Read tiv Luka 18 Bible Online

Luka 18 - tiv bible

Luka 18

¹A shi A ôr ve injakwagh sha u tesen er doo u taver ishima u eren msen zumbee, gban uwer ga.

²A kaa er: Ken gar ugen orjir lu, cian Aôndo ga, or kpaa waan nan iko ga.

³Gar shon la kwasecôghol kpaa lu ker, zer van hen na, kaan er: Kurem ijir sha orihom wam.

⁴A zer vendan, kpa ken masetyô yô, a kaa ken ishima na er: Shin er m cie Aôndo ga, or kpaa m we iko ga,

⁵nahan kpaa sha ci u kwasecôghol ne a zem iyol yum yô, me kure un ijir sha orihom na, sha u a̱ de kera zem iyol zan zan i̱ bundem iyol sha mve na u keke ne ga.

⁶Tsô Ter kaa er: Ungwa nen kwagh u orjir u a lu perapera ga ne a kaa la.

⁷Man hire Aôndo Una kera kure ijir sha ci u uicuwan Nav mba ve ve a mliam hen Na tugh man tetan ga yee, shin er A timbir sha kwagh ve yum nahan kpaa.

⁸Me kaa ne, Una kure ijir fese je. Kpa shighe u Wan u or Una va la yô, Una zua a jighjigh u nan sha wonoo?

⁹A shi A ôr injakwagh ne sha mbagenev mba ve fe ken asema a ve er, ve mba mbaperapera, man ve gem ve nengen ior mbagenev dang yô:

¹⁰Ior uhar za ken tempel sha u za eren msen; u môm lu Orfarishi; u môm yô, lu orngoholkpandegh.

¹¹Orfarishi la tile sha, gba eren msen sha ci na iyol na sha akaa ne nahan er: Aôndo, m sugh U sha ci u m lu er ior mbagenev nahan ga yô; anza er uityusenmbaiorov man mba lun a mimi ga man mbadyarev man orngoholkpandegh ne nahan kpaa.

¹²Lahadi môm ka m hôr kwaghyan kwa har; m ne môm-ken-upue sha akaa a m zough a mi cii.

¹³Kpa orngoholkpandegh la yô, tile ken ica je, rumun u kenden ashe sha tsô kpaa ga, kpa a ta uwegh sha vanger, a gba kaan er: Aôndo, zungwem mhôônom, mo orsholibo ne!

¹⁴Me kaa ne, ka or ne a yem ken ya na a ishô ye, lu ugen la ga, gadia anti or u nana kende iyol i nan sha yô, á hide a nan ijime; kpa u nana hide a iyol i nan ijime yô, á kende nan sha.

¹⁵Ve va a anikundanev her a Na, sha u A̱ bende ve ave yô; tsô mbahenen mba nengen nahan yô, ve zôhô a ve.

¹⁶Kpa Yesu yila ve er ve̱ va her a Na, gba kaan er: De nen mbayev mba kiriki ve̱ va her a Mo, de kera yangen nen ve ga, gadia ka anza a mban ne je tartor u Aôndo u lu u ve ye.

¹⁷Mimi je M kaan ne ne, hanma or u nana rumun tartor u Aôndo er wanye u kiriki nahan ga yô, nana nyôr ker mayange ga.

¹⁸Orvesen ugen pine Un er: Ortesen u dedoo, me er nan man me zua a uma u tsôrono?

¹⁹Yesu kaa a na er: Er nan man u yerem Or u dedoo? Or u dedoo ngu ga, saa Aôndo tseegh.

²⁰U fa atindiakaa er: De eren idya ga; de woo or ga; de iin ga; de we or aie iyol ga; civir teru man ngôu.

²¹A kaa er: M kura angan cii er m lu iyev je.

²²Er Yesu ungwa nahan yô, A kaa a na er: Kpa kwagh shi u môm tsô: Tôô akaa a u lu a mi la cii tee, na mbaatsanev nahan wea lu a kwagh u injaa Sha yô, va, va dondo sha a Mo.

²³Kpa ongo akaa ne nahan yô, ishima gba vihin un kpishi gadia lu or u lun a inyaregh kpishi.

²⁴Yesu nengen na yô, A kaa er: Ka ican tsô u mba ve lu a inyaregh vea nyôr sha tartor u Aôndo.

²⁵Gadia guda u rakumi a̱ nyôr ken ihura i anura, a u ornyar a̱ nyôr sha tartor u Aôndo.

²⁶Mba ve ungwa yô, ve kaa er: Tsô ka an je man á yima nana?

²⁷Kpa A kaa er: Akaa a or fe a ityô ga la, Aôndo fe a ityô.

²⁸Tsô Peteru kaa er: Nenge, se undu akaa ase, se dondo U.

²⁹A kaa a ve er: Mimi je, M ngu kaan ne, or ngu u nana undu ya, shin kwase, shin anmgbianev mba nomso shin mbamaren shin ônov sha ci u tartor u Aôndo,

³⁰man nana de zuan a mi kwa imôngo ga hen shighe ne, man ken shighe u una va la kpaa nana zua a uma u tsôron.

³¹Tsô A kua a mba pue kar uhar mbala gba kaan a ve er: Nenge, se mba zan sha Yerusalem, man akaa a uprofeti nger la cii, aa er Wan u or.

³²Gadia á na Un sha ikev i atôatyev, á naha Un tar, á hee Un, man á haa Un azer iyol;

³³vea gbidye Un akpa, man vea mase wuan Un kpaa ye; sha iyange i sha utar la Una nder shin ku.

³⁴Kpa ve kav ma kwagh ken akaa ne ga, mkaanem man kpaa ma lu ve myer; mkav kpaa ve kav akaa a i er la ga.

³⁵Za mgbôghom a Yeriko yô, orapirashe ugen tema hen kpegbenda, lu sônon.

³⁶Ongo acin a ikpelaior i karen yô, a pine inja i kwagh shon.

³⁷Ve kaa un er: Ka Yesu, Ornasareti a karen ye.

³⁸Tsô a genger imo, a kaa er: Ku! Yesu, Wan u Davidi, zungwem mhôônom!

³⁹Mba ve lu zan sha hemen la, yange un er a̱ huan ayôôso. Kpa a seer a seer genger imo er: We, Wan u Davidi, zungwem mhôônom.

⁴⁰Tsô Yesu tile, kaa er, i̱ va a na her a Na. Ve ikua ikua yô, A pine un er:

⁴¹Ka nyi i sar u ka M̱ er uwe? A kaa er: Tere, ma m nenge kera!

⁴²Yesu kaa a na er: Gba nengen kera tsô. Jighjigh wou u nan war u ve.

⁴³Fese nahan a gba nengen kera, a dondo sha a Na, a gba civir Aôndo. Ior cii mba nengen nahan yô, ve wuese Aôndo.