Read tiv Mateu 4 Bible Online

Mateu 4 - tiv bible

Mateu 4

¹Zum la Jijingi yem a Yesu ken taaikôngo, sha u diabolo a̱ za mee Un yô.

²Er A hôr kwaghyan ayange akunduahar man aime akunduahar yô, ken masejime ijen kôr Un.

³Tsô ormee va her a Na, kaa a Na er: Aluer Wea lu Wan u Aôndo je yô, kaa awen ne a̱ hingir bredi.

⁴Kpa A bugh zwa A kaa er: I nger er: Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô.

⁵Tsô diabolo yem a Na hen icighangar, za ver Un sha ityough ki tempel je,

⁶kaa a Na er: Aluer Wea lu Wan u Aôndo je yô, gba ase iyol You shin inya, gadia i nger er: Una wa mbatyomov nav kwagh sha a We, sha er U̱ de te nguhar sha iwen ga yô.

⁷Yesu gema kaa a na er: Yô, i shi i nger er: De karen Ter, Aôndo wou, ga.

⁸Shi diabolo yem a Na sha gôgôwo u taven tsung, tese Un ityartor i sha won cii kua icivir i i,

⁹tsô a kaa a na er: Akaa ne cii me na U, aluer Wea gure inya, Wea civir mo yô.

¹⁰Tsô Yesu gema kaa a na er: Yem kera, Satan, gadia i nger er: Civir Ter, Aôndo wou, ka Un tseegh er Un tom ye.

¹¹Tsô diabolo mough hen Na kera; tsô mbatyomov mba Shaav va, va wase Un.

¹²Tsô ongo er i wa Yohane ken gaadi yô, a hide ken Galilia;

¹³A mough ken Nasareti, A va A va tema ken Kapernahum u shin kpe u zegemnger, ken tar u Sebulon man Nafetali,

¹⁴sha er kwagh u profeti Yesaia lu kaa la, a̱ kure sha mi vough yô, er:

¹⁵Tar u Sebulon man tar u Nafetali, sha gbenda u zegemnger u peren Yordan la, Galilia u akuraior.

¹⁶Nongoior u u tem ken ime yô, ve nenge a iwanger i vesen, man mba ve tem ken tar kua mure u kuugh yô, iwanger due ta sha a ve.

¹⁷Hen shighe la je Yesu hii u ôron kwaghaôndo, gba kaan er: Gema nen asema, gadia tartor u Sha mgbôghom ve.

¹⁸Ngur teran hen kpe u zegemnger u Galilia yô, A nenge a anngôôv uhar, lu Shimon u i yilan er, Peteru la, man shi anngô na Anderia, ve lu haan ukper shi zegemnger, gadia ve lu mbakôron ishu.

¹⁹A kaa a ve er: Va, dondon nen sha a Mo, Me gema ne, né hingir mbakôronior.

²⁰Nahan ve undu ukper vev fese, ve dondo sha a Na.

²¹Karen heera yemen ken hemen yô, A shi A nenge a ior mbagenev uhar, lu anngôôv, ka Yakobu wan u Sebedeu man anngô na Yohane, ve lu ken tsô a ter ve Sebedeu imôngo, ve lu cingen ukper vev. A yila ve.

²²Nahan ve undu tso kua ter ve fese, ve dondo sha a Na.

²³Tsô Yesu zende ken tar u Galilia cii, lu tesen ken ushinagoge vev, lu ôron Loho u Dedoo u tartor, lu been ior hanma injauange man shi hanma mtseenem kpaa.

²⁴Gwa Na samber ken tar u Shiria cii, tsô ve va Un a mba ve lu dedoo ga la cii, lu mba angev atô kposo kposo man mnyoonom kôr ve yô, mbalun a ujijingi mba bov man mbagbanikungu man mbakpenalegh; A bee ve mbu cii.

²⁵Ikpelaior kpishi i ken Galilia man Dekapoli man Yerusalem kua ken Yudia man shi yande Yordan kpaa, dondo sha a Na.