Read tiv Luka 11 Bible Online

Luka 11 - tiv bible

Luka 11

¹Tsô lu eren msen ijiir igen, kur yô, orhenen Na u môm kaa a Na er: Tere, tese se u eren msen, er Yohane kpaa a tese mbahenen nav nahan.

²A kaa a ve er: Zum u nea eren msen yô, kaa nen ner: Tere, i̱ tsegha iti You; tartor Wou u̱ va.

³Na se kwaghyan wase u a lu sha ci u ayange ayange la;

⁴man de se asorabo ase, gadia se kpaa, se mba deen hanma or u nan gbe injô hen vese yô. Man shi de ze a vese hen ape imeen i lu ga.

⁵Man A kaa a ve er: Ka an ken a ven, aluer nana lu a ikar nana za her a nan ateghôtôutu, nana za kaa a na er: Ikar, pwarem ikpen i bredi itiar,

⁶gadia ikarem ugen due ken zende, va hen mo, man m ngu a ma kwagh u me na un ga;

⁷man u ken iyou la nana gema á kaa er: De zem iyol ga, hunda ngu vingir hegen, ônov av kpaa mba a mo sha gambe imôngo, me fatyô u moughon za nan we ga.

⁸Me kaa ne shin er una mough u nan nan er nan lu ikar na ga kpaa, sha ci u a cihi kunya yum yô, una mough una na nan akaa a a gbe nan la cii.

⁹Man M kaan ne: Sôn nen, á na ne; ker nen, né zua a mi; mande nen uwegh, á bugh ne.

¹⁰Gadia hanmô u nan sen yô, nan ngohol; u nan keren kpaa, nan zough a mi u nan manden wegh kpaa á bugh nan.

¹¹Ka hanmô wen u nan lu ter man wan u nan una sôn nan ishu, man nana gema á na un iyô sha ityough ki ishu la ase?

¹²Shin una sôn ijikegh, man nana gema á na un iyese?

¹³Aluer ne mba ne lu mbaaferev je kpaa ne fa u nan ônov enev uiwua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?

¹⁴A dugh jijingi u bo u a lu u kondon iker yô. Jijingi u bo la dugh kera yô, orkondoniker la ôr kwagh; nahan kpiligh ikpelaior iyol.

¹⁵Kpa mbagenev ken a ve kaa er: Ka sha Belesebu, tor u ujijingi mba bov, A dughun ujijingi mba bov ye.

¹⁶Mbagenev kpaa lu karen Un, lu keren ivande i Sha hen Na.

¹⁷Kpa er A fa mbamhen vev yô, A kaa a ve er: Hanma tartor u u pav sha ihom yô, á tim u, iyou kpaa ia yôhôl, ia gba sha igen.

¹⁸Satan kpaa aluer una pav iniongo ihiar yô, tartor na ua fatyô u tilen nana? Gadia ne kaa ner, ka sha Belesebu M dughun ujijingi mba bov ye.

¹⁹Aluer Mo Mea dughun ujijingi mba bov sha Belesebu yô, ka sha an man ônov enev ve gem ve dughun ve? Ka nahan man vea lu mbaôron ne ijir ye.

²⁰Kpa aluer ka sha ihôwe u Aôndo M dughun ujijingi mba bov yô, tartor u Aôndo va hen a ven je ve.

²¹Zum u ortaveryol ka nan lu a ikav mbi tswamev, nana kuran ya u nan yô, akaa a nan a lu dedoo.

²²Kpa or u nan hembe nan agee, nana va ta num sha a nan, nana hemba nan yô, nana ngohol nan ikav mbi tswamev mbi nan suur sha mi la kera, nana kar kwar sha ishar i nan la.

²³U nan lu nongo a Mo ga yô, nan ngu ihom a Mo je; man u nan kohol a Mo ga yô, nan ngu saren a sar.

²⁴Jijingi u hôngorough ka una due ken or yô, a karen sha ajiir a mngerem ma lu ga, a keren mmem; una zuan a mi ga yô, a kaa er: Me hire hen ya wam ape m dugh la.

²⁵Una va aren yô, a kohol un, i ese, i sôr doo doo kpaa.

²⁶Tsô a yem a za kua a ujijingi mbagenev utaankaruhar mba ve hembe un ifer yô, ve nyôr ve tema keregh man mlu u masetyô a hemba gban kera a u hiihii la.

²⁷Tsô ngur ôron akaa ne nahan yô, kwase ugen ken ikpelaior genger imo, kaa a Na er: Saan iyav mbu mbu mar U la iyol, man atumba a U me a la.

²⁸Kpa A kaa er: Kpa jim yô, i saan mba ve ongo kwaghôron u Aôndo man ve eren sha mi kpaa la, iyol.

