Read tiv Luka 7 Bible Online

Luka 7 - tiv bible

Luka 7

¹Kur mkaanem Nam cii ken ato a ior yô, A nyôr ken Kapernahum.

²Tsô wanakiriki u torutya ugen, u a lu un a inja yum yô, gba angev lu nôngon ku.

³Ongo kwagh u Yesu yô, a tindi mbatamen mba Mbayuda her a Na, ve va zamber a Na er A̱ va, A̱ va war wanakiriki na la.

⁴Er ve va nôôr hen Yesu yô, ve zamber a Na tsung ve kaa er: A kuma u ma U er un kwagh la,

⁵gadia nongo wase doo un ishima kpee, wen iyol na kpaa a maa se shinagoge je.

⁶Tsô Yesu za a ve imôngo. Ka kera shin ica a ya la ga yô, torutya la tindi akar a na agen her a Na gba va kaan a Na er: Tere, de eren iyol You ican ga, gadia m kuma u U nyôr hen haav av ga,

⁷ka nahan man m fe mer, m kuma u van hen We iyol yam ga ye; kpa ôr a ôr kwagh tsô, wanakiriki wam kpaa á wanger un iyol.

⁸Gadia mo kpaa, m ngu sha ikev i mbautahav mbagenev je; mo iyol yam kpaa m ngu a mbautyav sha ikev yam; ka mea kaa a ugen mer: Za, kpa nan za je; man shi a ugen mer: Va kpa nan va di je; man shi mea kaa a wanakiriki wam mer: Er nahan, kpa nan er je.

⁹Er Yesu ungwa akaa ne yô, kpiligh Un iyol a na; A gema A kaa a ikpelaior i i lu van Un ken ijime la er: M ngu kaan ne, ken Iserael je kpaa mayange M ngu a zua a jighjigh u vesen nahan ga.

¹⁰Ve mba i tindi ve la, mba hir ken ya yô, ve kohol wanakiriki la doo doo.

¹¹Kper nan yô, A lu zan sha gar ugen u i yilan er, Nain la; mbahenen Nav za a Na, kua ikpelaior kpishi kpaa.

¹²Za mgbôghom hen hundagar yô, i tôô orkpen i lu duen a mi, lu wan u ngô na môm; un kwase la kpaa lu kwasecôghol. Ikpelaior kpishi i ken gar la kpaa lu a na.

¹³Er Ter nenge a Na yô, mhôônom kôr Un a na, A kaa a na er: De vaan ga.

¹⁴Tsô A kporom, A bende gambe la. Mbatôôn mbala tile; tsô A kaa er: Wanyekwaor, M ngu kaan a̱ we Mer Mough sha!

¹⁵Orkpen la mough, tema sha, gba ôron kwagh. A gema un A na ngô na.

¹⁶Nahan mciem gba ve iyol cii, ve gba civir Aôndo kaan er: Zegeprofeti mough ken vese ve; man shi Aôndo va sôr nongo Na.

¹⁷Gwa u kwagh Na la samber ken Yudia cii man ken iningirtar la cii kpaa.

¹⁸Mbahenen mba Yohane va ôr un akaa ne cii.

¹⁹Nahan Yohane yila mbahenen nav uhar, tindi ve hen Ter, kaa er: Ka We Un u U lu van ne, shin se̱ ver ashe sha ugene?

²⁰Zum u ior mbala va hen Na yô, ve kaa er: Yohane u eren batisema tindi se hen We kaa er: Ka We Un u U lu van ne shin se̱ ver ashe sha ugene?

²¹Hen shighe la A war ior kpishi sha uange man sha umkpeyolga man sha ujijingi mba bov, man shi mbaapirashe kpishi kpaa A na ve mnenge kera.

²²A gema A kaa a ve er: Gba yemen nen tsô, za ôr nen Yohane akaa a ne nenge man a ne ongo kpaa, ner: Mbaapirashe mba nengen kera, mbasombon mba zenden; ka wanger mbaamandev iyol, mbakondonato mba ungwan, mba nderen mbakpenev, man shi mba ôron mbaatsanev Loho u Dedoo.

²³Man saan or u kwagh Wam a ne nan anzughul ga la iyol.

²⁴Tsô mbatyomov mba Yohane mba yemen kera yô, A hii u ôron ikpelaior la kwagh u Yohane er: Ne za ken taaikôngo ner, né za nenge nyi? Ka ijinga i ahumbe a tenger a mi la ase?

