Read tiv Marku 4 Bible Online

Marku 4 - tiv bible

Marku 4

¹A shi A hii u tesen hen kpezegemnger, ikpelaior i vesen va kohol her a Na, nahan A nyôr shin tsô, A tema shin zegemnger; ikpelaior cii gema lu sha tar hen kpezegemnger la.

²A tese ve akaa kpishi sha anzaakaa; ken ityesen Na la, A kaa a ve er:

³Ver nen ato! Ortanivor yar sha u una ta ivor.

⁴Tsô ngur tan yô, ivor igen pande haa sha kpegbenda; inyon va, va sange i, ya.

⁵Igen haa sha ikuu ape inya i civir ga yô; nahan i mende fese sha ci u inya i ze i kom i ga yô.

⁶Oo ngu te yô, i hia; i uma sha ci u i lu a amise ga yô.

⁷Shi igen haa ken usaa, usaa vese imbishi i, i mar ga.

⁸Igen yô, haa hen inya i dedoo, i mende i vese i via iyiagh i wa asange hemba ivor la kwa ikundugber, igen kwa akunduatar, igen kwa akunduataan.

⁹Tsô A kaa er: Or u nan lu a ato a ungwan yô, nana̱ ungwa.

¹⁰Er a lu tswen yô, mba ve lu a Na kua mba pue kar uhar mbala, ve pine Un kwagh u anzaakaa la.

¹¹Nahan A kaa a ve er: Ne yô, i na ne sha u fan kwaghmyer u tartor u Aôndo; kpa mba ken won yô, mba er ve akaa cii sha anzaakaa,

¹²sha er: Mnenge yô, ve̱ nenge, kpa ve̱ de kaven ga; sha u ve̱ de gem asema man á de ve asorabo a ve ga yô.

¹³Nahan A kaa a ve er: Ne kav injakwagh ne gaa? Yô, né er nan man né kav anzaakaa cii ase?

¹⁴Ortanivor ka nan ta kwaghôron.

¹⁵Mba ve lu sha gbenda henpe i te kwaghôron la, ka mba ka vea ungwa yô, fese je Satan a va, a ngohol kwaghôron u i lee ken asema a ve la kera.

¹⁶Nahan mba i te ve ivor sha ikuu la kpaa, ka mba ka vea ungwa kwaghôron yô, fese je ve ngohol un saan saan,

¹⁷kpa ve lu a mise ker ayol a ve ga, nahan ve taver asema anyangem kpeghee, tsô er mkighir u sha ican shin mtev u sha ican una mough a ve sha ci u kwaghôron la yô, fese je ve nôngo gbev.

¹⁸Man mba i te ve ivor ken usaa yô, ka mba ka vea ungwa kwaghôron,

¹⁹kpa anzughul a tar ne a nyian ishima kua icugh i inyar man asaren a sha akaa agen cii vea va yô, ve imbishi kwaghôron la, nahan a kera ume atam ga.

²⁰Mba i te ve ivor hen inya i dedoo yô, ka mba ka vea ungwa kwaghôron la, ve ngohol un, ve ume atam, ugen kwa ikundugber, ugen akunduatar man ugen akunduataan.

²¹Shi A kaa a ve er: Ka i nyôr a imenger sha u cirin kapu sha mi shin sha u veren shin ityô gambe je kpa? Kera ka u veren sha daar u pendan imenger sha mi la gaa?

²²Gadia ma kwagh ngu myer u á de duen a mi ken igbar ga, shi i yer ma kwagh ga saa á due a mi ken igbar kpee.

²³Aluer ma or nan ngu a ato a ungwan yô, nana̱ ungwa.

²⁴Nahan A kaa a ve er: Ver nen ishima sha kwagh u ne ongo ne. Sha ikaren i ne karen a mi ne, ka sha i á kar ne a mi ye, shi á seer ne sha mi kpaa.

²⁵Gadia u nan lu a kwagh, ka nan je á na nan ye; kpa u nan lu a kwagh ga yô, kwagh u nan lu a mi la je kpaa á ngohol un kera.

²⁶A shi A kaa er: Tartor u Aôndo ngu nahan: ka er or u nan te ivor shin inya;

²⁷nan yav, nan nder, tugh man tetan, man ivor la kpaa mende, i vese, kpa nan fa er i hii man i mende ga;

²⁸gadia inya iyol i i gba nan iyiav tsô; hiihii ka ika, u dondon ka ishagher, man ken masetyô yô, ka asange a vian ken ishagher.

²⁹Man shighe u iyiagh kia via yô, fese je nan za a louji keregh, sha ci u shighe u sundan a kom yô.

³⁰A shi A kaa er: Sé kar tartor u Aôndo sha nyi, shin sé kar u sha injakwagh i nyi?

³¹Ngu er ishange i masetadi i or ka nan lôô i shin inya la yô, i hemba ndahar a asangeakaa a sha won cii;

³²nahan kpaa, ka a lôô i yô, i̱ due, i̱ vese zan zan i̱ hemba vesen a aveghem a uyia cii; i̱ samber agbaa a vesen zan zan inyon i sha i fatyô u wan aya teman sha mi ken mure u u.

³³A ôr ve kwaghôron u Aôndo sha anzaakaa kpishi er ngan nahan, kuma sha m-ongo ve vough.

³⁴Man gbaa ôron ve ma kwagh ga, saa sha injakwagh. Kpa A mase pasen mbahenen Nav akaa cii, ve tseegh.

³⁵Sha iyange la, er iyange i been yô, A kaa a ve er: Se yem nen yande la.

³⁶Tsô ve undu ikpelaior, ve mough a Na er A lu nahan, shin tso; utso mbagenev kpaa lu a ngula imôngo.

³⁷Tsô zegeuraahumbe gba, agôndoamnger gba tan sha tso haan shimi, nahan tso gba ivin.

³⁸Un iyol Na yô, lu shin ityôtsoogh, lu yaven sha kushen. Ve nder Un, ve kaa a Na er: Ortesen, se mba timin kpa ka U kwagh gaa?

³⁹Tsô a nder, A yange ahumbe, A kaa a zegemnger er: Huan, lu ving! Ahumbe maa de, nahan huan ving cii.

⁴⁰Tsô A kaa a ve er: Ka nyi ne cie yum nahana? Er nan man ne lu a jighjigh u nan ga nahana?

⁴¹Cier ve iyol je zua ga, ve kaa ayol a ve er: Ka nyi Or ne man ahumbe kua zegemnger je kpaa ve ongo Unu?