov mba Shaav nahan.

³¹Kpa sha kwagh u mnder u mbakpenev yô, ne mba a ôr kwagh u Aôndo lu kaa a ven la er:

³²Mo M ngu Aôndo u Aberaham man Aôndo u Isaka man Aôndo u Yakob kpaa, gaa? Aôndo ka Aôndo u mbakpenev ga, kpa ka u mbaumav.

³³Er ikpelaior ungwa nahan yô, kpiligh ve iyol a ityesen Na.

³⁴Man zum u Mbafarishi ungwa er A kusu Mbasadushi zwa nahan yô, ve kohol imôngo.

³⁵Tsô u môm ken ve, lu orfanatindi, pine Un sha u karen Un, kaa er:

³⁶Ortesen, atindi cii ka hanmô ker a lu tindi u tamena?

³⁷Yesu kaa a na er: Ter Aôndo wou A̱ doo u ishima a ishima you cii man a uma wou cii man a mfe wou cii.

³⁸Ngun ka tindi u tamen man ka u hiihii kpaa.

³⁹Man u sha uhar u a lu er un yô, or u nan we ndor a we yô, nana̱ doo u ishima er we iyol you nahan.

⁴⁰Ka atindi ahar ne je man atindi kua mbaprofeti cii ve har sha mi ye.

⁴¹Tsô er Mbafarishi kohol imôngo yô, Yesu pine ve kwagh,

⁴²A kaa er: Ne nenge sha kwagh u Kristu nana? Ka Wan u ana? Ve kaa a Na er: Ka Wan u Davidi je.

⁴³A kaa a ve er: Tsô er nan man Davidi lu yila Un ken jijingi er Ter, man kaa er:

⁴⁴Ter kaa a Terem er: Temam ken uwegh ku yanegh zan zan Me gema mbaihomov Ou ve̱ hingir We kwagh u pendan angahar sha mi?

⁴⁵Tsô aluer Davidi una yila Un er, Ter yô, er nan man Una gema A lu Wan na?

⁴⁶Nahan ma or kera fatyô u bughun zwa a Na ga; hii sha iyange la je zan zan ma or kera cihi u shi nana pine Un ma kwagh kpaa ga.