Read tiv Mateu 3 Bible Online

Mateu 3 - tiv bible

Mateu 3

¹Sha ayange la Yohane u eren batisema va, lu ôron kwaghaôndo ken taaikôngo u Yudia,

²lu kaan er: Gema nen asema, gadia tartor u Sha mgbôghom ve.

³Gadia ka un u profeti Yesaia lu ôron kwagh na er: Imo i oryilan ken taaikôngo er: Sôr nen gbenda u Ter, kôôm nen igbenda Na jighilaa.

⁴Yohane ne yô, ikondo na lu i sha aive a rakumi, man shi a zer kwange u ikôv shin iwenge; kwaghyan na gema lu mbaahungwa man shi iyough i ken toho.

⁵Nahan Yerusalem man Yudia cii man ikasentar u ifi u Yordan cii kpaa, ve due, ve za her a na;

⁶a er ve batisema shin ifi u Yordan, ve lu pasen asorabo a ve.

⁷Tsô er a nenge a Mbafarishi kua Mbasadushi kpishi lu van hen batisema ne yô, a kaa a ve er: Ne ônov mba igbindev mban, ka an man nan we ne kwagh er né yevese iyugh i i lu van la ase?

⁸Yô, ume nen ase ityamegh ki ki kom mgemshima yô;

⁹man shi de kera henen nen ayol a en ner, se mba a ter wase Aberaham ga; gadia m ngu kaan ne mer, awen ne je kpaa Aôndo Una fatyô u geman a̱ hingir ônov mba Aberaham.

¹⁰Hegen je kpaa i ver ijembe hen misekon; hanma kon u u um ityamegh ki injaagh ga yô, á gber u kera, á kende ken usu.

¹¹Mo yô, m ngu eren ne batisema sha mnger u sha mgemshima tsô, kpa Un u A lu van mo ken ijime la, A hembam agee, akôvangahar a Na tsô kpaa, m kuma u me tôô a ga; Wen yô, Una er ne batisema sha Icighan Jijingi man sha usu kpaa;

¹²tser ngu sha uwegh Nagh, Una ese vande Na tsembelee, Una kohol uwua Na, una za ombo sha una, kpa akoo yô, Una nande sha usu u pirin mayange ga.

¹³Tsô Yesu mough sha Galilia, za shin ifi u Yordan hen Yohane sha u a̱ er Un batisema yô.

¹⁴Kpa Yohane venda a Na, a kaa er: Ka mo man i gbem u ma m zough a batisema hen a We ye, man We, U gem U ve her a mo?

¹⁵Kpa Yesu gema kaa a na er: Kpa hegen yô, gba rumun tsô, gadia kape i doo u sé kure perapera cii vough je ne. Tsô a rumun a Na.

¹⁶Tsô er i er Yesu batisema kera yô, A due shin mnger fese, maa i bugh Sha man A nenge a Jijingi u Aôndo lu senen er ikungugh nahan, va tema sha a Na.

¹⁷Imo due Sha, kaa er; Ngun ka Wan Wam u ishima ishima, u i doom a na yum yô.