²⁹Tsô ikpelaior va kohol hen Na kpishi yô, A gba kaan er: Kov ne ka u bo tsô, ngu keren ivande; kpa á na u ivande ga, saa ivande i Yona la.

³⁰Gadia er Yona lu ivande hen Mbanineve yô, kape Wan u or kpaa Una lu ivande hen kov ne je ne.

³¹Torkwase u ken imbusutariyan una nder sha iyange i ijir a kov ne imôngo, man una na u ibo, gadia a due ken akighir a tar je, a va sha u va ungwan mfe u Solomon yô; kpa nenge, u A hembe Solomon icivir, ngun heen ne!

³²Ior mba ken Nineve vea nder sha iyange i ijir a kov ne imôngo vea na u ibo; gadia ve gema asema sha kwaghaôndo u ôron u Yona; man nenge, u a hembe Yona icivir, ngun heen ne.

³³Ma or ngu u nana tsar imenger man nana ver ken myer, shin nana cir kapu sha mi ga, kpa nana penda sha daar u pendan imenger sha mi, sha u mbanyôron ve̱ nenge a iwanger yô.

³⁴Imenger i iyolough ka ishe you je. Aluer ishe you ia lu dedoo yô, iyol you cii kpaa ia iv a iwanger; kpa aluer ia lu i ifer yô, iyol you kpaa ia iv a ime.

³⁵Nahan ver ishima, iwanger i i lu ken a we la, i̱ de luun ime ga.

³⁶Yô, aluer iyol you cii ia iv a iwanger ia kera lu a ime mape ga yô, ia iv a iwanger wang, er imenger ka i wanger we sha mondo u i nahan.

³⁷Er lu ôron kwagh yô, Orfarishi ugen va yila Un iwer. Un kpaa A za nyôr, man A tema kwaghyan la.

³⁸Er Orfarishi la nenge nahan, kpiligh un iyol sha ci u A vande ôôn ave man A ye ga yô.

³⁹Kpa Ter kaa a na er: Ne, Mbafarishi! Ka ijime i iyongo man i gbande ne kir ye, kpa ken atô wen yô, ne iv a mtusu man ifer.

⁴⁰Ne abumeaior, Wen u A er ken won la, kera ka Wen kpaa A er kimi gaa?

⁴¹Kpa na nen iwua sha akaa a lu kimi; nahan man akaa cii aa lu ne wang ye.

⁴²Kpa kwagh á tser ne! Ne Mbafarishi, gadia ne mba tsough môm-ken-upue u kunguraku man rue man hanma ihuugh, kpa ne kera wa ijir man dooshima u Aôndo iko ga. Er i lu u ma ne eren akaa angan keng yô, shi ma ne de u eren angara kpaa ga.

⁴³Kwagh á tser ne! ne Mbafarishi, gadia mkônom ma injaam ma ken ushinagoge hemba doon ne ishima, man shi ishughun i sha ityembekasua kpaa.

⁴⁴Kwagh á tser ne! gadia ne mba vough er iwar i i nengen a i ga la nahan, mba zenden sha mi kpaa mba fe ga.

⁴⁵Tsô u môm ken mbafanatindi gema kaa a Na er: Ortesen, er U kaan akaa ne nahan yô, ka iheen je U heen se ye.

⁴⁶Kpa A kaa er: Ne mbafanatindi kpaa, kwagh á tser ne gadia ne mba we ior ikav mbi mbi lu ican u tôôn yô; man ne ayol a en yô, mayange ne bende ihôwe wen môm sha mi kpaa ga.

⁴⁷Kwagh á tser ne! gadia ne mba maan iwar i uprofeti, kpa ka uter enev je lu wua ve ye.

⁴⁸Nahan yô, ne mba mbashiada ne mba rumun ityom i uter enev je; gadia ve, ve wua ve; ne yô, ne gema ne mba maan iwar ve.

⁴⁹Ka sha ci u nahan man mfe u Aôndo kaa er: Me tindi ve a uprofeti man mbaapostoli; vea wua mbagenev, vea tôv mbagenev a ican;

⁵⁰sha u i ker awambe a uprofeti cii a i haa, hii sha igbetar la je, hen kov ne;

⁵¹hii sha awambe a Abel zan zan ar hen awambe a Sekaria, u i wua un hen atô u atse a Icighanjiir, een, M kaa ne, á ker a hen kov ne.

⁵²Kwagh á tser ne, ne mbafanatindiakaa, gadia ne tôô ishindan i kwaghfan kera; ne ayol a en ne nyôr ga man mba ma ve nyer la kpaa ne yange ve.

⁵³Er A lu duen kera yô, mbangeren man Mbafarishi mough ayôôso a Na tsung, ve lu vemben Un sha u A̱ ôr akaa kpishi,

⁵⁴ve lu kuran Un sha u vea kôr Un a ikaa zwa yô.