Read tiv Luka 15 Bible Online

Luka 15 - tiv bible

Luka 15

¹Mbangoholkpandegh cii man mbaasorabo manger her a Na sha u ungwan Un.

²Kpa Mbafarishi man mbangeren gba aun kaa er: Or ne rumun mbaasorabo, ngu yan kwagh a ve je.

³Tsô A ôr ve injakwagh ne, A kaa er:

⁴Ka anti ken a ven u nana lu a iyôngo akunduataan man i môm ken i ia saa nan yô, nana kera undu i akunduanyiingber kar itiankarinyiin la ken ikôngo, nana za ker i i saa la zan zan nana kar zuan a mi ga?

⁵Er nan zough a mi yô, nan penda i sha avande nan gba ember.

⁶Va nyer ken ya yô, nan yila akar a nan man mba ve we ndor a nan, ve̱ va kohol her a nan nan gba kaan a ve er: Ember nen a mo imôngo, gadia m zua a iyôngo yam i i saa la ve!

⁷Me kaa ne, kape m-ember una lu Sha sha ci u orsholibo môm u nan gema ishima la, á hemba u sha mba akunduanyiingber kar utaankarunyiin mba perapera mba kwagh a gbe ve a mgemshima ga la.

⁸Shin ka hanma kwase man nana lu a sule pue, man u môm una saa nan yô, nana kera tsar imenger, nana ese iyou, nana ker tsung zan zan nana kar zuan a min gaa?

⁹Er nan zough a mi yô, nan yila akar a nan man mba ve we ndor a nan, ve̱ va kohol her a nan, nan kaa er: Ember nen a mo imôngo, gadia m zua a sule u a saam ne ve!

¹⁰Me kaa ne, kape m-ember una lu sha ishigh ki mbatyomov mba Aôndo sha ci u orsholibo môm u nan gem ishima la.

¹¹Shi A kaa er: Orgen lu a ônov uhar mba nomso.

¹²U kiriki la kaa a ter na er: Terem, nam kwar u dyako u u lu u wam yô. Tsô a tôô akaa a na cii a kar ve.

¹³Ayange nga kar kpeghee yô, wen u kiriki la kohol ikav nav cii mough yem ken tar u icaa je, za vihi inyaregh nagh keregh sha udangmbaakaav.

¹⁴Vihin ki kera cii yô, zegejen gba ken tar la; wen gema hingir or u ibanave.

¹⁵Tsô a za a za suur ityough a or u hen tar la; ngula tindi un er a̱ za kura un igo ken sule.

¹⁶I lu un pe ma un ye kwagh u igo i ye la, kpa or yima un a min ga.

¹⁷Tsô va til a ishima yô, a kaa er: Mbaeren terem tom sha tôndo mba imôngo man mba a kwaghyan je neer ve a neer gaa, man mo yô, m gema m ngu kpen ijen heen!

¹⁸Me mough me yem hen terem, me za kaa a na mer: Terem m er Un u A lu Sha la kwaghbo m shi m er kwaghbo sha ishigh you kpaa;

¹⁹m kera kuma u á yilam er wan wou ga; i̱ gemam, me gba lun er ma or u eren we tom sha tôndo nahan.

²⁰Tsô a mough, a yem hen ter na. Kpa er lu ica je tsô, ter na ta ashe, za nenge a na, mhôônom kôr un kpishi, a wa ayem inya, a za kuve un, a gba susen un zwa.

²¹Wan la kaa a na er: Terem m er Un u A lu Sha la kwaghbo m shi m er kwaghbo sha ishigh you kpaa; m kera kuma u á yilam er wan wou ga.

²²Kpa ter la kaa a mbashiren un tom mbala er: Dugh nen ihembanriga la fefa je, va haa nen un, wa nen un kunya ken uwe, man akôv shin angahar kpaa;

²³man va a icighangumbua, va sôngo, sé ya nen, sé ember nen;

²⁴gadia wan wam ne lu kpe man a shi a nder, a saa man shi i zua a na! Tsô ve ngure ember.

²⁵Kpa wan na u tamen la lu ken ityev; ngur van va mgbôghom hen ya yô, a ungwa ityogholov man amar ding ding.

²⁶Tsô a yila u môm ken mbashirentom mbala, a pine inja i akaa la.

²⁷Ngula kaa un er: Anngôu va; nahan teru sôngo icighangumbua, sha ci u a zough a na doo doo yô.

²⁸Maa a gba yuwen, a venda u nyôron. Tsô ter na due za zamber a na.

²⁹Kpa a gema a kaa a ter na er: Nenge ase, m ngu eren we tom anyom ne kpishi je, mayange m kar imo you ga, kpa mayange u ngu a nam ma anivo wer, m̱ ember a akar a am imôngo ga.

³⁰Kpa er wan wou u a vihi u inyaregh sha mbaagbagambaukasev ne, a za ve yô, u sôngo un icighangumbua je.

³¹Kpa a kaa a na er: Wan wam, u ngu a mo gbem, akaa a am cii ka a ou.

³²Kpa ka u i̱ saan se iyol keng, se̱ ember, gadia anngôu ne lu kpe, a shi a hingir uma; a saa, i shi i zua a na kpaa.