Read tiv Luka 22 Bible Online

Luka 22 - tiv bible

Luka 22

¹Iniongo i bredi u i we kwa sha mi ga la i i yer er Paseka la mgbôghom.

²Tsô upristi mbatamen man mbangeren gba keren ian i vea wua Un yô; gadia ve lu cian ikpelaior.

³Yô, Satan nyôr ken Yuda u i yilan un er Isekarioti la, lu u môm ken mba pue kar uhar mbala.

⁴Tsô a za a za ôr kwagh a upristi mba tamen man mbatamen mba ve kuran tempel la er una er man una na ve Un yô.

⁵Nahan ve ember, ve tôndo zwa er vea na un inyaregh.

⁶Un kpaa rumun nahan, tsô a gba keren ian i dedoo i una na ve Un ape ikpelaior ia lu her ga yô.

⁷Tsô iyange i bredi u i we kwa sha mi ga la kuma, ka iyange i i lu u sôngon Paseka je la.

⁸Nahan A tindi Peteru man Yohane, A kaa er: Za, za sôr nen Paseka sha ci wase, se za ya nen.

⁹Ve kaa a Na er: Ka hanma ijiir i sar U pe se̱ za sôrô?

¹⁰A kaa a ve er: Nenge, né za nyôron a nyôr ken gar tsô, orgen nana kohol ne, nan tôô ityegh ki mngeregh; za nen a nan hen ya u nana za nyôr la.

¹¹Nahan kaa nen a orya la ner: Ortesen ngu pinen we er: Iyou i mbavannya i Me ya Paseka a mbahenen Av ker yô, ngi hana?

¹²Nahan una tese ne kpoyou u vesen u sha, a ikav kimi cii yô, sôr nen heregh.

¹³Ve za ve za kohol er A kaa ve nahan; tsô ve sôr Paseka.

¹⁴Shighe kom yô, A tema kwaghyan kua mbaapostoli a Na imôngo.

¹⁵A kaa a ve er: Lu saren Mo tsung je u ma M ye Paseka ne a ven imôngo man Me mase yan ican ye.

¹⁶Gadia M ngu kaan ne, Me kera ya un ga, saa shighe u una va lu vough sha tartor u Aôndo la.

¹⁷Tsô A tôô iyongo, sughun Aôndo yô, A kaa er: Ngohol nen i, kar nen hen ayol a en;

¹⁸gadia M ngu kaan ne, mayange Me kera ma zar u atam a kon u wain ne ga zan zan saa tartor u Aôndo ua kar van.

¹⁹Shi A tôô bredi, sughun Aôndo yô, A coon, A na ve, A kaa er: Ngun ka iyol Yam je ne, [i i ne sha ci wen; eren nen kwagh ne sha u umbur Mo.

²⁰Iyongo di kpaa nahan, er kwaghyan bee kera yô, A kaa er: Iyongo ne ka ikuryan i he i ken awambe Am a i hee sha ci wen ne.]

²¹Kpa nenge, uwegh ku or u nengen mker sha a Mo, ku a Mo sha tebul imôngo.

²²Gadia Wan u or Una yem er i vande veren nahan la keng, kpa kwagh á tser or u nana nenge mker sha a Na la.

²³Tsô ve gba pinen ayol a ve er, shin ka an ken a ve nana er kwagh neou?

²⁴Ve shi ve gba sendegh anyiman ayol a ve er shin ka hanmô ve á ver nan orvesenou?

²⁵Kpa A kaa a ve er: Utor mba atôatyev ka ve manger sha a ve, man shi mba yer mba ve lu a tahav sha a ve la er mbawasenior.

²⁶Kpa ne yô, ka nahan ga; kpa u nana lu u vesen ken a ven yô, nana̱ hingir er u masetyô yô; man u nana lu orhemenegh, nana̱ hingir er wanye u wasen ne nahan.

²⁷Gadia ka an nan hembe iciviri, ka or u teman a tema hen kwaghyan, shinii, ka or u duen a due a iwere? Kera ka u a tem hen kwaghyan la gaa? Kpa Mo M ngu her atô wen er or u duen a iwer nahan.

²⁸Kpa ka ne je ne taver ishima ne lu a Mo ken ameen a i lu meen Mo la cii ye.

²⁹Nahan M ver ne tartor er Terem kpaa A verem nahan,

³⁰sha u né ya kwagh, né ma kwagh sha tebul Wam man né tema sha mkônom ma torom, né ôr ijir sha ikwe i Mbaiserael i pue kar ihiar la ye.

³¹Shimon! Shimon! Nenge, Satan norom sha u una yegher ne er uwua nahan.

³²Kpa M er msen sha ci wou sha u jighjigh wou u nan a̱ de yen ga yô; we kpaa, shighe u ú gema ishima yô, taver anmgbianev ou asema.

³³A kaa a Na er: Tere, m rumun u nyôron a We ken gaadi imôngo, kua ken ku je kpaa.

³⁴Kpa A kaa er: Me kaa u Peteru, nyian je ikegh ia lu a tôngo ga, tsô ú nyiman kwa tar je wer, u fam ga.

³⁵A kaa a ve er: Zum u M tindi ne a asukunyar ga, a ikpa man akôvangahar kpaa ga, nahan ma kwagh ban ne kpa? Ve kaa er: Kwagh ban ga.

