Read tiv Mateu 9 Bible Online

Mateu 9 - tiv bible

Mateu 9

¹Tsô A nyôr ken tso, A per, A va ken gar Na.

²Tsô i va Un a or u kpen alegh, lu yaven sha gambe. Man er Yesu nenge jighjigh ve u nan yô, A kaa a or u kpen alegh la er: Taver ishima wan Wam, i de u asorabo a ou.

³Yô, mbagenev ken mbangeren gba kaan ken asema er: Or ne ngu tuhwan Aôndo.

⁴Man er Yesu fa mbamhen vev yô, A kaa er: Ka nyi ne henen kwagh u bo ken asema a ene?

⁵Gadia ka nyi i hembe lun uwer ga u ma i kaa er: I de u asorabo a ou; shin u ma i kaa er: Mough yem ase?

⁶Kpa sha u né fa er Wan u or A lu a tahav mbu den ior asorabo sha won yô, nahan A gema a kaa a or u kpen alegh la er: Mough, tôô gambe wou, yem hen ya wou.

⁷Tsô a mough, a yem hen ya na.

⁸Er ikpelaior nenge nahan yô, cier i iyol, i gba civir Aôndo u A ne ior imbautaha ne nahan yô.

⁹Tsô Yesu moughon heera kera yô, A nenge a orgen, iti na er Mateu, tema hen iyou i ngohol kpandegh; A kaa a na er: Dondo sha a Mo. Tsô a mough a dondo sha a Na.

¹⁰Er Yesu tem kwaghyan ken ya yô, mbangoholkpandegh kpishi man mbaasorabo va, va tema kwaghyan a Yesu imôngo kua mbahenen Nav.

¹¹Mbafarishi mba nengen nahan yô, ve kaa a mbahenen Nav er: Inja na nan man Ortesen wen a ye kwagh a mbangoholkpandegh man mbaasorabo imôngo?

¹²Man er Yesu ungwa nahan yô, A kaa er: Ka mbadedoo kwagh a gbe ve a ortwer ga, saa mba angev mbu ker ve la tseegh.

¹³Kpa yem nen za hen nen inja i kwagh ne: Mo yô, ka mhôônom ma zungwen ma doom ye, ka nagh ku nan ga; gadia M va sha u Me yilan mbaperapera ga, kpa ka mbaasorabo.

¹⁴Tsô mbahenen mba Yohane va her a Na, va kaa er: Inja na nan man se kua Mbafarishi, se her kwaghyan kpa mbahenen Ou yô, ve her kwaghyan ga?

¹⁵Yesu kaa a ve er: Mbayaren iniongo i kwasehe vea fatyô, u zungwen zum u orkwasehe a lu a ve imôngo laa? Kpa ayange nga van a á tôô ve orkwasehe kera; ka zum la man vea hôr kwaghyan ye.

¹⁶Man shi ma or ngu u nana cir bamberikondo u he sha ikondo i tse ga, gadia kwagh u i cingi i a mi la una gema a pande ikondo i tse la kera; nahan ihura ia seer a seer.

¹⁷Man shi mba hee zar u wain u he ken akpaakôvough a tse ga, gadia á er nahan yô, akpa la aa pav, zar u wain ua haa kera, akpa la kpaa aa saa ishe. Kpa mba hee zar u wain u he ken akpa a he, nahan ve uhar cii vea lu her dedoo.

¹⁸Ngur ôron ve kwagh ne nahan yô, nenge, orvesen ugen va gure Un inya, kaa er: Wan wam u kwase ka hegen a kpe ye, kpa va, va penda uwegh Ough sha a na, tsô una war.

¹⁹Yesu mough, za a na ityô, Un kua mbahenen Nav.

²⁰Yô, kwase ugen u duen awambe anyom pue kar ahar, va Un ken ijime, va bende mkaikondo Na;

²¹gadia lu kaan ken ishima er: Aluer mea bende a bende ikondo Na tsô kpaa, á wanger mo iyol.

²²Kpa Yesu gem, nengen a na yô, A kaa er: Wankwase, taver ishima; jighjigh wou u nan war u ve. Hii hen shighe la je wanger kwase la iyol.

²³Tsô Yesu va nyer ken iyou i orvesen la, nengen a mbatôngonamar man ikpelaior lu zenden sha yô,

²⁴A kaa a ve er: Hide nen ijime, gadia wankwase ne kpe ga, ngu yaven a yav. Nahan ve se Un ibumegh.

²⁵Man er i dugh ikpelaior kera yô, A nyôr A kôr un sha uwe; tsô wankwase mough.

²⁶Gwa u kwagh la gema samber ken tar la cii.

²⁷Tsô Yesu moughon heera kera yô, mbaapirashe uhar va dondo sha a Na, lu genger amo, kaan er: Zungwe se mhôônom, Wan u Davidi!

²⁸Tsô za nyer ken iyou yô, mbaapirashe mbala va her a Na. Yesu kaa a ve er: Ne na jighjigh ner, Me fatyô u eren kwagh nee? Ve rumun er: Een, Tere!

²⁹Tsô A bende ve ave sha ashe, A kaa er: I̱ er ne vough er ne ne jighjigh nahan.

³⁰Ashe ve maa bugh. Kpa Yesu ta ve icin er: Ver nen ishima, or môm nana̱ de fe kwagh ne ga.

³¹Kpa er ve due yô, ve gba pasen Un ken tar la cii.

³²Mba ngur duen yô, nenge, i va Un a orgen u kondon iker u a lu a jijingi u bo.

³³Er i dugh jijingi u bo kera yô, orkondoniker la gema gba lamen. Tsô kpiligh ikpelaior la iyol, ve kaa er: Mayange mba a nenge a imbakwagh ne ken Iserael ga.

³⁴Kpa Mbafarishi kaa er: Ka sha tor u ujijingi mba bov man A dughun ujijingi mba bov kera ye.

³⁵Tsô Yesu zende ken agar a vesen kua ken angarev mba kiriki la cii, lu tesen ken ushinagoge vev, lu ôron Loho u Dedoo u tartor, lu been hanma inja i uange man i mkpeyolga kpaa.

³⁶Man er A nenge a ikpelaior yô, mhôônom kôr Un a ve tsung, sha ci u i tumbul a ve, ve sambe wuee er iyôngo i i lu a orkuran i ga nahan.

³⁷Tsô A kaa a mbahenen Nav er: Sunda ngee je, kpa mbasundan yô, mba di kpeghee tsô.

³⁸Nahan yô, sôn nen Ter u sunda, A tindi mbatomov ken sunda Na.