Read tiv Marku 8 Bible Online

Marku 8 - tiv bible

Marku 8

¹Sha ayange la zum u ikpelaior shi lu kpishi man ve lu a kwagh u vea ya ga yô, Yesu yila mbahenen Na, A kaa a ve er:

²Mhôônom kôrom a ikpelaior ne, gadia mba a Mo ityô ka ayange atar je ne, man mba a kwagh u vea ya ga.

³Aluer Mea na ve gbenda Mer, ve̱ yem hen uya vev ijen yô, vea vôr sha gbenda, gadia mbagenev ken a ve va ica.

⁴Mbahenen Nav gema kaa a Na er: Ka han je á zua a kwaghyan ken toho ne ve ikpelaior ne ia ya, á kuma ve?

⁵A pine ve er: Ne mba a ubredi u me? Ve kaa er: Mba utaankaruhar.

⁶A kaa ikpelaior er, i̱ haa inya; tsô A tôô ubredi mba utaankaruhar la, sughun yô, A coon, A na mbahenen Nav er, ve̱ na ve; nahan ve gema ve na ikpelaior.

⁷Ve lu a anishuuv ciôn kpaa. A sôn iveren i dedoo sha mi, A kaa er, ve̱ na ve kpaa.

⁸Ve ya, kuma ve; ve kohol avur a a neer la, iv akese ataankarahar.

⁹Mba ve ya la, ve kuma er ior dubu unyiin nahan. Tsô A na ve gbenda.

¹⁰Fese nahan A nyôr ken tso a mbahenen Nav, ve va ken tar u Dalmanuta.

¹¹Mbafarishi due gba sendegh kwaghôron a Na, ve lu keren ivande i Sha her a Na, sha u karen Un.

¹²Tsô A shil ishima ken vanger taveraa, A kaa er: Ka nyi man kov ne u keren ivande nahana? Mimi je M kaan ne ne: Á na kov ne ivande je ga.

¹³Tsô A undu ve, A shi A nyôr shin tso, A per yande la.

¹⁴Kpa hungul ve ve tôô bredi ga; bredi u ve lu a mi shin tso yô, lu môm tsô.

¹⁵A wa ve kwagh er: Ver nen ishima, kuran nen ayol a en sha kwa u Mbafarishi kua kwa u Herode la.

¹⁶Tsô ve gba henen ayol a ve, kaan er: Ka sha ci u se lu a bredi ga yô.

¹⁷Er Yesu kav nahan yô, A kaa a ve er: Ka nyi man ne henen ner, ka er ne tee bredi ga? Ne mba a kav ga, man mfe kpaa ne fa gaa? Ne shi ne mba a asema a cighir her tsôô?

¹⁸Ne mba a ashe, kpa ne mba nengen gaa? Shi ne mba a ato, kpa ne mba ongo gaa?

¹⁹Er M coon ubredi utaan sha ior dubu utaan man ne kura avur la, ne iv akese a me, ne kera umbur gaa? Ve kaa a Na er: Lu pue kar ahar.

²⁰Man sha ubredi utaankaruhar la ne kura avur iv akese a me? Ve kaa er: Lu ataankarahar.

²¹Nahan kpaa ne mba a kav gaa?

²²Ve va nyôr ken Betesaida. Tsô ve va Un a orapirashe, ve zamber a Na er, A̱ bende Un uwegh iyol.

²³A kôr orapirashe la sha uwe, A due a na ken akôngo; tsô hee un ijer sha ashe, shi pende un ave sha ityou yô, A pine un er: U ngu nengen a ma kwagh kpa?

²⁴A kenger sha, a kaa er: M ngu nengen a ior, gadia m ngu nengen a ve er ka ikon nahan, mba zenden.

²⁵Tsô A shi penda un ave sha ashe, a gba nengen dedoo, maa i bee un; tsô a nenge akaa cii wanger wanger.

²⁶A na un gbenda er a̱ yem hen ya na, A kaa er: Ken gar ne tsô kpaa, de nyer ker ga.

²⁷Yesu shi due a mbahenen Nav, A gba zan sha angarev mba Shisaria-Filipi. Sha gbenda yô, A pine mbahenen Nav er: Ior mba kaan er, Mo M ngu ana?

²⁸Ve kaa a Na er: Yohane u eren batisema; mbagenev yô, er Eliya; man mbagenev er, ka u môm ken uprofeti.

²⁹A gema A pine ver er: Kpa ne yô, ne mba kaan ner, Mo M ngu ana? Peteru kaa a Na er: We U ngu Kristu je.

³⁰A ta ve icin er, ve̱ de kera ôron ma or kwagh Na ga.

³¹Tsô a hii u tesen ve er, ka u Wan u or Una ya ican sha akaa kpishi keng, mbatamen man upristi mba tamen kua mbangeren vea ta Un kera, á wua Un; ayange á karen atar yô, Una nder shin ku.

³²A ôr kwagh ne gbar gbar. Tsô Peteru ta ibalegh a Na, gba zôhôn a Na.

³³Kpa gem nengen a mbahenen Nav yô, A yange Peteru, A kaa er: Hirem ken ijime kera, Satan, gadia ka akaa a Aôndo u henen ga, saa a ior tsô.

³⁴A yila ikpelaior man mbahenen Nav her a Na, A kaa a ve er: Aluer anti or a sar nan pe van a Mo ityô yô, nana̱ nyiman iyol i nan, nana̱ tôô terankon u nan nana̱ dondo sha a Mo.

³⁵Gadia hanma or u i sar nan ka yiman uma u nan yô, una saa nan a saa; kpa hanmô u uma u nan una saa nan sha ci Wam man Loho u Dedoo ne yô, nana yima un a yima je.

³⁶Gadia aluer or a zua a tar cii, man uma u nan una gema á saa nan yô, á doo nan sha nyi?

³⁷Shin ka nyi kwagh man or nana na sha u paan uma u nan sha mini?

³⁸Gadia hanmô u nana cia ashe sha ci Wam man akaaôron a Am hen kov u eren idya man u asorabo ne yô, Wan u or kpaa Una cia ashe sha ci u nan zum u Una va sha icivir i Ter Na a uicighanmbatyomov la.