Read tiv Marku 1 Bible Online

Marku 1 - tiv bible

Marku 1

¹Mhii u Loho u Dedoo u Yesu Kristu wan u Aôndo,

²er i nger ken profeti Yesaia nahan er: Nenge, M ngu tindin ortyom Wam sha ishigh You u una sôr U gbenda yô;

³imo i or u yilan ken taaikôngo er: Sôr nen gbenda u Ter, kôôm nen igbenda Na jighilaa.

⁴Yohane va, lu eren batisema ken taaikôngo, lu ôron kwagh u batisema u mgemshima sha u den asorabo.

⁵Tsô tar u Yudia cii kua mba ken Yerusalem kpaa, ve due ve za her a na; a er ve batisema shin ifi u Yordan, ve lu pasen asorabo a ve.

⁶Yohane yô, haan ikondo i sha aive a rakumi iyol, man a zer kwange u ikôv shin iwenge, yaan mbaahungwa man iyough i ken toho.

⁷Lu ôron kwaghaôndo, kaan er: Orgen u A hembam agee yô, ngu van mo ken ijime, u kwange u akôvangahar a Na tsô kpaa, m kom u me ngurum me sagh ga yô.

⁸Mo yô, m er ne batisema sha mnger tsô, kpa Un yô, Una er ne batisema sha Icighan Jijingi.

⁹Her ayange la je Yesu due ken Nasareti u ken Galilia; ve yô, Yohane er Un batisema shin Yordan.

¹⁰Ngur duen shin mnger yô, fese nahan A nenge i bugh Sha, man Jijingi, lu er ka ikungugh nahan, lu senen sha a Na.

¹¹Imo kpaa due Sha, er: We, U ngu Wan Wam u ishima ishima, ka We ishima i doom a We yum ye.

¹²Fese nahan Jijingi mgbegha Un, yem a Na ken taaikôngo.

¹³A lu ken taaikôngo ayange akunduahar, Satan lu meen Un; lu a inyam i toho imôngo; mbatyomov mba Shaav lu wasen Un.

¹⁴Mba we Yohane ken gaadi kera yô, Yesu va nyôr ken Galilia gba ôron Loho u Dedoo u Aôndo, kaan er:

¹⁵Ayange kuma, tartor u Aôndo mgbôghom ve; gema nen asema, na nen Loho u Dedoo ne jighjigh.

¹⁶Ngur zenden hen kpe u zegemnger u Galilia yô, A nenge a Shimon man anngô na Anderia; ve lu haan kper shin zegemnger; gadia ve lu mbakôronishu.

¹⁷Tsô Yesu kaa a ve er: Va dondon nen sha a Mo, Me gema ne, né hingir mbakôronior.

¹⁸Nahan ve undu ukper vev fese, ve dondo sha a Na.

¹⁹Karen heera, yemen ken hemen yô, A nenge a Yakobu, wan u Sebedeu, man Yohane anngô na, ve lu ken tso, lu cingen ukper vev.

²⁰Tsô A yila ve; maa ve undu ter ve, Sebedeu, ken tso, a mbaerentom sha tôndo la, ve dondo sha a Na.

²¹Ve va nyôr ken Kapernahum. Tsô A kar A za nyôr ken shinagoge sha iyange i memen, A gba tesen.

²²Kpiligh ve iyol a ityesen Na, gadia A tese ve er ka or u lun a tahav nahan, lu er mbangeren nahan ga.

²³Yô, ken shinagoge ve la orgen lu, lu a jijingi u hôngorough, a genger imo

²⁴a kaa er: Ka nyi i zough se a We, We Yesu Ornasareti, U va sha u va timin see? M fa U doo doo, U ngu Icighan u Aôndo je.

²⁵Kpa Yesu yange un, kaa er: We, huan, due ken a na kera.

²⁶Tsô jijingi u hôngorough la zômon un iyol; genger imo taver taver yô, a due ken a na kera.

²⁷Cier ve iyol cii; tsô ve gba pinen ayol a ve, kaan er: Ka nyi nee? Ka nyi ityesen i he nee? Ujijingi mba hôngorough kpaa A wa ve kwagh sha utaha je, ve ungwa imo Na kpaa.

²⁸Nahan gwa Na gema samber ken iningirtar i Galilia cii, fese je.

²⁹Mba dugh ken shinagoge yô, ve za nyôr ken ya u Shimon vea Anderia. Yakobu man Yohane kpaa za a ve.

³⁰Ngôkem u Shimon lu yaven hen inya a angev mbu iyolhian; nahan ve ôr Un kwagh na.

³¹Va mgbôghom yô, A kôr un sha uwe, A mough a na sha; angev mbu iyolhian maa de un je; tsô a gba gilim sha sha ci ve.

³²Ka kom aikighe, iyange i mir yô, ve va Un a mbauangev cii kua mbalun a ujijingi mba bov kpaa.

³³Ior mba hen gar la cii va kohol hen hunda.

³⁴Tsô A war ior kpishi mba ve lu a angev atô kposo kposo, man A dugh ujijingi mba bov kpishi kpaa; A kera rumun u ujijingi mba bov ve̱ ôr kwagh ga, sha ci u ve fe Un yô.

³⁵Tsô A mough sha use tugh tugh, A yem hen ijiir igen ape ma or lu ga, A za er msen ker.

³⁶Tsô Shimon man mba ve lu a Na imôngo ve gba tôvon Un ijime.

³⁷Mba za zough a Na yô, ve kaa a Na er: Ior cii mba keren We.

³⁸Kpa A kaa a ve er: Se za nen ijiir igen hen agar a a dondo heen ne, sha u Ne za ôr kwaghaôndo keregh kpaa yô, gadia ka sha ci u nahan man M dugh ye.

³⁹Tsô A za, A za ôr kwaghaôndo ken ushinagoge vev ken Galilia cii, lu dughun ujijingi mba bov kpaa.

⁴⁰Tsô orimande ugen va her a Na, va gure Un sha ishi, gba zamber a Na er: Aluer Wea rumun yô, U fatyô u wanger mo.

⁴¹Tsô er mhôônom kôr Un yô, A naregh uwegh, A bende un iyol, A kaa a na er: M rumun, i̱ wanger we.

⁴²Nahan imande maa bee un fese, a hingir wanger wanger.

⁴³A ta un icin gbang gbang maa A na un gbenda je;

⁴⁴A kaa a na er: Ver ishima, de kera ôron ma or kwagh ga, kpa yem za tese pristi iyol you, na nagh sha ci u mwanger u i wanger we yô, er Mose lu kaa nahan, sha u i̱ lu ve mpase yô.

⁴⁵Kpa dugh yô, a hii u ôron akaa kpishi, a samber a gwa u kwagh la zan zan Yesu kera fatyô u shi nyôron ken gar ken igbar ga, kpa A lu ken won sha ajiir ape ma or lu ga yô, ior gba duen han han kpaa, van her a Na.