³⁶Tsô A kaa a ve er: Kpa hegen yô, u nan lu a asukunyar yô, nana̱ tôô, ikpa kpaa nahan; u nan lu a sanker ga yô, nana̱ tee ikondo i nan i cirin iyol nana̱ yam un.

³⁷Gadia M ngu kaan ne, kwagh u i nger ne ka u una kure sha a Mo keng, er: I wa Un ken mbavendan atindi. Gadia kwagh u i nger sha a Mo kure sha mi je.

³⁸Ve kaa er: Tere, nenge, usanker mba heen uhar. A kaa a ve er: Kuma.

³⁹Tsô A due A yem sha uwo u Olev sha ieren Na la; mbahenen Nav kpaa gba zan Un ijime.

⁴⁰Za ar sha ijiir la yô, A kaa a ve er: Er nen msen sha er né gba ken imeen ga yô.

⁴¹A undu ve ica kuma er ka i ker iwen i za gba nahan; A gure inya, A er msen,

⁴²A kaa er: Tere! Wea rumun yô, tôôm iyongo ne kera, nahan kpa ka ishima Yam ga, i̱ lu ishima You i̱ er ye.

⁴³Tsô ortyom u Sha ande hen Na, gba taver Un ishima.

⁴⁴Tsô er A lu ken ican yum yô, A seer eren msen ishima i môm. Iusa Na gema hingir er ka aberawambe nahan, gba nôndon inya.

⁴⁵Moughon hen msen yô, A va hen mbahenen mbala, A kohol ve, ve lu yaven sha ci u ishima i vihin.

⁴⁶A kaa a ve er: Ka nyi ne yava? Mough, er nen msen sha er né gba ken imeen ga yô.

⁴⁷Ngur ôron nahan yô, ikpelaior za va, wen u i yer er Yuda, u môm ken mba pue kar uhar mbala, hemen ve gbenda; a kporom hen Yesu sha u una suse Un zwa yô.

⁴⁸Kpa Yesu kaa a na er: Yuda, ka sha zwa u susen u nenge Wan u or mker yee?

⁴⁹Mba ve lu a Na la ve nenge er kwagh una va er yô, ve kaa er: Tere, se gber ior sha sankere?

⁵⁰Tsô u môm ken ve gber wanakiriki u zegepristi, bugh un togh ku yanegh.

⁵¹Kpa Yesu gema kaa er: De nen nahan. A bende un uwegh sha to, A wanger un.

⁵²Tsô Yesu kaa a upristi mba tamen man mbavesen mba kuran tempel man mbatamen mba ve mough num a Na la, er: Ne mough ne va a usanker man agudô er ka hen ornumungbenda yôô?

⁵³Er M lu a ven ken tempel ayange ayange, ne za ave sha u kôron Mo ga; kpa shighe ne ka shighe wen je ne, man ka shighe u tahav mbu imegh kpaa.

⁵⁴Nahan ve kôr Un, ve yem a Na, ve za a Na hen ya u zegepristi. Kpa Peteru lu van ken ijime ica.

⁵⁵Er ve keer usu ker atô tembe man ve kohol ve tema imôngo yô, Peteru kpaa tema a ve heregh.

⁵⁶Wankwase ugen u eren tom nenge er a tema hen iwanger i usu, a kenger un, a kaa er: Or ne kpaa a lu a Na ityô!

⁵⁷Kpa a nyiman a kaa er: Kwase, m fa Un ga!

⁵⁸Kpa tem dôghôô yô, shi ugen nenge a na, a gema a kaa er: We kpaa u ngu ken a ve. Kpa Peteru kaa er: Ka mo ga, nomsoor!

⁵⁹Ka tem er ihwa i môm nahan yô, orgen shi pase un gbar gbar, kaa er: Mimi je, or ne kpaa a lu a Na ityô, gadia ka or u Galilia.

⁶⁰Kpa Peteru kaa er: We, or ne, mayange m fa kwagh u u kaan ne ga! Fese je, ngur ôron kwagh nahan yô, ikegh maa tôngo.

⁶¹Ter gema ishigh kenger Peteru; nahan Peteru umbur kwagh u Ter lu kaa un la er: Er ikegh ia lu a tôngo nyian ga je, tsô ú nyiman kwa tar wer, u fam ga.

⁶²Tsô a due a gba za vaan tsung.

⁶³Ior mba ve kôr Yesu la ve gba nahan Un tar, gbidyen Un.

⁶⁴Ve cir Un ashe, ve pine Un er: Pase ase, ka anti nan gbidi We?

⁶⁵Man shi ve ôr akaa agen kpishi sha a Na, ve tuhwa Un.

⁶⁶Sev mbu av yô, mkohol u mbatamen zua, lu upristi mba tamen kua mbangeren; tsô ve za a Na hen mkohol u ijir ve.

⁶⁷Ve kaa er: Aluer Wea lu Kristu je yô, kaa se dedoo. Kpa A kaa a ve er: Aluer Me kaa ne kpaa, né na jighjigh ga;

⁶⁸aluer Mea pine ne kpaa, né kaam ga.

⁶⁹Kpa hii hegen je zan zan Wan u or Una tema ken uwegh ku yanegh ku agee a Aôndo.

⁷⁰Ve cii ve kaa er: Nahan U ngu Wan u Aôndo? A kaa a ve er: Ne mba kaan je, M ngu Un.

⁷¹Ve kaa er: Kwagh shi gba se sha ma shiada kpa? Gadia se ayol ase je kpaa, se ungwa hen zwa Na.