Read tiv Marku 2 Bible Online

Marku 2 - tiv bible

Marku 2

¹Tsô ayange nga kar ciôn, shi va nyer ken Kapernahum yô, i gba ungwan gwa er, ngu ken iyou.

²Tsô ior zua heregh kpishi je, zan zan sha hunda ijiir i gbilinigh kera lu ga. A lu ôron ve kwaghôron u Aôndo.

³Tsô ve va a or u kpen alegh her a Na, ior unyiin tôô un.

⁴Mba fetyô u aren hen Na ga sha ci u ikpelaior yô, ve bugh ian sha uha henpe A lu la; mba bughun kera yô, ve sen a gambe u or u kpen alegh yav sha mi la.

⁵Yesu nengen jighjigh ve u nan yô, A kaa a or u kpen alegh la er: Wan, i de u asorabo a ou.

⁶Kpa mbagenev ken mbangeren tema lu her, lu henen ken asema a ve er:

⁷Ka nyi kwagh Or ne A kaan nahana? Ngu tuhwan Aôndo. Ka an nana fatyô u den or asorabo saa Aôndo tseegh gaa?

⁸Yesu kav ken ishima er ve henen ken asema a ve nahan yô; tsô A kaa a ve er: Ka nyi ne henen akaa ne ken asema a ene?

⁹Ka nyi i hembe lun uwer ga, u ma i kaa a or u kpen alegh ne er: I de u asorabo a ou; shin u ma i kaa er: Mough, tôô gambe wou, zende ase?

¹⁰Kpa sha u ne fa er Wan u or A lu a tahav mbu den ior asorabo sha won yô, A kaa a or u kpen alegh la er:

¹¹M ngu kaan a we, mough sha, tôô gambe wou, yem hen ya wou.

¹²Tsô a mough, a tôô gambe na fese je, a due sha ashe ve cii; nahan ve cii, kondo ve iyol, ve gba civir Aôndo kaan er: Mayange se mba a nenge imbakwagh ne ga.

¹³Tsô A shi a due, A yem shin kpe u zegemnger, ikpelaior cii va her a Na, A tese ve.

¹⁴Ngur karen yô, a nenge a Levi wan u Alefeu, tema ken iyou i ngohol kpandegh, A kaa a na er: Dondo sha a Mo. Tsô a mough a dondo sha a Na.

¹⁵Tsô er A tema kwaghyan ken ya na yô, mbangoholkpandegh man mbaasorabo kpishi va va tema kwaghyan a Yesu kua mbahenen Nav, gadia ve ngee kpishi.

¹⁶Mbangeren man Mbafarishi kpishi kpaa dondo Un ijime, ve nenge er A lu yan kwagh a mbaasorabo kua mbangoholkpandegh imôngo yô, nahan ve kaa a mbahenen nav er: Ka nyi man A ye kwagh a mbangoholkpandegh kua mbaasorabo imôngo nahana?

¹⁷Er Yesu ungwa nahan yô, A kaa a ve er: Ka mbadedoo kwagh a gbe ve a ortwer ga, saa mba angev mbu ker ve la tseegh. Mo M va sha u Me yila mbaperapera ga, kpa ka mbaasorabo.

¹⁸Mbahenen mba Yohane kua Mbafarishi ve hôron kwaghyan; nahan ve va, ve va kaa a Na er: Ka nyi man mbahenen mba Yohane kua mbahenen mba Mbafarishi ve her kwaghyan, kpa mbahenen Ou yô, ve her ga?

¹⁹Yesu kaa a ve er: Mbayaren iniongo i kwasehe vea fatyô u hôron kwaghyan zum u orkwasehe a lu a ve imôngo laa? Zum u ve lu a orkwasehe a ve imôngo yô, vea fatyô u hôron kwaghyan ga.

²⁰Kpa ayange nga van a á tôô ve orkwasehe kera, ka hen ayange la je man vea hôr kwaghyan ye.

²¹Man shi ma or ngu u nana cinge bamberikondo u he sha ikondo i tse ga, gadia kwagh u i cingi i min la una gema á pande ikondo i tse la kera, nahan ihura ia seer a seer.

²²Man shi ma or nan hee zar u wain u he ken akpaakôvough a tse ga, gadia á er nahan yô, zar u wain la ua pav akpa la, ua saa ishe kua akpa la cii; kpa mba hee zar u wain u he ken akpa a he je.

²³Er A lu zenden karen ker atô u sule u alakema sha iyange i memen yô, mbahenen Nav gba kever asagher a alakema yan yemen.

²⁴Tsô Mbafarishi kaa a Na er: Nenge, ka nyi ve eren kwagh u i rumun er i̱ er sha iyange i memen ga nahana?

²⁵A kaa a ve er: Mayange je ne mba a ôr kwagh u Davidi lu er, er kwagh gba un, man ijen kôr un kua mba ve lu a Na imôngo la gaa,

²⁶er a nyôr ken iyou i Aôndo sha ayange a Abiyatar lu zegepristi la, a ya ubredi mba sha ishi, mba i rumun u ma or nana̱ ya ga, saa upristi tseegh la, man er a na mba ve lu a na ityô la kpaa gaa?

²⁷Nahan A kaa a ve er: I er iyange i memen sha ci u or, i er or sha ci u iyange i memen ga.

²⁸Ka nahan man Wan u or A lu Ter u iyange i memen kpaa ye.