Read tiv Luka 2 Bible Online

Luka 2 - tiv bible

Luka 2

¹Tsô sha ayange la tindi due hen Shisar Agusetu er i̱ nger ior mba ve lu sha won cii.

²Ngun ka mnger u hiihii u sha shighe u Shiriniu lu gomna u Shiria la.

³Ior cii za sha u i̱ za nger ve, hanma or nan za hen gar u nan.

⁴Yosev kpaa mough ken Galilia ken gar u Nasareti, za hen Yudia hen gar u Davidi u i yilan er Betelehem la, sha ci u un lu u ken ya u Davidi man tsombor na kpaa.

⁵A za sha u i̱ za nger un, kua Maria, kwase na u un sôôr a sôôr, lu iyav la.

⁶Er ve lu keela je, tsô shighe kuma u una mar;

⁷a maa a mar Wan na u iunda u nomso, a wa Un ken akondo man a gbir Un shin anar u haan ilev kwaghyan la, gadia ijiir i tsan ken iyou i mbavannya yina ve.

⁸Mbakuranilev lu ken tar la, ve tsaan ken toho, ve kuran ilev vev tugh.

⁹Tsô ortyom u Ter va tile hen ve, man iengem i Ter mondo kase ve, tsô mciem gba ve iyol kpishi.

¹⁰Kpa ortyom la kaa a ve er: De cie nen ga, gadia m va ne a loho u dedoo u iember i vesen u ua lu sha ci u ior cii;

¹¹gadia i mar ne Oryiman ken gar u Davidi nyian, ka Kristu Ter je la.

¹²Man kwagh u una lu ne ikav yô, né za zua a Wanikundan u i we Un ken akondo i gbir Un shin anar u haan ilev kwaghyan.

¹³Fese nahan ikumior i Sha va kohol ortyom la, ve gba wuese Aôndo, kaan er:

¹⁴I̱ wuese Aôndo Sha, shin tar yô, bem a̱ lu sha ior mba i doon Un a ve la.

¹⁵Tsô mbatyomov mba undun ve, mba yemen Sha yô, mbakuranilev kaa ayol a ve er: Se za nen ken Betelehem, se za nenge nen kwagh u a er man Ter A pase se ne.

¹⁶Nahan ve mough fefa, ve za kohol Maria man Yosev, man Wanikundan la kpaa, lu yaven shin anar u haan ilev kwaghyan.

¹⁷Mba nengen nahan yô, ve pase ior mkaanem ma i er ve sha Wan la.

¹⁸Mba ve ungwa cii, kpiligh ve iyol sha akaa a mbakuranilev ve er ve la.

¹⁹Kpa Maria koso akaa ne cii, lu a mi ken ishima lu henen sha mi.

²⁰Mbakuranilev mbala hire, gba civir Aôndo, wuese Un, sha ci u akaa a ve ongo man ve nenge la cii lu er i kaa ve nahan vough.

²¹Tsô ayange anigheni nga kom sha u á tsôngo Un yô, i ii Un iti er Yesu, i ortyom u Sha vande kaan je, er i lu a jile Un ken uya ga la.

²²Tsô ayange a mwanger u á wanger ve la nga kom sha tindi u Mose yô, ve za a Na sha Yerusalem sha u vea za na Un sha ikev i Ter yô,

²³er i nger ken tindi u Ter er: Hanma wannomso u iunda á yilan er icighankwagh u Ter,

²⁴man sha u vea za na nagh kpaa, er i kaa ken tindi u Ter er, mbaatii uhar, shin utulembamkunguv uhar yô.

²⁵Orgen lu ken Yerusalem, iti na er Shimeon; or la lu or u perapera man u cian Aôndo a ishima i môm, lu keghen msurshima u Iserael; Icighan Jijingi kpaa lu sha a na.

²⁶Icighan Jijingi lu pase un er una kpe ve ga saa una vande nengen Kristu u Ter ve.

