Read tiv Duteronomi 11 Bible Online

Duteronomi 11 - tiv bible

Duteronomi 11

¹Nahan yô, TER, Aôndo wou, A̱ doo u ishima, waan kwagh u A we u la iko gbem kua akaawan a Na man akaaôron a jirigh a Na man atindi a Na kpaa.

²Shi fa nen nyian, gadia ka ônov enev mba ve fe man ve nenge mtsaha u TER, Aôndo wen, ga la, m lu ôron kwagh a ve ga, mhembe Na man uwegh nagh ku ageegh man uwegh Nagh ku naregh,

³man uivande Nav man aeren a Na ken atô u Igipiti a A er Farao tor u Igipiti man tar na cii;

⁴man kwagh u A er ikumutya i Igipiti, anyinya ve man akeke ve, er A er mngerem ma Zegemnger u Nyian kuwa, cir a, zum u ve lu zendan ne ijime la, man er TER tim ve er i lu nyian nahan,

⁵man er lu eren a ven ken desereti zan zan ne va ar hen ijiir ne,

⁶man kwagh u A er a Datan man Abiram, ônov mba Eliabi wan u Ruben la, er inya aver zwa u i, mena ve a ior vev man utenti vev, man hanma kwaghuma u a dondo ve cii, hen atô u Iserael cii;

⁷gadia ashe a en nenge uzegembaakaav mba TER er la cii.

⁸Nahan yô, waan nen atindi a m we ne nyian ne iko cii, sha er né taver man né nyôr né ngohol tar u ne lu zan her, sha u né za ngohol u la;

⁹man sha er á seer ne ayange ken tar u TER bum a uter enev er Una na ve a tsombor ve la, tar u atumbabua man iyough ve dumbur ker yô.

¹⁰Gadia tar u u lu nyôron sha u za ngohol u la, ngu er tar u Igipiti u ne dugh ker la ga, ken ape yan u lôôn ivor you, u urun mngerem sha nguhar ou, er sule u iue nahan;

¹¹kpa tar u ne lu zan sha u za ngohol u la yô, ka tar u agungu man apev, ngu me mngerem ma ura u Sha u nee yô;

¹²ka tar u TER, Aôndo wou, A nengen sha u yô; ashe a TER, Aôndo wou, nga sha u gbem, sha mhii u inyom zan zan mkur u i.

¹³Nahan yô, aluer né ver ato sha gbashima sha atindi a M we ne nyian ne er TER, Aôndo wen, A̱ doo ne ishima, man né er Un tom a ishima yen cii man uma wen cii yô.

¹⁴Me nôôn ura sha tar wen sha ashighe ashighe, vough vough, urahe man ura u masetyô, sha er ú sunda iyiagh you man wain wou kua mkurem ou.

¹⁵Shi Me er toho ua lu ken akôngo a ou sha ci u ilev you; we kpaa ú yaan kwagh á kuman we.

¹⁶Ver nen ishima sha ayol a en sha er i̱ de bum ne er né kaha né hingir u eren mbaaôndo mbagenev tom, guren civir ve, ga;

¹⁷gayô, ishima á vihi TER a ven tsung, Una cir Sha, ura ua kera nôô ga, inya kpaa ia kera doo iyiagh ga, nahan né tim fese sha tar u dedoo u TER A lu nan ne ne.

¹⁸Yô, koso nen akaaôron am ne ken ishima yen ken uma wen kpaa; zer nen a sha uwe, a̱ lu ne ikav, shi a̱ lu ne kwagh u zeren sha icul senen hen kungwa.

¹⁹Man tesen ônov ou a, ôron kwagh u a, zum u wea tema hen ya wou, man zum u wea zenden sha gbenda, man zum u wea yav inya man zum u wea moughon sha kpaa.

²⁰Nger a sha ikpande i ken ambusu a ihinda i iyou you man sha ihindagar you kpaa;

²¹sha er á seer ne ayange man ayange a ônov enev kpaa, ken tar u TER bum a uter enev er Una na ve la, er ayange a mlu u Sha a lu tar sha nahan.

²²Gadia aluer ka sha gbashima man né waan atindi a m we ne ne cii iko, né eren sha mi, TER, Aôndo wen, Una doo ne ishima, né zaan sha gbenda Na cii man né var a Na yô,

²³nahan TER Una zenda akuraior ne cii sha ishigh yenegh kera, né ngohol tar u akuraior a a hembe ne iyenge kua agee kpaa yô.

²⁴Hanma ijiir i ikevnguhar yen ia ndyar yô, ia hingir i yen, hii hen desereti man Lebanon, man hii shin Ifi ka ifi u Uferati je la, zan zan za ar shin zegemnger u shin ityôtar, á lu tar wen cii.

²⁵Ma or nana fatyô u tilen ne sha ishi ga; TER, Aôndo wen, Una haa mcieryol wou man mciem ma á cian we sha tar u né za ndyar sha u la cii, er A kaa ne nahan.

²⁶Nenge, nyian m ver ne iveren man ifan sha ishi;

²⁷aluer né waan atindi a TER, Aôndo wen, a m ne ne nyian ne iko yô, ka iveren;

²⁸kpa aluer né waan atindi a TER, Aôndo wen, iko ga, né undu gbenda u m kaa ne nyian ne, né dondo mbaaôndo mbagenev mba ne fe ve ga yô, ka ifan.

²⁹Tsô, zum u TER, Aôndo wou, Una nyôr a we ken tar u u lu zan sha u za ngohol u la yô, ver iveren sha uwo u Gerishim, gema ver di ifan sha uwo u Ebal.

³⁰Kera ka yande Yordan i lu gaa? Hen gbenda u shin vegher u shin ityôtar, bargbenda u shin ityôtar, ken tar u Mbakanaan mba ve tem ken Araba sha ishigh ki Gilgar, hen ikon i terebin i More la.

³¹Gadia né per Yordan né za ngohol tar u TER, Aôndo wen, Una na ne la, né ngohol u, né tema ker kpaa.

³²Ver nen ishima waan nen akaawan man akaaôron a jirigh a m ver ne sha ishi nyian ne cii iko.