Read tiv Duteronomi 19 Bible Online

Duteronomi 19 - tiv bible

Duteronomi 19

¹Zum u TER, Aôndo wou, Una tim akuraior, a TER, Aôndo wou, Una na u tar u a, man á zenda a kera, ú tema ken agar a ve man ken uya vev yô,

²tsegha agar atar ken atô u tar wou, u TER, Aôndo wou, A lu nan we er ú ngohol u la.

³Sôr igbenda; pav tar, u TER, Aôndo wou, Una na u er ú ngohol u la, uipaven utar, sha u hanma or u nan woo or yô, nana yevese nana za nyôr ker.

⁴Kwagh u or u nan woo or man nana yevese nana za ker sha u nana war yô, ka un ne: U nan woo anngô u nan abu man nana vande kôron nan ihom kera kpaa ga;

⁵er or u nan ze shin ikô a anngô u nan sha u za gberen ikon nahan, nana kende ijembe sha u gberen kon man gbengerjembe la ua tsuwa ken hondo, ua tume anngô u nan la, nana kpe yô, ka nan nana̱ yevese nana̱ za hen u môm u ken agar la, nana war;

⁶sha er or u oron iyev sha awambe nana̱ de zende or u nan woo or la, zum u ishima i kende nan la, nana̱ za kohol nan sha ci u gbenda u lihi, nana̱ wua nan ga; gadia nan er kwagh u kuman ku ga, sha ci u nan vande kôron ngula ihom ga yô.

⁷Ka nahan man m kaa u mer: Tsegha agar atar.

⁸Aluer TER, Aôndo wou, Una seer we tar er A bum a uter ou, man Una na u tar u A tende zwa a uter ou er Una na ve u la cii—

⁹aluer ú waan atindi a m we u nyian ne cii iko sha u eren sha mi er TER, Aôndo wou, Una doo u ishima man ú zaan sha igbenda Na gbem yô nahan shi seer agar agen atar sha a atar la;

¹⁰sha er i̱ de hee awambe a orishôôgh ken tar u TER, Aôndo wou, Una na u dyako la, man ibo i awambe la i̱ hide sha a we ga.

¹¹Kpa aluer ma or nana kôr anngô u nan ihom, nana za kegh nan myer, nana mough nana gber nan ivav i bo je nana kpe, man nana yevese nana za nyôr ken gar môm u ken agar la yô,

¹²nahan mbavesen mba hen gar u nan la, ve̱ tindi i̱ za hide a nan ker, vea gema nan vea na nan sha ikev i or u oron iyev i awambe la, sha er nana̱ kpe yô.

¹³Ishe you i̱ de zungu nan mhôônom ga, kpa dugh ibo i̱ awambe a orishôôgh hen Iserael kera, sha er á kpe u iyol yô.

¹⁴De kper a ikav i ipaventar i anngô u, i ior mba ngise tim la ga, ken dyako wou u ú zua a mi ken tar u TER, Aôndo wou A lu nan we er ú ngohol u la.

¹⁵Orshiada môm tseegh nana̱ de eren shiada sha or nana̱ pase hanma injaifer i nan, shin hanma injaisholibo i nan, á lu nyityô isholibo i or la nana er kpaa ga; ka sha zwa u mbashiada uhar shin sha zwa u mbashiada utar man kwagh una kure ye.

¹⁶Aluer ma orshiada u aperagh nana er shiada sha ma or, nana pase er nan er kwaghbo yô,

¹⁷ve mba uhar mba anyiman a lu her atô ve la, ve̱ za tile sha ishigh ki TER sha ishigh ki upristi man mbaajiriv mba ve tem ijir hen ayange la;

¹⁸mbaajiriv mbala ve̱ time dedoo; aluer orshiada la nana er shiada u mimin ga, nana wa anngô u nan aie iyol yô,

¹⁹er nen a nan er i sar nan ka i̱ er a anngô u nan la nahan, kape ú er man ú dugh ifer ken a we kera ne.

²⁰Mbagenev mbala kpaa vea ungwa vea cia, nahan mayange vea kera seer eren injaifer ne ken a we ga.

²¹Ishe you i̱ de zungu mhôônom ga; uma sha uma, ishe sha ishe, inyigh sha inyi, uwegh sha uwe, nguhar sha nguhar.