Read tiv Mateu 8 Bible Online

Mateu 8 - tiv bible

Mateu 8

¹Tsô hongo sha uwo la yô, ikpilaior kpishi dondo sha a Na.

²Orimande va her a Na, va gure Un inya, kaa er: Tere, aluer Wea rumun yô, U fatyô u wanger mo.

³Nahan A naregh uwegh, A bende un iyol, A kaa er: M rumun, i̱ wanger we, fese nahan imande na wanger un.

⁴Yesu kaa a na er: Ver ishima, de kaan ma or ga, kpa yem za tese pristi iyol you, man na nagh ku Mose lu kaa la, i̱ lu ve mpase.

⁵Tsô Yesu nyer ken Kapernahum yô, torutya ugen va her a Na, va zamber a Na,

⁶kaa er: Tere, wanakiriki wam ngu yaven inya ken ya a angev mbu kpen alegh, ka nyoon un tsung.

⁷A kaa a na er: Me va, Me va bee un.

⁸Kpa torutya la gema kaa er: Tere, m kuma u Ú nyôr hen haav av ga, kpa ôr a ôr kwagh tsô, á wanger wanakiriki wam iyol je.

⁹Gadia mo kpaa m ngu or u m lu sha ikev i mbagenev, man m gema m ngu a mbautyav sha ikev; man ka mea kaa a ugen mer: Za, kpa nan za je; mea kaa a ugen mer: Va, shi nan va je; mea kaa a wanakiriki wam mer: Er nahan, nan er je.

¹⁰Tsô Yesu ongo nahan yô, kpiligh Un iyol, A kaa a mba ve lu van Un ijime la er: Ka mimi je M kaan ne ye, ken Mbaiserael je kpaa mayange M ngu a zua a jighjigh u nan u vesen nahan ga.

¹¹Man shi M ngu kaan ne Mer, ior kpishi mba ken ityoughkitaregh man shin ityôtar kpaa, vea va, vea va tema a Aberaham man Isaka man Yakob ken tartor u Sha imôngo,

¹²kpa á gema á dugh ônov mba tartor á haa ve ken ime i ken won la; mliam maa lu keregh kua anyi a yan kpaa.

¹³Tsô Yesu kaa a torutya la er: Yem tsô, i̱ er u er u ne jighjigh nahan la je. Wanakiriki la kpaa, wanger un iyol hen shighe la je.

¹⁴Tsô Yesu nyer ken ya u Peteru yô, A nenge ngôkem u Peteru lu yaven a angev mbu iyolhian.

¹⁵A kôr un sha uwe, tsô iyolhian la de un; nahan a mough sha, a gba gilim sha ci Na.

¹⁶Tsô iyange i been yô, ve va Un a ior kpishi mba ve lu a ujijingi mba bov yô; A dugh ujijingi mba bov kera sha kwaghôron Na, man mba ve lu dedoo ga la cii A bee ve angev;

¹⁷sha er kwagh u profeti Yesaia lu kaa la, a̱ kure sha mi vough yô, er: Un iyol Na ngohol ukorkor asev, A tôô angev asev kpaa.

¹⁸Tsô er Yesu nenge ikpelaior kpishi kase Un, nahan yô, A kaa er, i̱ per yande la.

¹⁹Tsô orngeren ugen va her a Na, va kaa a Na er: Ortesen, Wea za han han kpaa, me zaan a We heregh je.

²⁰Yesu gema kaa a na er: Atsôngo nga a ijô, inyon i sha ngi a aya, kpa Wan u or yô, ngu ape suur ityough ga.

²¹Ugen u ken mbahenen Nav kaa a Na er: Tere, nam ian, m̱ za m za ii terem ve.

²²Kpa Yesu kaa a na er: Dondo sha a Mo, de mbakpenev ve̱ ii mbakpenev vev.

²³Tsô, nyer ken tso yô, mbahenen Nav dondo Un.

²⁴Yô, zegeuraahumbe gba hiar shin zegemnger bughupupu zan zan agôndoamnger haa shin tso; kpa Un lu yaven.

²⁵Tsô ve va nder Un, ve kaa er: Tere, yima se, se mba saan!

²⁶A kaa a ve er: Ka nyi ne cie, ne mba ne lu a anjighjigh u nan kpeghee ne? Tsô A mough, A yange ahumbe man zegemnger, maa hingir ving ci ca cii.

²⁷Cier ior iyol, ve kaa er: Ka nyi Or ne man ahumbe kua zegemnger je kpaa ve ongo Unu?

²⁸Tsô mba peren yande la ken tar u Mbagadara yô, ior uhar mba lun a ujijingi mba bov due ken iwar va kohol Un, lu mbavihinkwagh je cier iyol, or kera cihin karen hen gbenda la ga.

²⁹Tsô ve genger amo, ve kaa er: Ka nyi i zough se a We, Yesu, Wan u Aôndo? U va heen sha u Ú va er se ican, er shighe kpaa a lu a kuma ga nee?

³⁰Yô, ikpelaigo lu yan inyarev, anigbar a ve.

³¹Ujijingi mba bov zamber a Na kaa er: Aluer U dugh se kera yô, rumun se, se̱ za nyôr ken ikpelaigo la.

³²A kaa a ve er: Gba zan nen tsô. Nahan ve due, ve za nyôr ken igo la; man nenge ikpelaigo la cii hembe ayem sen shin ijem, guusu shin zegemnger, saa mnger.

³³Mbakuran i yevese, nyôr ken gar, za ôr akaa la cii, kua kwagh u a er mba ve lu a ujijingi mba bov mbala kpaa.

³⁴Tsô gar la cii due za kohol Yesu; mba nengen a Na yô, ve zamber a Na er A̱ due ken tar ve kera.