²⁵Kpa ne za ner, né za nenge nyi? Ka or u haan akondo a ver vere? Yô, nenge nen, mba ve hee akondo a icivirigh, man mba ishar i hee ve iyol yô, mba ken uya mba utor.

²⁶Kpa ne za ner, ne za nenge nyi? Ka profeti? Een, M ngu kaan ne, a hemba profeti kpaa.

²⁷Ka un je i nger kwagh na er: Nenge, M ngu tindin ortyom Wam sha ishigh You, u una za sôr U gbenda sha hemen yô.

²⁸Gadia M kaan ne, mba kasev ve mar ve cii, or môm hemba Yohane icivir ga; nahan kpaa or u sha tartor u Aôndo u nan hembe gban ijime la nan hemba un.

²⁹Ior mba ve ungwa cii kua mbangoholkpandegh, ve na Aôndo ishô, gadia i er ve batisema sha batisema u Yohane la.

³⁰Kpa Mbafarishi man mbafanatindi ve bunde awashima u Aôndo sha a ve, gadia ve rumun i̱ er ve batisema ga yô.

³¹Yô, ka sha nyi je man Me kar ior i hen kov ne? Shin ve bee nyiou?

³²Mba er mbayev mba ve tem sha tembe kasua, ve yer ayol a ve, ve kaan er: Se tôngo ne imar, kpa ne vine amar ga; se gber kwelegh, kpa ne vaa ga.

³³Gadia Yohane u eren batisema va, ye kwaghyan ga, me wain kpaa ga, nahan kpaa ne mba kaan ner: Ngu a jijingi u bo.

³⁴Wan u or va yô, ye kwagh, shi me kwagh kpaa; yô, ne mba kaa ner: Ka or u kumbur hua sha kwaghyan, man or u eren hua sha msôr, ka huror u mbangoholkpandegh kua u mbaasorabo.

³⁵Kpa mfe zua a ishô hen ônov nav cii ve.

³⁶Tsô ugen ken Mbafarishi yila Un iwer. Za nyer hen ya u Orfarishi la yô, A za tema kwaghyan.

³⁷Kwase ugen ken gar la, u lun a asorabo, za fe er A lu yan kwaghyan ken ya u Orfarishi la yô, a va a tumugh ku mkurem ma human doon.

³⁸A va tile Un ken ijime hen angahar a Na, a gba vaan, nôndon Un mliam angahar, a ese a sha ice na i sha ityou, a gba susen a, a shighe a mkurem ma human doon mara.

³⁹Tsô er Orfarishi u a yila Un iwer la, nenge nahan yô, a ôr kwagh ken ishima na, a kaa er: Aluer Or ne Una lu profeti je yô, ma A kav inja i kwase u a bende Un ave iyol ne, er a lu u asorabo yô.

⁴⁰Yesu gema kaa a na er: Shimon, kwagh ngum u ma M er a we. A kaa er: Kaa ha, Ortesen.

⁴¹Tsô A kaa er: Or u nan injô lu a mbayan un injô uhar; u môm injô na lu sule deri utaan ugen la yô, gema lu sule akunduahargber.

⁴²Man mba fetyô u kimbin ga yô, a de ve mbauhar mbala cii anzô ve. Ken ve yô, ka anti á hemba doon nan a naa?

⁴³Shimon gema kaa er: Beem er ka u i de un i kpishi la yô. A kaa a na er: U tôndo vough.

⁴⁴Gem ashe ken kwase la yô, A kaa a Shimon er: U nenge kwase ne kpa? M nyôr hen ya wou je, kpa u nam mngerem ma ôôn angahar ga; kpa wen yô, a heen Mo angahar sha mlia, a shi a ese a sha ice na.

⁴⁵We u susem zwa ga; kpa wen yô, er M nyer heen je, a mem u susen Mo angahar ga.

⁴⁶We, u haam mkurem sha ityou ga; kpa wen yô, a shighem mkurem ma human doon shin angahar.

⁴⁷Ka sha ci u nahan M kaan we ye, asorabo a na a a lu kpishi la, i de un a cii; dooshima na u vesen ne tese nahan; kpa u i de nan asorabo a nan ciôn yô, dooshima u nan ngu di ciôn je.

⁴⁸Tsô A kaa a kwase la er: I de u asorabo a ou ve.

⁴⁹Mba ve kase kwaghyan a Na imôngo la, gba kaan ken asema a ve er: Ka nyi Or ne man asorabo je kpaa A deen ioroo?

⁵⁰A kaa a kwase la er: Jighjigh wou u nan war u; yem bem bem.