²⁷Jijingi hemen un, a nyôr ken tempel man zum u mbamaren va nyôr a Wan ve Yesu sha u vea er a Na sha ieren i tindi yô,

²⁸A ngohol Un sha ave na, a gba wuese Aôndo kaan er:

²⁹Hegen yô, Tere, de wanakiriki Wou a̱ yem bem, bem sha mkaanem Ou;

³⁰Gadia ashe am nenge a myom Wou

³¹u U ser sha ishigh ki akuraior cii la ve;

³²ka iwanger i á pase i hen atôatyev, man ka iengem i nongo Wou Iserael kpaa.

³³Kpiligh ter Na man ngô Na iyol sha akaa a i er sha a Na la.

³⁴Tsô Shimeon ver ve doo doo, shi a kaa a ngô Na, Maria, er: Wan ne yô, i ver Un sha ci u mgbe man mmough u ior kpishi ken Iserael, man shi sha ci u ikav i á nyiman i yô

³⁵(we kpaa, sanker una sôô u ken ishima), sha u mbamhen mba ken asema kpishi vea due ken igbar yô.

³⁶Shi Ana kpaa lu her, lu profeti u kwase, lu wan u Fanuel u ken tsombor u Asher; un kpaa ayange kar un sha won kpishi, er a hia yô, a lu a nom anyom ataankarahar,

³⁷gema lu kwasecôghol, anyom a na cii yô, lu akunduanyiin kar anyiin, undun tempel ga, civir Aôndo sha kwaghyan u hôron man msen u eren tugh man tetan.

³⁸Un kpaa, er a va nôôr hen shighe la yô, a sugh Aôndo shi a ôr kwagh Na a mba ve lu keghen mpaa u Yerusalem la cii.

³⁹Mba kur akaa a sha tindi u Ter cii yô, ve hide ken Galilia ve va hen gar ve Nasareti.

⁴⁰Wan la vese, taver agee, A iv a mfe; man mrumun u sha mhôôn u Aôndo lu sha a Na.

⁴¹Mba ve mar Un la yô, hanma inyom ve zaan ken Yerusalem sha iniongo i Paseka.

⁴²Anyom a Na nga kom pue kar ahar yô, ve kôndo sha Yerusalem sha ieren i iniongo.

⁴³Ayange a iniongo la nga been, mba ngur hiren yô, Yesu Wanakiriki la, lu ken Yerusalem heregh, kpa mbamaren Un fa ga.

⁴⁴Kpa ve lu henen er, ngu ken ikpelaior, nahan ve yem zan zan zende u sha iyange i môm, ve gba za keren Un hen anmgbianev vev man hen mba ve fe ve yô;

⁴⁵mba zough a Na ga yô, ve hide ken Yerusalem, ve gba keren Un.

⁴⁶Tsô ayange nga kar atar yô, ve va kohol Un ken tempel, A tema her atô u mbatesen, lu ungwan ve, man shi lu pinen ve akaa.

⁴⁷Mba ve lu ungwan Un cii, kpiligh ve iyol sha mkav Na man sha mbamrumun Nav kpaa.

⁴⁸Mba nengen a Na yô, kpiligh ve iyol; tsô ngô Na kaa a Na er: Wana, ka nyi U er a vese nahana? Nenge, teru man mo, se lu keren We a ishima i nyian je.

⁴⁹Kpa A gema A kaa a ve er: Er nan man ne keren Mo? Ne kera fa er i lu u Me lu ken akaa a Terem keng gaa?

⁵⁰Kpa ve kav mkaanem ma A kaa a ve la ga.

⁵¹Tsô A yem a ve, A va ken Nasareti, A lu ungwan imo ve. Ngô Na kpaa koso mkaanem man cii ken ishima na.

⁵²Yesu kpaa lu yemen hemen hemen sha mfe man ivesen, man Aôndo rumun Un, ior kpaa rumun Un.